בעזרת ה' יתברך

יום ה' פרשת תצוה, ו' אדר, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

מוהרא"ש זכותו יגן עלינו האט איינגעפירט א תקנה פאר אלע אנשי שלומינו, מען זאל זאגן די צען קאפיטלעך תהלים יעדן אינדערפרי גלייך נאך עלינו לשבח פון תפילת שחרית, ווען מען האט נאך אנגעטון די רבינו תם תפילין; אזוי ווערט דאס א באשטימטע זאך, און מען פארפעלט נישט קיין איין טאג פון זאגן די צען קאפיטלעך תהלים, די תיקון הכללי. ווייל דער הייליגער רבי האט געזאגט (לקוטי מוהר"ן חלק א', סימן כט), אז די תיקון הכללי איז מסוגל צו פאררעכטן וואס מען האט פוגם געווען בברית, אויך איז דאס מסוגל פאר א גרינגע פרנסה.

דעריבער זאלסטו זיך צוגעוואוינען צו זאגן די 'תיקון הכללי' גלייך אינדערפרי נאך שחרית, אזוי וועסטו האבן ריינע מוחין. ווייל די תיקון הכללי איז מתקן אלעס, אפילו די זאכן וואס איז שווער אנצוקומען צו זיי, און אז דו ביסט נישט אנגעקומען צו זאגן בייטאג - קענסטו זאגן די תיקון הכללי ביינאכט.

אינטערעסאנט איז, דער רבי זאגט (שיחות הר"ן, סימן קמא): "עס וועט זיין שווער צו זאגן די צען קאפיטלעך תהלים, ווייל איך האב דאס געזאגט צו זאגן", (מען זעט דאס קלאר, ווער קען דען נישט זאגן צען קאפיטלעך תהלים... עס איז א גרינגע זאך צו זאגן אפאר קאפיטלעך תהלים, אבער די תיקון הכללי דאס קומט שוין אן שווער צו זאגן).

וואויל איז דעם מענטש וואס לאזט זיך נישט נארן און איז זוכה צו זאגן יעדן טאג די תיקון הכללי, וועט ער אלעס מתקן זיין.

דער אייבערשטער זאל העלפן זאלסט האבן הצלחה אין אלע ענינים.