בריוון פונעם ראש ישיבה שליט"א

בעזרת ה' יתברך - יום ד' פרשת במדבר, כ"ח אייר, מ"ג לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

זוכט אויף צען זאכן וואס עס איז אייך גוט, צען גוטע זאכן וואס דער אייבערשטער טוט מיט אייך; צום ביישפיל, איך זע, איך הער, איך האב פיס, הענט וכו' וכו', און דאנקט אים פאר די צען זאכן: "שכוח אייבערשטער אז איך זע, שכוח אייבערשטער איך הער, שכוח אייבערשטער איך האב הענט און פיס וכו' וכו'"; אז איר וועט דאנקען דעם אייבערשטן יעדן טאג פאר די צען זאכן, וועט איר באקומען א טעם אין לעבן, איר וועט אנהויבן ארויסגיין פון אייער פארמאכטקייט, איר וועט אליין זען און אליין שפירן וואס וועט פאסירן מיט אייך, איר וועט מער נישט דארפן גלייבן אז דאס איז די עצה, איר וועט ווערן ניי געבוירן.

דאס דאנקען און לויבן דעם אייבערשטן איז די עצה צו שפירן אין לעבן א טעם, פטור ווערן פון די טויטקייט. אזוי ווי דוד הנמלך זאגט (תהלים קטו, יז-יח): "לֹא הַמֵּתִים יְהַלְלוּ קָהּ", אז מען דאנקט נישט - שפירט מען טעם טויט, "וַאֲנַחְנוּ נְבָרֵךְ קָהּ", אבער אז מען דאנקט און מען לויבט דעם אייבערשטן - הויבט מען אן צו לעבן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ז אייר, מ"ב לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איר זענט געזונט און שטארק, גייט נישט צום דאקטער זיך אונטערזוכן, עס איז גארנישט אז מען פארלירט די סדר וכו' און א לאנגע צייט וואס עס קומט נישט אן וכו'.

זייט נישט באזארגט, דאנקט און לויבט דעם אייבערשטן פאר די קינדער וואס ער האט אייך געגעבן און דאס וועט עפענען די טויערן אין הימל און איר וועט זוכה זיין צו נאך קינדער.

זאגט יעדן טאג תהילים, דאס וועט ברענגען ישועות און רפואות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך זאג אייך נאכאמאל, אייער מאן איז נישט שלעכט, ער איז נישט פארדארבן, ער גייט נישט צו שלעכטע פלעצער, ער איז פשוט צעבראכן פון זיינע יונגע יארן, דאס מאכט אים אויסדרייען דעם סדר היום, שלאפן בייטאג און זיין אויף ביינאכט, און אויב איר וועט בעטן דעם אייבערשטן, איר וועט האבן סבלנות – וועט איר זען ווי אלעס וועט זיך טוישן.

ביז דערווייל זאלט איר זיך מאכן א געהעריגע סדר היום, גייט שלאפן אין צייט, ווארטס נישט ביז דריי פיר אזייגער פארטאגס, עס וועט נישט העלפן אז איר וועט אויף בלייבן ביינאכט ביז אייער מאן קומט אהיים, אויך וועט נישט העלפן דאס רופן טויזנט מאל, טעקסטן טויזנט מאל. דאס איז גוט ווען עס פאסירט אמאל אמאל, ווען דער מאן פארזוימט זיך; אים צו רופן, אים דערמאנען אז איינער ווארט אויף אים אין שטוב. אז עס פאסירט אמאל דעמאלט בלייבט מען אויף, מען ווארט אפ דעם מאן. אין אייער פאל ווען זיין סדר היום איז אויסגעדרייט, ער שלאפט בייטאג, ער שטייט אויף פארנאכטס און ער גייט ארויס פאר די נאכט - וועט נישט העלפן דאס אויסווארטן און דאס רופן און טעקסטן. ענדערש זאלט איר זיך מאכן א געהעריגע סדר היום, גיין שלאפן צייטליך.

דאנקט דעם אייבערשטן אז יעדער איז געזונט, דאנקט דעם אייבערשטן אז יעדער איז ערליך, דאנקט דעם אייבערשטן אז איר זענט חתונה געהאט, מיט ליכטיגע קינדער, און נאכן דאנקען זאלט איר בעטן פאר אייער מאן ער זאל האבן א סדר היום. בעטס עס מיט רחמנות, נישט מיט עצבות, בעטס דעם אייבערשטן א מתנת חנם, נישט אז עס מוז אזוי זיין, און ווארטס מיט געדולד אויף די ישועה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן

מרת ... תחי'

עס וועט אייך נישט העלפן דאס נישט זיין פרייליך און דאס וויינען א גאנצן טאג, הויבט אן טון דעם רבינ'ס עצות, טראכטס פון איין גוטע זאך וואס איר האט און הויבט אן דאנקען דעם אייבערשטן אויף דעם, און נאכדעם זוכט אויף נאך איין גוטע זאך וואס איר האט און דאנקט און לויבט דעם אייבערשטן אויף דעם.

