תוכן השאלה
לכבוד דער ראש ישיבה שליט"א,
וואס דארף איך צו טון ווען מיין שווער פירט זיך אויף ווי א בעבי, ווי א קליין קינד? ער האט מיר געפרעגט וואס איך האב מתפלל געווען אין אומאן ראש השנה, האב איך אים געזאגט אז איינע פון די זאכן האב איך געבעטן איך זאל זוכה זיין צו א בן זכר, זאגט ער מיר אז ער גייט מזכיר זיין ביי זיין רבי'ן אז איך זאל האבן א מיידל, און מען וועט זען ווער איז עס גרעסער.
וואס טוט מען אין אזא צייט? זאל מען עפעס ענטפערן, אדער זיך נישט וויסנדיג מאכן? עס שפירט זיך אזוי קינדעריש.
יישר כח
תשובה מאת הראש ישיבה שליט"א:
ערב שבת קודש פרשת נח, ה' מרחשון, שנת תשפ"ז לפרט קטן
געב אכטונג זיך נישט צו קריגן מיט דיין שווער, און אז ער מאכט ווערטלעך אויף ברסלב - זאלסטו נישט מאכן קיין עסק דערפון אז עס זאל חס ושלום נישט שעדיגן דיין שלום בית; זייער אסאך שלום בית פראבלעמען קומען פון דעם וואס מען איז מזלזל אינעם כבוד פונעם שווער און שוויגער.
אויך זאלסטו וויסן, עס ווערט גע'פסק'נט אין הלכה (שלחן ערוך יורה דעה סימן רמ, סעיף כד): "חייב אדם בכבוד חמיו", מען דארף מכבד זיין א שווער, און אז מען איז מכבד די שווער און שוויגער איז דאס גורם א שטארקע ליבשאפט און צו א שטארקע שלום בית.
דו שרייבסט אז ער פירט זיך אויף ווי א בעבי, ווי א קליין קינד; איך בעט דיר דו זאלסט דאס נישט זאגן פאר דיין ווייב, דאס וועט איר זייער באדערן, די בעסטע זאך איז זאלסט נישט מאכן קיין עסק פון די זאכן, און אז ער זאגט דיר אזעלכע ווערטער געב א שמייכל און גיי ווייטער, און זיי מתפלל ער זאל אויך מקורב ווערן צום רבי'ן, און אז אלע זאלן מקורב ווערן צום צדיק; ווייל דאס מאכן ווערטלעך אויפן רבי'ן דאס איז ווייל עס איז דא אסאך לשון הרע און אסאך ליגנט, דער סמ"ך מ"ם טוט דאס, ער לאכט און מאכט ווערטלעך, אזוי האט ער זיך אויסגענומען ביים בית דין של מעלה, אז דער רבי'ס נשמה קען אראפקומען נאר בתנאי אז ער וועט לאכן און מאכן ווערטלעך מיט דעם אלטישקן; קוק די מעשה באריכות אין ספורי מעשיות, מעשה ז.
דער אייבערשטער זאל העלפן זאלסט האבן הצלחה אין אלע ענינים.