תוכן השאלה
לכבוד דער ראש ישיבה שליט"א,
איך האב יעצט געענדיגט ליינען די עצתו אמונה אויף לשון הקודש פון פרשת וירא, און איך קען זיך נישט איינהאלטן, איך מוז שרייבן מיינע געפילן פאר'ן ראש ישיבה שליט"א.
די בריוו זענען דאך אזוי ליכטיג, יעדע בריוו איז נאך א בליץ, א גאנצע קונטרס מיט אזויפיל שכל, קלוגע הדרכות און עצות ווי אזוי אנצוגיין אין לעבן מיט תמימות ופשיטות.
עס גייט מיר דורך א גאנצע וואך מיט שוועריקייטן און בלבולים, ביז איך באקום די וועכנטליכע קונטרס, און ס'שטעלט מיר דעם קאפ אויפ'ן פלאץ, איך קען זיך אן עצה געבן מיט יעדע זאך.
איך ווארט שוין קוים פאר א פולע ספר עצתו אמונה אויף לשון הקודש, דאס וועל איך נעמען פאר מיין מורה דרך אין לעבן. און אז מ'וועט דאס מפיץ זיין, וועט דאס מחזיר בתשובה זיין די גאנצע וועלט.
יישר כח
תשובה מאת הראש ישיבה שליט"א:
בעזרת ה' יתברך
יום א' פרשת חיי שרה, י"ח מרחשון, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
איך פריי זיך זייער צו הערן אז דו ביסט זיך מחי' מיט דעם הייליגן רבינ'ס עצות; וואויל איז אונז אז מיר האבן אזא רבי וואס גייט פאר אונז, ער ווייזט אונז די וועג ווי אזוי צו לעבן מיט'ן אייבערשטן, דער רבי גייט פאר אונז אויף די וועלט און אויף יענער וועלט.
די נאכט פאר דעם רבינ'ס הסתלקות האט דער רבי געזאגט (חיי מוהר"ן, סימן רכה): "מַה לָּכֶם לִדְאֹג, מֵאַחַר שֶׁאֲנִי הוֹלֵךְ לִפְנֵיכֶם", וואס זארגט איר? איך גיי פאר אייך, "וּמָה אִם הַנְּשָׁמוֹת שֶׁלֹּא הִכִּירוּ אוֹתִי כְּלָל, הֵם מְצַפִּים עַל תִּקּוּנִים שֶׁלִּי, מִכָּל שֶׁכֵּן אַתֶּם", אלע נשמות וואס האבן מיר נישט געקענט ווארטן איך זאל זיי מתקן זיין, איז דאך זיכער אז ענק תלמידים וועל איך זיכער פאררעכטן.
שטארק זיך אין הפצה; תלמידי היכל הקודש דארפן עוסק זיין נאר אין הפצה, א גאנצן טאג טראכטן נאר פון הפצה; עס דארף ברענען אין הארץ פון יעדן איינעם פון אונז ווי אזוי מען קען מזכה זיין נאך א איד מיט די עצות און חיזוקים פון רבי'ן.
דער אייבערשטער זאל העלפן זאלסט האבן הצלחה אין אלע ענינים.