עס איז נישט קיין עצה זיך צו ציען צו עצבות און מרה שחורה, ציט זיך צו שמחה; בעטס דעם אייבערשטן: "הייליגער באשעפער העלף מיר, נעם מיך ארויס פון מיין עצבות און מרה שחורה, העלף מיר איך זאל זיין פרייליך, איך זאל האבן א שטארקע אמונה, איך זאל דיך שפירן ווי דו ביסט מיט מיר.

הייליגער באשעפער געב מיר כח דיך צו קענען דינען, איך זאל פאלגן דעם הייליגן רבי'ן מיט א תמימות און נישט ניצן מיינע פארדרייטע חכמות, נאר זוכן אין מיר נאר דאס גוטס, און אויך אין מיין מאן זאל איך זען נאר גוטס, און אין יעדן איינעם זאל איך זען נאר גוטס".

יעצט אז איר זענט אזוי דעפרעסט מעגט איר הערן מוזיק אין די טעג פון ספירה, עס איז א סכנה צו זיין אזוי צעבראכן, איר מוזט זיין פרייליך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

... תחי'

לכבוד אייער געבורטסטאג וואס געפאלט דעם שבת, ג' אייר, זאלט איר זוכה זיין צו געזונטע לאנגע יארן מיט אלעס גוטס.

נעמט זיך פאר לכבוד אייער געבורטסטאג צו זאגן יעדן טאג "נשמת"; לויבט און דאנקט דעם אייבערשטן פאר די חסדים וואס דער אייבערשטער מאכט מיט אייך, דאס וועט אייך געבן צו שפירן טעם גן עדן. אזוי ווי דער הייליגער רבי זאגט (לקוטי מוהר"ן חלק ב', סימן ב): "כִּי זֶה עִקָּר שַׁעֲשׁוּעַ עוֹלָם הַבָּא, לְהוֹדוֹת וּלְהַלֵּל לִשְׁמוֹ הַגָּדוֹל יִתְבָּרַךְ וּלְהַכִּיר אוֹתוֹ יִתְבָּרַךְ", די תענוג פון עולם הבא איז צו דאנקען דעם אייבערשטן און אים לויבן, וויסן אז אלעס איז ער און ער איז אלעס, "שֶׁעַל יְדֵי זֶה סְמוּכִים וּקְרוֹבִים אֵלָיו יִתְבָּרַךְ", ווי מער מען דאנקט דעם אייבערשטן איז מען נענטער צו אים, "כִּי כָּל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווייל ווי מער מען ווייסט אז אלעס איז בלויז דער אייבערשטער אליין - "סְמוּכִים אֵלָיו בְּיוֹתֵר", איז מען נענטער צו אים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

מרת ... תחי', קרית ברסלב

איך האב ערהאלטן אייער בריוו.

אז אייער שוועגערין וויל אייך נישט שיקן א בילד פון א קלייד וואס זי האט איינגעקויפט, און פאר די אנדערע שוועגערין שיקט זי יא - דאס איז נישט קיין צרה, אויף דעם וויינט מען נישט; וואלט איר געוויסט וויפיל צרות עס איז דא ביי אידישע קינדער, וויפיל ווארטן אויף קינדער, וויפיל דארפן א רפואה, וויפיל דארפן שלום בית וכו' וכו' – וואלט איר געדאנקט און געלויבט דעם אייבערשטן אז איר זענט געזונט, אייער מאן איז געזונט, אייערע קינדער זענען געזונט, ענק האבן א גוטע שלום בית, ענק פירן זיך ערליך, ענק זענען מקורב צום צדיק; עס וואלט אייך נישט אינטערעסירט די אלע זאכן.

איך מוז אייך זאגן, ווען אייער מאן האט מיר געברענגט דעם בריוו נאס, דורכגעווייקט מיט טרערן - האב איך זיך דערשראקן, איך האב געטראכט 'עפעס גאר ביטער שטייט אינעם בריוו, אז עס איז געשריבן מיט אזויפיל טרערן'; נאכן עס ליינען און זען אז אלעס איז פיין, ענק אלע זענען געזונט, און די פראבלעם איז 'די שוועגערינס ארויף, די שוועגערינס אראפ, מען האט מיך יא גערופן, מען האט מיך נישט גערופן, מען דארף מיך יא, מען דארף מיך נישט' - האב איך זיך בארואיגט.

