בעזרת ה' יתברך
יום ד' פרשת בלק, י"ג תמוז, שנת תשפ"א לפרט קטן
לכבוד ...
איך האב ערהאלטן דיין בריוו.
וואס מען טראכט בייטאג – דאס חלומ'ט מען ביינאכט. אז מען טראכט גוט, מען איז פרייליך, מען דאנקט דעם אייבערשטן – חלומ'ט מען זיך גוטע חלומות, ווידעראום אז מען לעבט אין שרעק, מען טראכט שרעקעדיגע זאכן, 'איך גיי נישט האבן קיין געלט', 'מיר גייען איין טאג הונגערן', 'איך גיי זיך נישט קענען אן עצה געבן מיט די קינדער וכו' וכו'', דעמאלט חלומ'ט מען זיך דאס.
דער הייליגער רבי זאגט (ספר המידות אות חלום, סימן א-ב): לַחֲלוֹם רָע תֹּאמַר בַּבֹּקֶר: "הַחֲלוֹמוֹת שָׁוְא יְדַבֵּרוּ", אז מען חלומ'ט זיך א נישט גוטע חלום, זאל מען זאגן: "הַחֲלוֹמוֹת שָׁוְא יְדַבֵּרוּ", חלומות זענען נאריש, און ווען מען חלומ'ט זיך א גוטע חלום, זאל מען זאגן: "בַּחֲלוֹם אֲדַבֶּר בּוֹ", דער אייבערשטער רעדט צו מיר.
אז עס לויפן דיר נאך נישט גוטע חלומות, דו טראכסט שלעכטע מחשבות, זאלסטו בעטן א קליינע געבעט: "הייליגער באשעפער, איך וויל זיין פאזעטיוו, איך וויל האבן אמונה אין דיר, איך וויל נישט מורא האבן פון גארנישט"; בעט דאס נאכאמאל און נאכאמאל – וועסטו ווערן פרייליך, דו וועסט מער נישט טראכטן און חלומ'ען שלעכטס.