בעזרת ה' יתברך
יום ה' פרשת בהעלותך, ט"ז סיון, שנת תשפ"א לפרט קטן
לכבוד מיין טייערער ... נרו יאיר, קרית ברסלב
מוהרא"ש ברענגט פון הצדיק רבי אברהם בן רבי נחמן זכרונו לברכה, ער האט געזאגט: "משיח וועט מאכן א דרך כבושה, אזוי ווי יעדער איד לייגט תפילין יעדן טאג - וועט יעדער איינער גיין התבודדות, עס וועט זיין א זאך וואס יעדער וועט טון".
וואס דארף מען ווארטן ביז משיח וועט קומען? מיר קענען עס שוין יעצט טון; זאלסטו זיך צוגעוואוינען יעדן טאג, חק ולא יעבר, צו גיין אביסל שפאצירן אין דיין פעלד. בעט דעם אייבערשטן אז דו מיט דיינע דורות זאלן בלייבן צוגעבינדן צום רבי'ן, אלע זאלן לעבן מיט'ן רבי'ן, טון דעם רבינ'ס עצות.
איך וועל אזוי סאך רעדן צו די איינוואוינער פון שטעטל פון התבודדות - ביז איר וועט נישט האבן קיין אנדערע ברירה, איר אלע וועלן גיין התבודדות, די עלטערן מיט די קינדער; אלע וועלן גיין זיך מתבודד זיין, עס וועט זיך שפירן אין שטעטל א לופט פון גן עדן.