אז די שוועגערינס נעמען זיך צאם און מען האט אייך נישט גערופן - דאס איז נישט קיין צרה, אויף דעם וויינט מען נישט, אויף דעם איז גוט צו נעמען די כלל וואס מוהרא"ש לערנט אונז: "ווילסט מיך נישט? וויל איך דיך טויזנט מאל נישט"; כל זמן אייער מאן וויל אייך, אייער מאן לעבט מיט אייך און ער האט יראת שמים - זענט איר די גליקליכסטע פרוי וואס איז דא.

לאכט אייך גוט אויס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד מיין טייערער ... נרו יאיר

איך בין אוועק געפארן אויף פסח, איך בין געווען אין שטעטל קרית ברסלב, איך בין נישט אנגעקומען צו זען דיין בריוו ביז יעצט.

איך האב צער פון וואס דו ביסט אריבער, איך האף צום אייבערשטן דו וועסט זיך שנעל ערהוילן און צוריק קומען צו דיינע כוחות.

איך דערמאן זיך א מעשה וואס מוהרא"ש האט דערציילט, די זעלבע מעשה וואס האט דיר פאסירט אחרון של פסח האט פאסירט ביים הייליגן רבי נתן, עס איז אים אריין א ביין אין האלז, ער האט זיך דערשטיקט, שפעטער האט ער געזאגט: "ווען די ביין איז מיר געווען אין האלז האב איך נישט געקענט רעדן צום אייבערשטן, האב איך געקוקט צום אייבערשטן"; דאס לערנט אונז אז אין יעדע מצב דארף מען זיך ציען צום אייבערשטן, און אז מען קען נישט רעדן, מען איז דערשטיקט - זאל מען קוקן צום אייבערשטן, זיך ציען צו אים.

דאנק און לויב דעם אייבערשטן אז דו לעבסט און אז דו האלסט דא, אמת עס איז דיר צעשטערט געווארן דעם לעצטן טאג יום טוב, און ווי שטארק מען האט זיך געמוטשעט אין שפיטאל ביז מען האט ארויסגענומען דעם ביין, אבער דער רבי לערנט אונז צו קוקן אויף די חסדים, צו טראכטן 'עס וואלט געקענט זיין אסאך ערגער, און חסדי השם יתברך פאר די גרויסע ניסים'.

לכבוד די נס אז דו לעבסט זאלסטו זיך פארנעמען צו דאנקען יעדן טאג דעם אייבערשטן, זאגן "שכוח אייבערשטער" פאר די חסדים און ניסים וואס ער טוט מיט דיר שטענדיג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן

לכבוד ... נרו יאיר

עס איז מיט גרויס חסדים; קוק גוט וועסטו זען אז דער אייבערשטער איז זייער גוט צו דיר, אפילו מיט אלעס וואס דו גייסט אריבער - איז דא ניסים גלויים.

טראכט אריין וואס קומט דיר, לויט דיינע מעשים וכו'; דער רבי זאגט (לקוטי מוהר"ן חלק א', סימן קסה): "תְּקַבֵּל בְּאַהֲבָה כָּל הָרָעוֹת וְהַיִּסּוּרִין הַבָּאִים עָלֶיךָ", מען דארף אננעמען אלע שלעכטס און יסורים, "כִּי רָאוּי שֶׁתֵּדַע, שֶׁלְּפִי מַעֲשֶׂיךָ אַחַר כָּל הַיִּסּוּרִים וְהָרָעוֹת שֶׁיֵּשׁ לְךָ, עֲדַיִן הוּא מִתְנַהֵג עִמְּךָ בְּרַחֲמִים, כִּי הָיָה מַגִּיעַ לְךָ יוֹתֵר וְיוֹתֵר, חַס וְשָׁלוֹם, לְפִי מַעֲשֶׂיךָ", ווייל לויט דיינע מעשים פירט זיך דער אייבערשטער צו דיר מיט גרויס רחמנות, עס וואלט דיר געקומען אסאך מער שלעכטס חס ושלום, דער רבי טייטשט מיט דעם די פסוק (ויקרא יט, יח): "וְאָהַבְתָּ לְרֵעֲךָ", זאלסט ליב האבן די שלעכטס, "כָּמוֹךָ"; ווייל אזוי ווי דו ביסט - "אֲנִי ה'", פיר איך זיך מיט גרויס חסדים.

