תוכן השאלה
לכבוד דער ראש ישיבה שליט"א,
איך האב לעצטנס אנגעהויבן מקורב ווערן צו ברסלב, איך פרוביר צו טון די עצות און זיך מחזק זיין.
איך האב אסאך געהערט איבער די גרויסקייט פון פארן צום הייליגן רבי'ן אויף ראש השנה, איך האב זייער שטארק חשק צו פארן קיין אומאן, און איך בעט דעם אייבערשטן אז איך זאל זוכה זיין טאקע צו קענען זיין דאס יאר אין אומאן.
איך האב א פראבלעם מיט שלאפן צוזאמען מיט אנדערע מענטשן אין איין צימער, איך וועק זיך נישט אלץ אויף אינמיטן די נאכט ווען עס פעלט אויס, און דעריבער האב איך מורא אז איך וועל פארשעמט ווערן, אבער איך וויל נאכאלץ פארן קיין אומאן. אויב דער ראש ישיבה שליט"א קען מיר געבן אן עצה און חיזוק אויף דעם.
יישר כח
תשובה מאת הראש ישיבה שליט"א:
יום ב' פרשת ואתחנן, י' מנחם-אב, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
קום קיין אומאן, קוק נישט אויף דעם, ערשטנ'ס מען קען זיך אן עצה געבן, מען קען אנטון ביים שלאפן וכו' און נישט ווערן פארשעמט. קום צום רבי'ן און דאס זאלסטו אויך בעטן, ביים ציון קען מען פועל'ן אלצדינג. דער צדיק וועקט אויף פון שלאף, וועט דער רבי דיר העלפן מיט דעם אויך, אז דו וועסט זיך אויפוועקן פון שלאף.
ביים רבינ'ס ציון אין אומאן קען מען פועל'ן ישועות למעלה מדרך הטבע, מען קען זיך עקשנ'ען און פועל'ן ניסים ונפלאות. מוהרא"ש זכרונו לברכה האט דערציילט א מורא'דיגע מעשה וואס ער האט געהערט פון א באגלייבטן איד, איינער פון אנשי שלומינו פון פריערדיגן דור; האט דער איד דערציילט אז ער איז געווען ביים ציון ערב ראש השנה צוזאמען מיט אנשי שלומינו, פלוצלונג איז אנגעקומען א איד, אויך איינער פון אנשי שלומינו, ער האט מיטגעברענגט מיט זיך זיין זון, דער קינד האט נעבעך נישט געקענט גיין, ער איז געווען פאראליזירט אויף זיינע פיס רחמנא לצלן, און דער טאטע האט אים געטראגן אויף זיינע אקסלען, דער איד איז געשטאנען אין א זייט און געווארט ווילאנג אלע וועלן אהיים גיין. עס איז געווארן נאכמיטאג ווען אלע זענען שוין געגאנגען צום קלויז דאווענען מנחה, האט דער איד צוזאמגענומען אלע שטויב פון ציון צו איין פלאץ, און ער האט אריינגעזעצט זיין קינד אין די שטויב, און ער איז דארט געזעצן און געוויינט אז זיין זון זאל האבן א רפואה שלימה, ער זאל קענען גיין מיט די אייגענע פיס. פלוצלונג שטעלט זיך אויף דער קינד אויף זיינע פיס געזונט און שטארק, און ער האט אנגעהויבן גיין כאחד האדם, ער איז געגאנגען צום קלויז דאווענען מנחה מיט זיין טאטע, און דאס איז געווען א מורא'דיגע וואונדער פאר אלע וואס האבן דאס צו געקוקט.
ווען מען האט אים געפרעגט פון וואו האט ער גענומען די עצה פון צוזאמנעמען די שטויב פון ציון און אריינזעצן זיין קינד אין דעם, האט ער געענטפערט מיט א פשטות: "פון סיפורי מעשיות, וואו דער רבי פארציילט אז דער חיגר האט געהערט ווי דער זון זאגט פאר די לבנה אז עס איז דא אן 'אבק', וואס אויב מען טוט אריין די פיס אין די שטויב ווערט מען אויסגעהיילט; איך האב זיך געמאכט א חשבון, וואו איז נאך דא אזא הייליגע שטויב ווי די שטויב פון רבינ'ס ציון, וואו אלע קומען זיך אויסגיסן דאס הארץ פארן אייבערשטן, איז דאך זיכער אז די שטויב איז הייליג"; זעט מען פון דעם אז ביים ציון קען מען אלעס פועל'ן, אויב מען ניצט אויס די צייט ווי עס דארף צו זיין.
דער אייבערשטער זאל העלפן זאלסט האבן הצלחה אין אלע ענינים.