תוכן השאלה
לכבוד דער ראש ישיבה שליט"א,
ש'כח הייליגער באשעפער פאר מיין שיינע לעבן. היינט איז מען ממשיך די שולע, ש'כח אייבערשטער עס איז זייער געשמאק.
וואס זאל איך טון אז איך האב זייער מורא פון ראש השנה? איך האב מורא וואס דער אייבערשטער גייט שרייבן אויף אונז, איך בעט אזוי שטארק דעם אייבערשטן אויף א גוטע יאר, נאכאלץ האב איך אבער מורא וואס גייט זיין, איך וועל זיך פרייען צו באקומען אן ענטפער, א גרויסן יישר כח.
תלמידה בית פיגא ירושלים
תשובה מאת הראש ישיבה שליט"א:
יום ג' פרשת שופטים, א' דראש חודש אלול, שנת תשפ"ד לפרט קטן
... תחי', תלמידה בית פיגא ירושלים
איך האב ערהאלטן אייער בריוו.
אזוי דארף צו זיין ביי יעדן איד, ווען עס קומען די הייליגע טעג דארף אנכאפן א פחד 'וואס גייט מען מיר דן זיין דעם יום הדין?' מען דארף זיך אנגרייטן מיט זאגן תהילים, מיט טון חסד מיט אנדערע און פאררעכטן וואס מען דארף פאררעכטן, אבער אין די זעלבע צייט - אינאיינעם מיט די פחד - דארף מען זיך זייער פרייען מיט די גוטע זאכן וואס מיר טוען, מיט די מצוות און מיט די אמונה וואס מיר האבן, און טראכטן אז דער אייבערשטער וועט אונז זיכער אנשרייבן א גוט געבענטשטע יאר.
מען דארף דינען דעם אייבערשטן מיט יראה און מיט אהבה, מיט פארכט און מיט ליבשאפט, עס מוז גיין ביידע אינאיינעם. אזוי ווי די הייליגע חכמים זאגן (ירושלמי ראש השנה פרק א, הלכה ג') דער סדר אין די וועלט איז, א מענטש וואס האט א משפט טוט זיך אן שווארץ און לאזט זיך וואקסן זיינע האר, ער גייט צום משפט טרויעריגערהייט, ער ווייסט נישט וואס מען וועט אים משפט'ן, "אבל ישראל אינן כן", אבער אידישע קינדער - ווען עס קומט ראש השנה - טוען נישט אזוי, "אלא לובשים לבנים", זיי טוען זיך אן שיינע ווייסע קליידער, מען שערט זיך אפ די האר, מען עסט און מען טרינקט מיט גרויס פרייד.
דער אייבערשטער זאל העלפן איר זאלט האבן הצלחה אין אלע ענינים.
א גוטן חודש און א גוט געבענטשט יאר.