תוכן השאלה
לכבוד דער ראש ישיבה שליט"א,
איך הער אלעמאל רעדן פון מלחמות און איך ציטער פאר שרעק. עס איז דא יעצט א מלחמה אין ארץ ישראל, א מלחמה אין רוסלאנד, און אויך זאגן מיידלעך אין מיין קלאס אז עס גייט זיין נאך און נאך מלחמות, איך ציטער אז עס זאל נישט זיין נאך א קריג אזוי ווי אונזערע עלטער באבעס האבן מיטגעמאכט.
איך האב גערעדט צו מיין לערערין און זי האט מיר געזאגט אז אידן זענען זייער וואויל און מען זעט ניסים וואס דער אייבערשטער מאכט כסדר מיט אידן יעדן טאג, אבער איך קען זיך אויפוועקן אסאך מאל אינמיטן די נאכט מיט א שרעקליכע פיינפולע מחשבה, 'אפשר שיסט מען? און אפשר זענען שוין סאלדאטן אריינגעקומען יעצט אינמיטן נאכט אין אמעריקע?', און איך פיל ווי איך וויל שטארבן, אז איך זאל נישט דארפן מיטמאכן קיין צרות.
יישר כח
תשובה מאת הראש ישיבה שליט"א:
ערב שבת קודש פרשת ויקרא, ו' ניסן, שנת תשפ"ה לפרט קטן
... תחי'
איך האב ערהאלטן אייער בריוו.
זינגט ניגונים פון אמונה, אמונה בארואיגט דעם מענטש, זינגט: "דער אייבערשטער איז דא, דער אייבערשטער מאכט נאר גוטס" - וועט אייך ווערן גוט, איר וועט זיך בארואיגן פון די שרעק.
מוהרא"ש, ווען ער פלעגט זיך מתבודד זיין אין פעלדער און אין וועלדער, ער פלעגט גיין רעדן צום אייבערשטן - האט ער מורא געהאט פון די חיות, ער פלעגט אנטרעפן הינט וכו', האט ער דעמאלט אנגעהויבן חזר'ן די ווערטער וואס דער היילעגער רבי זאגט: "מְמַלֵּא כָּל עַלְמִין וְסוֹבֵב כָּל עַלְמִין, אֵין שׁוּם מְצִיאוּת בִּלְעָדָיו יִתְבָּרַךְ כְּלָל, וּבְכָל תְּנוּעָה וּתְּנוּעָה שָׁם אֲלוּפוֹ שֶׁל עוֹלָם", ער האט דאס גע'חזר'ט אן א שיעור מאל, און אזוי זאגנדיג די ווערטער איז ארויסגעקומען א שיינע תנועה און עס איז באקאנט געווארן צווישן ברסלב'ער חסידים, די ניגון פון ממלא כל עלמין, און דאס האט ארויסגענומען פון אים די פחדים.
דורך חזר'ן אמונה - וועלן אוועק גיין אלע פחדים, איר וועט זיך שפירן זיכער מיטן אייבערשטן, איר וועט פון קיינעם מער נישט מורא האבן.
דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.