היינט נאכט וועט זיין די שיעור אין לעיקוואד, ביי אונז אין בית המדרש, איך וויל אויפלעבן די חבורה דארט. מען וועט דאס קענען מיטהאלטן אין אלע שולן; איך וויל זייער זאלסט קומען צום שיעור זיך מחדש זיין, זיך אויפפרישן מיט אמונה, תפילה, סדר דרך הלימוד וכו'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

מיין טייערער ... נרו יאיר

דאנק דעם אייבערשטן פאר די מתנות; פאר די טייערע ווייב וואס דו האסט באקומען און פאר דיין ליכטיג קינד. דאנקען דעם אייבערשטן איז שעשוע עולם הבא, אזוי ווי דער הייליגער רבי זאגט (לקוטי מוהר"ן חלק ב', סימן ב): "כִּי זֶה עִקָּר שַׁעֲשׁוּעַ עוֹלָם הַבָּא, לְהוֹדוֹת וּלְהַלֵּל לִשְׁמוֹ הַגָּדוֹל יִתְבָּרַךְ וּלְהַכִּיר אוֹתוֹ יִתְבָּרַךְ", די תענוג פון עולם הבא איז צו דאנקען דעם אייבערשטן און אים צו לויבן, וויסן אז אלעס איז ער און ער איז אלעס, "שֶׁעַל יְדֵי זֶה סְמוּכִים וּקְרוֹבִים אֵלָיו יִתְבָּרַךְ", ווי מער מען דאנקט דעם אייבערשטן איז מען נענטער צו אים, "כִּי כָּל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווייל ווי מער מען ווייסט אז אלעס איז בלויז דער אייבערשטער אליין, "סְמוּכִים אֵלָיו בְּיוֹתֵר", איז מען נענטער צו אים.

אויך זאלסטו פרייליך מאכן דיין ווייב, איר געבן אסאך גוטע ווערטער, און גלייב באמונה שלימה אז דער אייבערשטער האט דיר געגעבן דיין ווייב ווייל דאס איז א חלק פון דיין נשמה, און דיקא דורך איר וועסטו אנקומען צו שיינע זאכן, צו שלימות הנפש. אזוי ווי דער צדיק רבי חיים ויטאל זכותו יגן עלינו זאגט (עיין ספר שערי קדושה, חלק א), עס איז נישטא קיין אנדערע וועג ווי אזוי א מענטש קען זיך אויסארבעטן זיינע מידות, נאר דורך לעבן בשלום מיט די ווייב, ווייל דער אייבערשטער געבט פאר יעדן איינעם א ווייב וואס איז די בעסטע פאר אים צו קענען ווערן אויסגעארבעט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תזריע, ב' ניסן, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך האב ערהאלטן דיין בריוו.

אויב עס האלט שוין ביי חילול שבת, דיין ווייב נוצט איר טעלעפאן שבת קודש, רחמנא לצלן - איז שוין גאר ביטער, דארפסטו טון אלעס אין דער וועלט צו ראטעווען דיין שטוב.

זאלסט נאר געבן גוטע ווערטער פאר איר, ווייל באמת איז זי א גוטע נשמה נאר די קליפות ווילן איר פארכאפן; די טומאה פון א סמארטפאון איז אזוי שרעקליך, עס מאכט חרוב אלעס.

זאלסטו שבת זיין זייער זייער פרייליך, זאלסט איר אויפלעבן און אויסרימען און נישט נאכזוכן וכו', נאר זיין פרייליך; מיט שמחה וועסטו פארטרייבן די קליפות פון דיין שטוב.

גיי יעדן טאג התבודדות אין פעלד הינטער דיין שטוב און בעט דעם אייבערשטן די ווערטער: "הייליגער באשעפער, לייג אריין א רוח טהרה אין מיין ווייב, זי זאל אוועק ווארפן די מאוויס, זי זאל אוועק ווארפן די סמארטפאון, זי זאל ליב האבן אידישקייט, זי זאל היטן די תורה, שבת און אלעס.

הייליגער באשעפער זיי מיר מוחל אויף אלע מיינע עבירות, איך טו תשובה, איך וויל זיין ערליך, איך וויל זיין הייליג, איך גיי שוין זיין גוט, נעם אן מיין תשובה און געב מיר ערליכע דורות, איך און מיין ווייב און קינדער זאלן אלע גיין אין די תורה וועג".

אויך זאלסטו דאנקען דעם אייבערשטן פאר אלע חסדים וואס ער טוט מיט דיר - וועסטו שפירן מעין עולם הבא, ווייל נאר אז מען דאנקט דעם אייבערשטן קען מען שפירן א טעם אין לעבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תזריע, ב' ניסן, שנת תשפ"ד לפרט קטן

לכבוד מיין טייערער ... נרו יאיר

פסח ווען דו זאגסט הלל זאלסטו זאגן אויפן קול, דורכדעם וועסטו קומען צו ליב האבן דעם אייבערשטן. אזוי זאגט דער רבי (ספר המדות אות אהבה, סימן ח): "עַל יְדֵי אֲמִירַת הַלֵּל בְּקוֹל גָּדוֹל", דורך זאגן זייער הויך הלל, "זוֹכִים", איז מען זוכה, "לְאַהֲבַת הַשֵּׁם יִתְבָּרַךְ".

