בעזרת ה' יתברך
יום ג' פרשת ויקהל, כ"א אדר א', שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
אז דו וועסט רעדן שיין צו דיין ווייב - וועסטו אלעס האבן. דו וועסט האבן אן אייגענע דירה מיט שיינע מעבל און א שיינע קאר; אלעס ווענדט זיך אין דיר, ווי אזוי דו וועסט רעדן פון היינט און ווייטער צו דיין ווייב; אזוי זאגט דער רבי (לקוטי מוהר"ן חלק א', סימן סט): "עִקַּר הָעֲשִׁירוּת עַל יְדֵי הָאִשָּׁה", דאס גאנצע עשירות איז בזכות די ווייב; אז מען איז מכבד די ווייב, מען רעדט צו איר אזוי ווי ערליכע אידן רעדן, מען בעט איר אלץ איבער - דעמאלט האט מען א רייכע לעבן.
חכמינו זכרונם לברכה זאגן (פסחים מט:) וואס איז די חילוק פון אן ערליכע לעבן און נישט אן ערליכע לעבן? דער ערליכער איד בעט איבער זיין ווייב און איז מיט איר וכו' וכו', ווידער דער נישט ערליכער איד רעדט נישט שיין, ער בעט נישט איבער, ער איז ווילד אזוי ווי א לייב וואס צעברעכט די ביינער וכו'.
איך שרייב דיר וואס איך האב מקבל געווען פון מוהרא"ש זכותו יגן עלינו; אז דו וועסט זיך אזוי פירן וועט דיר גארנישט פעלן.
דער אייבערשטער זאל העלפן זאלסט האבן הצלחה אין אלע ענינים.