בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן
צו מיין טייערער ליבער ... נרו יאיר
איך האב ערהאלטן דיין בריוו.
גלייב מיר, איך בענק מיך אויך זייער זייער צו דיר, און איך פריי זיך זייער יעדע מאל צו זען דיינע בריוו.
ברודער שטארק זיך, דער רבי זאגט (לקוטי מוהר"ן חלק ב', סימן מח): "כְּשֶׁאָדָם נִכְנָס בַּעֲבוֹדַת הַשֵּׁם, אֲזַי הַדֶּרֶךְ שֶׁמַּרְאִין לוֹ הִתְרַחֲקוּת, וְנִדְמֶה לוֹ שֶׁמַּרְחִיקִין אוֹתוֹ מִלְמַעְלָה וְאֵין מַנִּיחִין אוֹתוֹ כְּלָל לִכָּנֵס לַעֲבוֹדַת הַשֵּׁם", אזוי גייט עס ווען מען וויל ווערן אן ערליכער איד, מען שפירט ווי 'קיינער דארף מיך נישט', "וּבֶאֱמֶת כָּל הַהִתְרַחֲקוּת הוּא רַק כֻּלּוֹ הִתְקָרְבוּת", דאס איז נאר א וועג ווי אזוי מען וויל דערנענטערן דעם מענטש צום אייבערשטן, און אויב דער מענטש איז שטארק ביי זיך און ער דערהאלט זיך - דאן וועט ער אלעס אריבערגיין און ער וועט זוכה זיין צו אלע מדריגות וואס איז נאר פארהאן.
בנוגע דיין קליין קינד וואס רופט דיך ביים נאמען, לערן אים אויס צו זאגן 'טאטע' און 'מאמע' און מאך נישט קיין עסק פון דעם, עס קען זיין ער הערט די געשוויסטער רופן ביים נאמען זאגט ער אויך אזוי, און אז דו וועסט אים לערנען מיט סבלנות, וועסט אים מחנך זיין מיט אהבה - וועסטו שעפן אסאך נחת.
דער אייבערשטער זאל העלפן זאלסט האבן הצלחה אין אלע ענינים.