אויך איז מען זוכה דורך זאגן הלל צו ווערן אפגעהיטן פון אלע פיינט. אזוי זאגט דער רבי (שם אות מריבה, סימן ח): "עַל יְדֵי קְרִיאַת הַלֵּל", דורך זאגן הלל, "יוֹשִׁיעַ לְךָ הַקָּדוֹשׁ בָּרוּךְ הוּא מֵאוֹיְבֶיךָ", וועט דער אייבערשטער דיר העלפן פון די פיינט; ווייל דורך זאגן הלל ווערט מען צוגעקלעבט צום אייבערשטן, קען שוין נישט געשען קיין שלעכטס.

ביים סדר נאכט זאלסטו נישט אויפהערן דאנקען אויף וואס דער אייבערשטער האט געטון מיט דיר, "מקימי מעפר דל", ער האט מיך אויפגעהויבן פון בלאטע, "מאשפות ירים אביון", וואו בין איך געווען? וואו בין איך געלעגן? אין די מיסט, אין די טומאה, "להושיבי עם נדיבים", היינט בין איך זוכה צו זיין ביים רבי'ן, זיצן אינאיינעם מיט די צדיקים, "ההפכי הצור", מיין פארשטיינערטע הארץ האט דער אייבערשטער איבערגעדרייט "אגם מים" – צו תורה ותפילה.

אשרינו אשרינו.

א פרייליכן יום טוב

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך בין זייער פרייליך אז עס איז דא גוטע נייעס ביי ענק, דער אייבערשטער זאל העלפן איר זאלט האבן כח און אלעס זאל זיין בנקל ובנחת.

דאנקט דעם אייבערשטן אויף די חסדים וואס ער טוט מיט אייך, דאנקט און לויבט דעם אייבערשטן אז איר האט חתונה געהאט און אז עס איז דא גוטע נייעס; דאס איז די בעסטע סגולה, די בעסטע שמירה - אז אלעס זאל אריבער גיין בנקל ובנחת.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ה' פרשת ויקרא, י"א אדר ב', שנת תשפ"ד לפרט קטן

מרת ... תחי'

דאנקט און לויבט דעם אייבערשטן פאר די מתנה וואס ער האט אייך געגעבן, א מאן א ירא שמים, א תלמיד חכם; ער זיצט טעג און נעכט און לערנט תורה, איר דארפט דאנקען און לויבן דעם אייבערשטן פאר דעם.

אויך פאר אייער ליכטיג קינד; אזויפיל מענטשן ווארטן אויף צו באקומען א קינד, דארפט איר נאר לויבן און דאנקען דעם אייבערשטן.

לויבן דעם אייבערשטן שטארקט די נערווען און די מח; ווי מער מען זאגט "שכוח אייבערשטער", ווי מער מען זאגט און מען זינגט: "ברוך השם" – אלץ מער ווערט מען רואיג, און די נערווען ווערט שטארק, מען קען אסאך דערהייבן און פארנעמען.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

שטיי אויף פארטאגס, גיס אפ נעגל וואסער, לויף אין מקוה און זאג דעם "יום תהילים", דאס וועט זיין א סגולה פאר דיר פאר קינדער. דער הייליגער רבי זאגט (ספר המידות אות בנים, סימן סה): "הַשִּׁירוֹת וְהַתִּשְׁבָּחוֹת, שֶׁאוֹמְרִין קדֶם אוֹר הַיּוֹם, הוּא סְגֻלָּה לְבָנִים" , זינגען און לויבן צום אייבערשטן פארטאגס - איז א סגולה פאר קינדער, "גַּם לְאִשָּׁה שֶׁנֶּחְסַר חֲלָבָהּ", אויך איז דאס א סגולה פאר א פרוי וואס האט ווייניג מילך, "גַּם לְאִשָּׁה רָעָה שֶׁהִיא כַּעֲסָנִית", אויך איז דאס א סגולה פאר א פרוי וואס איז שלעכט און כעס'יג.

פלעכט אריין דיינע אייגענע תפילות צווישן די פסוקים, לויב אין דאנק אין דיין שפראך; אידיש, ענגליש, רוסיש, ספאניש, נישט קיין חילוק וואס פאר א שפראך; זאג: "שכוח אייבערשטער פאר די חסדים", הויב אן זוכן, זוך גוט וועסטו זען עס איז מיט גרויסע חסדים, דער אייבערשטער איז נאר גוטס; דאס וועט עפענען די הימלען פאר דיר פאר זרע של קיימא.

