תוכן השאלה
לכבוד דער ראש ישיבה שליט"א,
איך בין א מיידל אין די יארן פון שידוכים, עס איז מיר זייער שווער אויפ'ן הארץ, און איך שפיר אז דאס דערווייטערט מיר פונעם אייבערשטן.
איך פרוביר אסאך צו לויבן און דאנקען דעם אייבערשטן, אסאך צו רעדן צום אייבערשטן און צו זיין נאנט מיט אים, איך שפיר אבער צומאל אזוי ווי דער אייבערשטער הערט מיר נישט אויס חס ושלום, אז ער ענטפערט מיר נישט, און ווער ווייסט ווען ער וועט מיר יא ענטפערן, און עס איז מיר זייער שווער אז איך געפין זיך אין אזא שווערע מצב פון הסתר פנים, איך וויל אזוי שטארק צו זען און שפירן דעם אייבערשטן, און איך וויל שוין אזוי שטארק אויפשטעלן אן אייגענע אידישע שטוב.
צומאל ווער איך זייער צעבראכן פון דעם, וואס איז די מעשה? דער אייבערשטער וויל נישט איך זאל אויפשטעלן א אידישע שטוב? ער דארף נישט האבן מיינע אלע תפילות וואס איך בעט אים אויף א הייליגע און ערליכע אידישע שטוב? אויף ערליכע קינדער? עס איז שוין גענוג פאר'ן אייבערשטן אז מיינע חבר'טעס האבן שוין אויפגעשטעלן שטיבער, מיין שטוב איז נישט אזוי וויכטיג ביי אים?
אפשר האט דער ראש ישיבה שליט"א אן עצה און חיזוק פאר מיר?
יישר כח
תשובה מאת הראש ישיבה שליט"א:
יום ה' פרשת תצוה, ו' אדר, שנת תשפ"ה לפרט קטן
... תחי'
איך האב ערהאלטן אייער בריוו.
וויסן זאלט איר, די מחשבות וואס זאגן אייך אז דער אייבערשטער דארף אייך נישט - דאס זענען נישט קיין כשר'ע מחשבות, דאס קומט פון די סטרא אחרא. קלאפט ארויס די טריפה'נע מחשבות, און זאגט אייך: "דער אייבערשטער האט מיך זייער ליב", און דאס וואס איר ווארט אויף אייער שידוך - דאס ווייסן מיר נישט; מיר ווייסן נישט און פארשטייען נישט דעם אייבערשטנ'ס וועגן, מיר גלייבן אז יעדע זאך איז פאר אונזער טובה, און מיר דארפן נאר עוסק זיין אין תפילה און אין שירות ותשבחות צום אייבערשטן, ווייל דער אייבערשטער האט זייער ליב אונזערע תפילות.
פארלירט זיך נישט, האט חס ושלום נישט קיין טענות און קיין תרעומות אויפן אייבערשטן. זייט ווייטער מתפלל, דער אייבערשטער ווארט אויף אונזערע תפילות, אבער חס וחלילה האבן א פינטל טענות אויף די אמונה.
איר וועט בקרוב טרעפן אייער שידוך און אויפשטעלן אן ערליכע שטוב.
דער אייבערשטער זאל העלפן איר זאלט האבן הצלחה אין אלע ענינים.