תוכן השאלה
לכבוד דער ראש ישיבה שליט"א,
איך רעד צום אייבערשטן יעדן טאג, איך פיל אבער נישט קיין טעם, דער ראש ישיבה שליט"א רעדט ביי די שיעורים אז מען פילט א טעם אבער איך פיל נישט קיין טעם, איך ווייס נישט ווי אזוי קען עס זיין, אויב מען קען עס מיר פארענטפערן וועל איך זיך פרייען.
יישר כח
תשובה מאת הראש ישיבה שליט"א:
ערב שבת קודש פרשת עקב, י"ז מנחם-אב, שנת תשפ"ו לפרט קטן
... נרו יאיר
איך האב ערהאלטן דיין בריוו.
אזוי גייט עס ביי אלעמען, אין אנהייב שפירט מען נישט גלייך די זיסקייט פון עבודת השם, אין דאווענען און אין לערנען; אין אנהייב דארף מען אסאך טון אן געפיל, און מיט דער צייט איז מען זוכה צו שפירן אזא שטארקע ליכטיגקייט, ביז מען וויל שוין גארנישט; מען וויל נאר נאך און נאך דאווענען און לערנען.
אזוי איז ביים דאווענען און אזוי איז ביים לערנען, עס נעמט צייט ביז מען איז זוכה צו שפירן א טעם. קוק וואס דער הייליגער רבי האט דערציילט, ווי אזוי ער האט אנגעפאנגען לערנען ווען ער איז געווען א יונג קינד. "וְסִפֵּר שֶׁכָּל לִמּוּדוֹ בָּא לוֹ בִּיגִיעָה גְּדוֹלָה", דער רבי האט דערציילט אז עס איז אים זייער שווער אנגעקומען צו לערנען ווען ער איז געווען יונג, "כִּי בִּתְחִלָּה הָיָה לוֹמֵד מִשְׁנָיוֹת וְלא הָיָה מֵבִין לִמּוּדוֹ", ער האט געלערנט משניות אבער ער האט נישט פארשטאנען וואס ער לערנט, "וְהָיָה בּוֹכֶה הַרְבֵּה לִפְנֵי הַשֵּׁם יִתְבָּרַךְ שֶׁיָּאִיר עֵינָיו", וואס האט ער געטון? ער האט זייער אסאך געוויינט צום אייבערשטן אז ער וויל זוכה זיין צו פארשטיין, "וְהָיָה בּוֹכֶה וּבוֹכֶה כָּל כָּךְ עַד שֶׁזָּכָה שֶׁיּוּכַל לִלְמוֹד מִשְׁנָיוֹת", איך האב אזוי סאך געוויינט צום אייבערשטן - זאגט דער רבי - ביז איך האב זוכה געווען צו קענען לערנען און פארשטיין משניות. "וְכֵן אַחַר כָּךְ לָמַד שְׁאָר סְפָרִים וְלא הָיָה מֵבִין גַּם כֵּן", נאכדעם האט דער רבי געלערנט אנדערע ספרים און ער האט נישט פארשטאנען וואס ער לערנט, "וְהָיָה בּוֹכֶה וּבוֹכֶה גַּם כֵּן הַרְבֵּה מְאד עַד שֶׁזָּכָה לַהֲבִינָם", האט ער ווייטער געוויינט צום אייבערשטן ער זאל זוכה זיין צו פארשטיין, ביז דער אייבערשטער האט אים געהאלפן אז ער האט פארשטאנען אלעס וואס ער האט געלערנט (שבחי הר"ן, אות ח).
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.