בעזרת ה' יתברך - יום ה' פרשת שמות, י"ט טבת, שנת תשפ"ו לפרט קטן
... נרו יאיר, בארא פארק
האסט מיך זייער דערפרייט אז דו האסט אויפגעהערט אויסהערן "פאדקעסטס" וכו', דו האסט אליינס געזען די שעדליכקייט ווי מען ווערט אפגעקילט, מען פארלירט די תמימות; עס איז טאקע אזוי, ווייל דער הייליגער רבי זאגט (שיחות הר"ן, סימן פא): "בְּנֵי אָדָם הֵם מוֹנְעִים גְּדוֹלִים מְאֹד", מענטשן זענען די גרעסטע שטער צו דינען דעם אייבערשטן, ווייל דער מענטש אליינס האט טאקע זיינע אייגענע בלבולים, מניעות און מחשבות וואס קען אים זיין א שטער, אבער פארט ציט דער מענטש שטענדיג צוריק צום אייבערשטן, און אפילו מען פאלט אראפ אין אן עבירה רחמנא לצלן האט מען נאכדעם חרטה און מען ציט זיך צוריק צום אמת, אבער אז מען האט שלעכטע חברים, און אז מען הערט פאדקעסטס פון לצים, פון מענטשן וואס האלטן זיך פאר חכמים – "זֹאת הַמְּנִיעָה וְהַבִּלְבּוּל הוּא גָּרוּעַ מֵהַכֹּל", דאס איז ערגער פון אלעס, "כִּי כָּל דְּרָכָיו נַעֲשִׂין לוֹ מִישׁוֹר", עס ווערט אים אלעס ווי א גלייכע גוטע וועג חס ושלום; קוק נאך די גאנצע שיחה דארט.
הכלל, די לעצטע נסיון פון הערן פאדקעסט, טאלק-שאו, און אינטערוויוס פון מענטשן וואס אין שול וואלט מען זיי נישט אויסגעהערט, און ווען מען טרעפט זיי וואלט מען זיך געשעמט צו שטיין נעבן זיי, און אויפן טעלעפאן זיצט מען טעג און נעכט זיי אויסצוהערן; דאס איז אזוי געפערליך, עס נעמט אוועק דעם מענטש פון אמונה, פון קדושה, פון יראת שמים, ובעיקר פון צדיק אמת, פון הייליגן רבי'ן; מען פארלירט אלעס.
זייער גוט אז דו האסט דאס אפגעלאזט, און הלוואי זאלסטו רעדן צו אלע חברים, זיי איבערצייגן אז דאס איז ערגער פון אלעם.
כאפ זיך צוריק אין גורס זיין משניות און גמרא, און זיי שטארק אין דאווענען שחרית, מנחה און מעריב.