בעזרת ה' יתברך - יום ה' פרשת ראה, כ"ז מנחם-אב, ער"ח מוקדם, שנת תשפ"ה לפרט קטן
... תחי'
איך האב ערהאלטן אייער בריוו.
איך פריי זיך זייער צו הערן אז איר קומט צו די כוחות, דער אייבערשטער זאל אייך העלפן איר זאלט האבן נאך מער כח און שעפן נחת פון אייערע קינדערלעך.
נעמט ווייטער די מעדעצין צו קענען איינשלאפן, קלאפט זיך נישט אראפ, אלע נעמען מעדעצין, אלע נעמען ווייטאמין, אידישע מאמעס דארפן האבן אסאך כח צו קענען פירן די שטוב ווירטשאפט.
אז איר ווילט עפעס טון אין עבודת השם, זאלן אייערע ליפן שעפשען תודה והודאה, דאנקט און לויבט דעם אייבערשטן פאר אלעס וואס איר האט, פאר אייער טייערע מאן, פאר אייערע ליכטיגע קינדער און אזוי ווייטער.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה, א גוט געבענטשט יאר.