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן

לכבוד מיין טייערער ... נרו יאיר, וזוגתו תחי'

ענק האבן שוין געטון אזויפיל סגולות צו געהאלפן ווערן, ענק האבן שוין געמאכט אזויפיל גוטע קבלות און ענק פרעגן 'וואס נאך קענען מיר טון אז די ישועה זאל קומען?'

איין סגולה בלייבט ענק איבער, וואס דאס וועט ענק ברענגען די ישועה, די סגולה פון "תודה והודאה", דאנקען און לויבן.

ביידע אינאיינעם זאלן ענק יעדן טאג אוועקגעבן אביסל צייט, אפאר מינוט, און אויסלויבן דעם אייבערשטן פאר די חסדים וואס ער טוט מיט ענק. רעכנט אויס די חסדים און לויבט אים אויף דעם, זאגט: "שכוח אייבערשטער איך בין געזונט, מיין ווייב איז געזונט", און זי זאגט: "שכוח אייבערשטער איך בין געזונט, מיין מאן איז געזונט", און אזוי ווייטער; דאס עפנט אויף די טויערן פאר ניסים גלוים.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

מרת ... תחי'

א גרויסן דאנק פאר אלעס וואס אייער מאן נרו יאיר טוט פאר אונזער קהילה, ער העלפט מיר זייער געטריי, ער האט אראפגענומען פון מיר די עול פון צאלן רענט פאר אלע אונזערע שולן, תלמוד תורה'ס וכו' וכו'. אויך האט ער געהאלפן מיטן שרייבן א ספר תורה פאר די קהילה לזכרון פון מוהרא"ש זכותו יגן עלינו, ער האט געמאכט די הכנסת ספר תורה אזוי שיין, מיט אזויפיל הארץ. אויך העלפט ער מיט די גבאות אין בית המדרש אין וויליאמסבורג, אלע האבן הנאה, אלע זענען צופרידן.

ועל כולם לערנט ער און ער דאווענט, ווען ער האט איבריגע צייט זיצט ער מיט זיינע ספרים און לערנט שיעורים כסדרן.

בלייבט איבער איין זאך, נאר דאנקען און לויבן דעם אייבערשטן פאר אלע ניסים וחסדים.

זאגט יעדן טאג די תיקון הכללי, אז מען זאגט די תיקון הכללי – איז דאס אזוי ווי מען זאגט אויס גאנץ ספר תהילים.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

לכבוד מיין טייערער ... נרו יאיר

דאנק און לויב דעם אייבערשטן פאר די שיינע מתנה וואס ער האט דיר געגעבן, אן 'אשת חיל', א וואוילע ערליכע פרוי; האלט חשוב און טייער די מתנה, געב כסדר גוטע ווערטער, קארג נישט אויף גוטע ווערטער, זיי קלוג און פארגין איר דאס בעסטע און שענסטע.

זיי שטארק נישט אריינצוברענגען אין דיין שטוב א טעלעפאן, טעבלעט, קאמפיוטער; האלט דיין שטוב ריין און הייליג.

זיי עוסק אין צדקה, גיי נאך געלט פאר די ישיבה, מעט גם כן טוב, אביסל איז אויך גוט, אבער דאס ביסל זאל זיין באופן קבוע, טאג נאך טאג.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

לכבוד מיין טייערער ... נרו יאיר, בארא פארק

וויפיל ביסטו שולדיג דעם אייבערשטן פאר די גרויסע חסדים וואס ער טוט מיט דיר; האסט חתונה געהאט, האסט א טייערע ווייב, א מתנה פונעם אייבערשטן, און ענק ווארטן א שמחה; דער אייבערשטער זאל העלפן עס זאל זיין בנקל ובנחת, מיט גרויס שמחה.

דאנק און לויב דעם אייבערשטן, זאג פארן באשעפער יעדן טאג: "שכוח אייבערשטער פאר מיין טייערע ווייב, שכח אייבערשטער אז מיר ווארטן א שמחה, שכוח אייבערשטער מיר זענען געזונט, שכוח אייבערשטער מיר זענען מקורב צום רבי'ן וואס דערמאנט און וועקט אויף צו געדענקען פון דיר".

זאג יעדן טאג דעם "יום תהילים", און זיי שטארק אין דאווענען די דריי תפילות מיט מנין.

בעזרת ה' יתברך - יום ב' פרשת תרומה, שובבי"ם, ג' אדר א', שנת תשפ"ד לפרט קטן

טייערער ... נרו יאיר

איך האב ערהאלטן דיין בריוו.

