תוכן השאלה
לכבוד דער ראש ישיבה שליט"א,
איך וויל פרעגן, ווען מיין מאן פרעגט מיך א זאך אין חינוך, וואס איך האלט מען זאל טון, זאל איך אים ענטפערן וואס איך טראכט אדער צוריק פרעגן וואס ער האלט און ער זאל אפמאכן וואס איז ריכטיג צו טון?
איך רעד דוקא ווען ער פרעגט מיך, ברוך ה' איך פארשטיי פון די שיעורים אז איך קען נישט מחנך זיין מיין מאן ווי אזוי צו מחנך זיין קינדער, און איך פאלג, איך זאג אים נישט וואס צו טון.
יישר כח
תשובה מאת הראש ישיבה שליט"א:
ערב שבת קודש פרשת נשא, י' סיון, שנת תשפ"ה לפרט קטן
מרת ... תחי'
א פרוי מיט שכל מאכט איר מאן שפירן ווי ער איז קעניג, ער איז בעל הבית, און אפילו דער מאן איז נישט דער גרעסטער חכם - מאכט זי אים שפירן ווי ער איז אלעס.
ווען דער מאן וויל טון זאכן וואס זענען נישט ריכטיג קען מען מיט חכמה בלייבן שטארק מיט די ריכטיגע וועג, אן דעם וואס מען זאל אים מאכן שפירן ווי ער ווייסט נישט און ער טויג נישט.
אז אייער מאן פרעגט ווי אזוי צו מחנך זיין די קינדער, וואס איז ריכטיג צו טון וכו'; זאלט איר אים העלפן, נישט זאגן "איך ווייס נישט"; ווייל עס איז אנדערש ווען דער מאן פרעגט און וויל וויסן ווי ווען די פרוי טיילט איין און לערנט אים ווי אזוי צו טון.
דער אייבערשטער זאל העלפן איר זאלט האבן הצלחה אין אלע ענינים.