בעזרת ה' יתברך - יום א' פרשת משפטים, י"ח שבט, שנת תשפ"ה לפרט קטן
מיין טייערער ליבער ... נרו יאיר
יעצט אז דו זאגסט מיר אז שוין אפאר חדשים וואס דו לייגסט נישט קיין תפילין, דאס איז די תירוץ וואס די שלום בית ביי ענק איז געווארן זייער שלעכט, ענק קריגן זיך וכו', ביז ענק טראכטן שלעכטע מחשבות פון רחמנא לצלן.
איך בעט דיר זייער, הויב נישט אן דיין טאג נאר נאכן גיין אין שול אנטון די הייליגע תפילין, דער אייבערשטער ווארט אויף דיין קומען אין שול און אנטון תפילין, דער אייבערשטער פרעגט יעדן טאג: "וואו איז מיין קינד ..., איך בענק זיך צו אים, ווען קומט ער שוין צוריק אין שול דאווענען און אנטון די הייליגע טלית און תפילין?"
תפילין געבט לעבן פארן מענטש, מען ווערט לעבעדיג. חכמינו זכרונם לברכה זאגן (מנחות מד.), ווער עס לייגט תפילין - איז זוכה צו אריכות ימים, מען הויבט אן לעבן, מען לעבט א זיסע לעבן, עס לוינט צו לעבן אז מען קען אנטון נאכאמאל די הייליגע תפילין. ווייסט די מעשה, אמאל איז געקומען צום צדיק רבי אברהם קאליסקער זכותו יגן עלינו א זקן קרוב צו די ניינציג יאר, און זיך אויסגעקרעכצט: "רבי, עס איז מיר פארעקלט צו לעבן, איך וויל שוין שטארבן", האט דער צדיק רבי אברהם אים געזאגט: "די טיפש וואס דו ביסט, עס לוינט זיך דיר נישט דאס לעבן אז דו וועסט קענען נאך איין טאג אנטון די הייליגע תפילין?!"
דאס וואס דו זאגסט אז דו קענסט נישט קומען אין שול ווייל דו שעמסט זיך פון מענטשן, דו קומסט געלט, דו האסט חובות; איך זאג דיר צו, אויב וועסטו יעדן טאג קומען אין שול דאווענען די דריי תפילות - וועסטו ארויסגיין פון אלע דיינע חובות און דו וועסט האבן גרויס שפע.
דער אייבערשטער זאל העלפן זאלסט האבן הצלחה אין אלע ענינים.