פרעג דעם דאקטער וואס ער איז מציע, וואס איז די בעסטע וועג פון נעמען די מעדעצין, און וואס דער דאקטער לייגט פאר - זאלן ענק טון, און זיי מחזק דיין ווייב תחי' זי זאל זיך איבערגעבן צום אייבערשטן און זיין שטארק מיט אמונה אז עס וועט זיין גאר שנעל די ישועה.

ווען מען בעט דעם אייבערשטן איז וויכטיג אויך צו דאנקען, מען מוז אנכאפן די שווערד פון תפילה צום פינטל, נישט בייגן - נישט רעכטס און נישט לינקס. אזוי ווי דער רבי זאגט (לקוטי מוהר"ן חלק א, סימן ב) אז מען מוז סיי דאנקען און סיי בעטן.

עס איז כדאי זאלסט פארן קיין יבנאל צום ציון פון מוהרא"ש זכותו יגן עלינו און דארט מתפלל זיין, מוהרא"ש האט געשריבן אין זיין צוואה (צוואת מוהרא"ש, אות ה) אז מען וועט קענען פועל'ן אלע סארט ישועות ביי זיין ציון.

שטארק זיך און שטארק דיין ווייב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת יתרו, שובבי"ם, י"ט שבט, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

שטארק זיך מיט אמונה, דער אייבערשטער מאכט נאר גוטס, עס איז זיכער נאר לטובה; מיר ווייסן נישט, מיר פארשטייען נישט און מיר קענען נישט פארשטיין פארוואס און פארווען, אבער מיר ווייסן אז דער אייבערשטער מאכט נאר גוטס.

דאנקט און לויבט דעם אייבערשטן פאר דיינע ליכטיגע קינדער, און שטארק דיין ווייב, זי איז אסאך מער צעבראכן וכו', פאר דיר איז דאס אויך זייער ווייטאגליך אבער פאר איר איז דאס נאך מער ווייטאגליך; זארגט נישט, איר וועט נאך האבן קינדער.

דורך דאנקען וועלן ענק זוכה זיין צו קינדער און קינד'ס קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד מיינע טייערע ... שיחיו

ענק האבן קוים חתונה געהאט און שוין זענט איר באזארגט אויף קינדער; וואס דארפט איר זארגן? זארגן וועט אייך נישט העלפן, זארגן מאכט שוואך און אלט; אין ברסלב האט מען נישט אנגענומען די סגולה פון זארגן, אין ברסלב איז דא די סגולה פון שמחה, פון טאנצן, פאטשן און זינגען.

איך בעט ענק מיינע טייערע, באליבט ווי קינדער – זארגט נישט, מאכט אייך נישט משוגע מיט זארגן, זייט פרייליך, דאנקט און לויבט דעם אייבערשטן, געבט אוועק יעדן טאג א צייט פאר דאנקען און לויבן דעם אייבערשטן, און אויך אביסל צייט אויף טאנצן, און איר וועט זען גרויסע ניסים.

בעזרת ה' יתברך - יום ד' פרשת שמות, שובבי"ם, כ"ב טבת, שנת תשפ"ד לפרט קטן

לכבוד החתן ... נרו יאיר, בני ברק

איך האב ערהאלטן דיין בריוו.

דאנק און לויב דעם אייבערשטן פאר די גרויסע חסדים וואס ער טוט מיט דיר, האסט זוכה געווען צו טרעפן א טייערע כלה פון א טייערע משפחה, דער אייבערשטער זאל העלפן זאלסט זוכה זיין צו אויפשטעלן א בית נאמן בישראל, א ליכטיגע שטוב מיט ליכטיגע דורות.

בנוגע וואו צו לערנען הדרכה פאר די חתונה; עס איז גוט זאלסט זיך ווענדן צו האברך משה שמואל נרו יאיר, דער מגיד שיעור אין אונזער ישיבה אין ירושלים, ער זאל דיך מדריך זיין מיט די הלכות צו דיין חתונה; ער וועט דיך מדריך זיין אזוי ווי מיר האבן מקבל געווען פון מוהרא"ש זכותו יגן עלינו.

גיי הפצה, פארגין פאר נאך בחורים און נאך אברכים די חיים טובים וואס דער רבי געבט אונז.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת ויגש, עשרה בטבת, שנת תשפ"ד לפרט קטן

לכבוד ... נרו יאיר

דיין ווייב דערציילט אז איר לעבן איז איר געווארן א גן עדן לעבן זייט דו האסט אויפגעגעבן דיין סמארט טעלעפאן; זי זאגט זי האט שיין געלעבט מיט דיר ביז אהער אויך, אבער יעצט איז איר ממש געשמאק אין שטוב.

