בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן
מרת ... תחי'
עס איז נישט גערעכט אז איר ווילט מער נישט בעטן די תפילות פון די בריוו וואס איך האב אייך געשריבן, א תפילה צו זיין פרייליך; איר זאגט עס איז שוין אזוי לאנג וואס איר בעט אויף דעם, אז איר קענט מער נישט ארויסזאגן די תפילה.
וויסן זאלט איר, מען דארף האבן אויף תפילה אסאך חיזוק און אסאך סבלנות, און אפילו מען זעט ווי עס גייט אריבער אזא לאנגע צייט וואס מען בעט און מען זעט נאך נישט די ישועה - דארף מען ווייטער מתפלל זיין און ווייטער בעטן. דער הייליגער רבי זאגט (לקוטי מוהר"ן חלק א', סימן ב): "כי עיקר כלי זינו של משיח הוא התפילה", די געווער פון א איד איז תפילה, "שהוא בחינת חוטם", תפילה אזוי ווי די נאז, די נאז ווייזט אויף אריכות אפים, אויף סבלנות, מען דארף אסאך געדולד ביי תפילה, און נאר אז מען האט די געווער פון תפילה, אינאיינעם מיט אסאך סבלנות - דעמאלט קען מען אייננעמען אלעס און זוכה זיין צו ניסים.
זאגט יעדן טאג קאפיטל כט, גלייבט אין דעם, גלייבט אין רבינ'ס ווערטער אז דאס וועט אייך אויסהיילן. דער רבי זאגט (ספר המדות אות קליפה, סימן י): "הַשִּׁבְעָה קוֹלוֹת שֶׁאָמַר דָּוִד עַל הַמַּיִם, בְּדִבּוּרָן מַכְנִיעִין הָרוּחַ רָעָה", אז מען זאגט קאפיטל כט נעמט מען אוועק דעם רוח רעה וואס כאפט זיך אריין אינעם מענטש, דאס וועט פארטרייבן די שווארצע וואלקענעס וואס שוועבן אויף אייך, די שווארצע וואלקענס וועלן אוועק גיין.
"מִזְמוֹר לְדָוִד הָבוּ לַה' בְּנֵי אֵלִים הָבוּ לַה' כָּבוֹד וָעֹז, הָבוּ לַה' כְּבוֹד שְׁמוֹ הִשְׁתַּחֲווּ לַה' בְּהַדְרַת קֹדֶשׁ. קוֹל ה' עַל הַמָּיִם אֵל הַכָּבוֹד הִרְעִים ה' עַל מַיִם רַבִּים. קוֹל ה' בַּכֹּחַ קוֹל ה' בֶּהָדָר. קוֹל ה' שֹׁבֵר אֲרָזִים וַיְשַׁבֵּר ה' אֶת אַרְזֵי הַלְּבָנוֹן. וַיַּרְקִידֵם כְּמוֹ עֵגֶל לְבָנוֹן וְשִׂרְיֹן כְּמוֹ בֶן רְאֵמִים. קוֹל ה' חֹצֵב לַהֲבוֹת אֵשׁ. קוֹל ה' יָחִיל מִדְבָּר יָחִיל ה' מִדְבַּר קָדֵשׁ, קוֹל ה' יְחוֹלֵל אַיָּלוֹת וַיֶּחֱשֹׂף יְעָרוֹת וּבְהֵיכָלוֹ כֻּלּוֹ אֹמֵר כָּבוֹד, ה' לַמַּבּוּל יָשָׁב וַיֵּשֶׁב ה' מֶלֶךְ לְעוֹלָם, ה' עֹז לְעַמּוֹ יִתֵּן ה' יְבָרֵךְ אֶת עַמּוֹ בַשָּׁלוֹם".
דער אייבערשטער זאל העלפן איר זאלט האבן הצלחה אין אלע ענינים.