בעזרת ה' יתברך - ערב שבת קודש פרשת יתרו, י"ט שבט, שנת תשפ"ו לפרט קטן
מיין טייערער ... נרו יאיר, קרית ברסלב
איך וויל דיר זייער בעטן דו זאלסט זיך פירן מיט דרך ארץ צו דיינע מגידי שיעורים, און צום מנהל, און צו יעדער עלטערער מענטש, און אז דו האסט זיך פאררעדט פארן מנהל, האסט אים געזאגט א נישט שיינע ווארט, א ווארט מיט זלזול – דארפסטו אים איבערבעטן; געדענק אז דער הייליגער רבי וואס קען יעדן איינעם פאררעכטן, ער קען יעדן העלפן – האט געזאגט: "איך קען יעדן איינעם פאררעכטן, איך קען יעדן מתקן זיין, אויסער א מחוצף, אן עזות פנים", און די הייליגע חכמים זכרונם לברכה זאגן (אבות ה כ): "עז פנים לגיהנום"; אזוי געפערליך איז דאס.
איך וויל זייער דיין הצלחה, איך וויל דו זאלסט ממשיך זיין אין ישיבה, און נאר אז דו וועסט איבערבעטן דעם מנהל און איבערבעטן דעם באשעפער, תשובה טון אויף די ווארט וואס דו האסט געזאגט פארן מנהל וואס איז זיך מוסר נפש פאר די ישיבה שוין פאר אכצן יאר; אברהם משה איז פון די ערשטע טאג וואס די ישיבה האט זיך געעפנט – זיך מוסר נפש פאר די ישיבה און פאר די קהילה, איז ווי קען זיין אזא זאך אז א יונגער בחור זאל רעדן מיט חוצפה, מיט עזות? אים זאגן ווערטער וואס מען זאגט אויף מסוכנ'דיגע מענטשן השם ישמרינו?!
די אלע בחורים וואס זאגן: "איך פאלג נאר וואס דער ראש ישיבה זאגט" – די מיינען עס נישט אמת'דיג, די ווילן נישט פאלגן, די ווילן טון וואס זיי ווילן, די ווילן מיר נישט העלפן. איך האב די פראבלעם סיי אין ישיבה און סיי אין די קהילה, נאכדעם וואס מען האט ממנה געווען גבאים, מנהלים, מלמדים וכו' וכו, און אנשטאט העלפן בויען די שיינע קהילה, טון וואס די גבאים זאגן, פאלגן די מנהלים און זיי מכבד זיין, ניצט מען די נאמען פון דער ראש ישיבה, מען זאגט "איך פאלג נאר דער ראש ישיבה", "איך טו נאר אויב דער ראש ישיבה וועט מיר זאגן", און מען מאכט שווערער די ארבעט.
איך וויל דיין גוטס, איך האב דיך ליב, איך האב ליב דיינע עלטערן, איך וויל דיר נישט דארפן ארויסווארפן פון ישיבה, איך וויל דיך א חתן מאכן, איך וויל דיך באגלייטן ווייטער דיין גאנצע לעבן, אבער נאר אז דו וועסט איינבייגן דיין קאפ פאר עלטערע, דו וועסט האבן הכנעה פאר די מגידי שיעורים, הרב ישראל יוסף שניצלער שליט"א, און פאר הרב אלחנן חיים רוטה שליט"א, און פאר הרב יצחק פעלדמאן שליט"א, און זיכער פארן מנהל אברהם משה, און אזוי אויך פאר יעדן עלטערן איד.
איך האף דו וועסט אננעמען מיינע ווערטער וואס איך שרייב דיר, איך האף דו וועסט קענען איינבייגן דיין קאפ; אז דו וועסט יעצט איינבייגן דיין קאפ וועסטו קענען האבן שלום בית, און זיך אויסקומען אין לעבן מיט אלעמען, און אז עס וועט דיר נישט פאסטן זיך איבער צו בעטן, איז וואס וועט זיין נאך דיין חתונה? עס וועט דיר נישט מעגליך זיין צו לעבן מיט א ווייב, איך ווייס וואס איך רעד, איך האב געזען אין לעבן קלוגע געלונגענע מענטשן וואס האבן נישט געקענט איבערבעטן, זיי זענען געבליבן מיט די נישט גוטע מדה פון קינווייז אן, און זיי קענען זיך נישט קיין עצה געבן אין לעבן.
פאלג מיך, איך וויל נאר דיין גוטס.