אויך דערציילט זי פון דיין עבודות השם; ווי דו שטייסט אויף יעדע נאכט זאגן תיקון חצות און ווי פלייסיג דו לערנסט, זי רעדט פון דיר זייער שיין. עס דערמאנט מיר וואס איך האב געהערט פון מוהרא"ש, איך בין געווען אין צימער ביי מוהרא"ש מיט נאך איינעם, יענער האט דערציילט פאר מוהרא"ש אז זיין ווייב זאגט פאר אלעמען אז איר מאן איז גוט און ערליך, זאגט אים מוהרא"ש: "חכמינו זכרונם לברכה זאגן דאך (מדרש משלי ה, יח) 'אשרי אדם שאשתו מעידתו', וואויל איז דעם וואס די ווייב זאגט עדות, 'מיין מאן איז אן ערליכער איד'"; די ווייב זעט דאך דעם מענטש אין אלע צייטן.

שטארק זיך מיט דיין עבודות השם, לייג צו נאך א וויכטיגע זאך אין דיין עבודות השם, לייג צו יעדן טאג טאנצן, קענסט דאס מאכן פריוואט ביי דיר אין שטוב; צינד אן הויך מוזיק און טאנץ: 'שכוח באשעפער אז איך בין א איד'.

א גוט שבת.

בעזרת ה' יתברך - יום ד' פרשת ויחי, ט"ו טבת, שנת תשפ"ד לפרט קטן

לכבוד ... נרו יאיר

וואס איז מיט דיר? וואס איז די שאלה בכלל?! אז דער אייבערשטער געבט דיר א מתנה - דארפסטו טאנצן פאר שמחה, אז דו ביסט געוואויר געווארן אז דיין ווייב ווארט למזל טוב און עס איז נישט געווען מיט ענקער הסכמה - דארפט איר טאנצן פאר שמחה; דאס ווייסטו וואס חכמינו זכרונם לברכה זאגן (נדה לא.): "שלשה שותפין יש באדם, הקדוש ברוך הוא ואביו ואמו", קומט אויס אז די חדשים וואס מען ווארט איז מען אין א שותפות מיטן אייבערשטן, און אז ענק האבן נישט געוואלט גיין מיט א שותפות מיטן אייבערשטן און דער אייבערשטער האט ענק בעל כרחך אריינגעשלעפט אין א שותפות - דארפן ענק טאנצן פאר שמחה און נישט אויפהערן דאנקען און לויבן דעם אייבערשטן.

דאס ווייסטו אודאי וואס דער הייליגער זוהר זאגט (פרשות שמות, דף ג): "תְּלָתָא אִינּוּן דְּדַחְיָין שְׁכִינְתָּא מֵעָלְמָא, וְגַרְמִין, דְּדִיוּרֵיהּ דְּקוּדְשָׁא בְּרִיךְ הוּא לָא הֲוֵי בְּעָלְמָא, וּבְנִי נָשָׁא צַוְוחִין וְלָא אִשְׁתְּמַע קַלֵּיהוֹן", עס איז דא א זינד וואס דאס מאכט אלע צרות אויף די וועלט און עס האלט צוריק אלע תפילות, און אפילו מען שרייט און מען וויינט, מען פאסט און מען מאכט אלע סגולות - איז דער זינד אזוי הארב אז דאס ברענגט אלע צרות און מען קען נישט מבטל זיין די צרות; אויב חס ושלום מען ציט זיך ארויס פון די שותפות אינמיטן די חדשים השם ישמרינו. ליידער ביי די אומות העולם, ביי די ליבעראלע, זיי זענען אזוי געמיין אז רצח'ענען און הרג'ענען רחמנא לצלן איז ביי זיי מותר, און זיי זענען גאר וואס שטעלן זיך ארויס צו זיין די העפליכע, השם ישמרינו, זאלסטו חס ושלום נישט טראכטן פאר איין רגע עפעס צו טון.

דאנק און לויב דעם אייבערשטן אז דו און דיין ווייב זענען כביכול שותפים מיטן אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויחי, ט"ו טבת, שנת תשפ"ד לפרט קטן

מרת ... תחי'

דאנקט און לויבט דעם אייבערשטן פאר אלע חסדים, איר האט א טייערער ערליכער מאן מיט ליכטיגע קינדער, איר זענט געזונט, אייער משפחה איז געזונט, דער אייבערשטער איז אזוי גוט צו אייך; זאלט איר אים נישט אויפהערן דאנקען.

א פרוי וואס איז גרייט פאר איר מאן און טוט די ווילן פונעם מאן, זוכט נישט זיך ארויסצודרייען – קען מען זיך נישט פארשטעלן איר שכר, מען קען זיך נישט פארשטעלן וואס פאר א תענוג און נחת רוח דער אייבערשטער האט, די שכינה הקדושה קומט אין שטוב און מען האט אלע ברכות.