תוכן השאלה
לכבוד דער ראש ישיבה שליט"א,
די דירה וואו מיר וואוינען יעצט איז שוין ברוך ה' אויסגענוצט, און מיר קענען נישט יעצט קויפן א געהעריגע הויז אין אונזער געגנט, מיין שאלה איז אויב מיר זאלן זוכן צו קויפן א קלענערע הויז אין א ביליגערע געגנט אין אונזער שטאט, אדער זאלן מיר דערווייל דינגען א דירה ביז מיר וועלן האבן גענוג געלט צו קענען קויפן?
איך האב שוין אסאך געבעטן דעם אייבערשטער צו וויסן וואס צו טון, אבער מיר דארפן אן עצה וואס שנעלער צו וויסן וועלכע וועג צו גיין.
און בכלל דארפן מיר א ישועה עס זאל זיין ביי אונז מער שפע און פרנסה.
יישר כח
תשובה מאת הראש ישיבה שליט"א:
יום ד' פרשת חיי שרה, י"ט מר-חשון, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
עס לוינט זיך אריינצושפרינגען אין קויפן און האבן אן אייגענע הויז, מוהרא"ש אין די בריוו ווען ער וואונטשט מען זאל האבן אן אייגענע הויז צייכנט ער אלץ צו די ווערטער פון די הייליגע חכמים, ווי זיי זאגן (ירושלמי מועד קטן ב, ד): "שמחה לאדם בשעה שהוא דר בתוך שלו", עס איז א פרייד ווען מען וואוינט אין די אייגענע דירה.
אויך זאלסטו זיך זארגן אויף א בית נצחי, אן אייגענע אייביגע דירה. מאך זיך א שיעור צו לערנען יעדן טאג א בלאט ב'בלי, א בלאט י'רושלמי און א פרק ת'ופתא, די ראשי תיבות איז ב'י'ת'; דאס איז א בית וואס האלט פאר נצחי, פאר אייביג. ווייל ווען עס קומט די צייט וואס מען דארף אוועק גיין פון דער וועלט נעמט מען מיט די בלעטער גמרא, די פרקים משניות און ברייתות, און די גוטע מעשים.
אויך איז דאס לערנען יעדן טאג "בית נצחי", א בלאט ב'בלי, א בלאט י'רושלמי און א פרק ת'ספתא - א סגולה צו קענען האבן אן אייגענע הויז.
דער אייבערשטער זאל העלפן זאלסט האבן הצלחה אין אלע ענינים.