בריוון פונעם ראש ישיבה שליט"א

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

מיין ליבער ... נרו יאיר

איך האב זייער הנאה געהאט צו זען די פאר טעג וואס דו ביסט איינגעשטאנען ביי מיר אין שטוב - ווי די פירסט זיך אזוי איידל, פול מיט יראת שמים, איך בין זייער נתפעל פון דיר און איך האף צום אייבערשטן אז דו וועסט אויסוואקסן א גרויסער צדיק, דו וועסט בלייבן מיט די תמימות.

יעצט קומט 'דער הייליגער יום טוב שבועות', איך וויל דיך מחזק זיין אז שבועות ביים דאווענען זאלסטו זיך אויסבעטן פאר אלעס וואס דו דארפסט, יום טוב שבועות איז א צייט וואס מען קען פועל'ן ישועות און רפואות, און אזוי ווי ווען די אידן זענען געקומען צו מתן תורה, זאגן די הייליגע חכמים (תנחומא יתרו, ח), אז אלע קראנקע זענען אויסגעהיילט געווארן און אלע בלינדע האבן אנגעהויבן זען, און די טויבע האבן אנגעהויבן הערן, און אזוי ווייטער, אזוי איז יעדע יאר ווען עס קומט דער הייליגער יום טוב שבועות און מען איז נאכאמאל מקבל די תורה, קען מען זוכה זיין צו אלע ישועות און רפואות, מען דארף נאר שטארק גלייבן אין דעם.

ביי די ברכה פון 'אהבה רבה' זאלסטו זיך גוט אויסוויינען צום אייבערשטן, אז דו זאלסט זוכה זיין צו לערנען תורה און צו פארשטיין די תורה, ווייל אפילו מען איז ווייט פון לערנען תורה און פון פארשטיין תורה, ווער רעדט נאך פון פארשטיין די סודות התורה, דורך בעטן דעם אייבערשטן קען מען דאס פועל'ן אינעם הייליגן יום טוב שבועות. אזוי האט דער צדיק רבי ברוכ'ל פון מעזיבוז געזאגט: "ראש השנה איז מען דן די פרנסה פונעם מענטש, א בילקע מער א בילקע ווייניגער, און יום טוב שבועות איז מען דן וויפיל מען וועט זוכה זיין צו פארשטיין די הייליגע תורה", זאלסטו זיך אויסבעטן ביים אייבערשטן דו זאלסט זוכה זיין צו האבן ליכטיגע אויגן אין די תורה, זאג שטייט די ווערטער פון 'אהבה רבה', זאג יעדע ווארט מיט כוונה. ווייל דער הייליגער בעל שם טוב זכותו יגן עלינו האט מגלה געווען, ער האט געזאגט אז ער האט געהערט אין מתיבתא דרקיעא אז די גלות ציט זיך אזוי לאנג ווייל מען כאפט אפ די ברכה פון 'אהבה רבה', מען זאגט עס נישט מיט כוונה; ווייל די תפילה פון אהבה רבה איז זייער א וויכטיגע תפילה, אז מען זאל זוכה זיין צו האבן הייליגע אויגן אין די תורה, מען זאל זוכה זיין צו פארשטיין די טיפע הויכע סודות וואס ליגט באהאלטן אין די ווערטער פון די תורה.

און ווען מען זאגט הלל, זאלסטו זאגן הלל מיט א געשמאק, אויפן קול. דער הייליגער רבי זאגט (ספר המדות אות אהבה, סימן ח): "עַל יְדֵי אֲמִירַת הַלֵּל בְּקוֹל גָּדוֹל, זוֹכִים לְאַהֲבַת הַשֵּׁם יִתְבָּרַךְ", דורך זאגן הלל אויפן קול איז מען זוכה ליב צו האבן דעם אייבערשטן. נאך זאגט דער רבי (שם אות מריבה, סימן ג): "עַל יְדֵי קְרִיאַת הַלֵּל, יוֹשִׁיעַ לְךָ הַקָּדוֹשׁ בָּרוּךְ הוּא מֵאוֹיְבֶיךָ", דורך זינגען הלל וועט דער אייבערשטער דיר העלפן פון דיינע פיינט, דאס מיינט מען די סטרא אחרא וואס זיי זענען די גרעסטע פיינט, זיי ווילן אוועקרייסן דעם איד פון די תורה, פון די קדושה, פון די אמונה, און דורך לויבן און דאנקען דעם אייבערשטן - ווערט מען פון זיי געראטעוועט.

געב א גרוס פאר דיינע טייערע עלטערן, נישט יעדער האט אזעלכע טייערע עלטערן וואס דו האסט, דאנק דעם אייבערשטן יעדן טאג אז דו האסט אזעלכע טייערע טאטע מאמע.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב זייער הנאה צו הערן פון דיין מגיד שיעור ר' משה שמואל נרו יאיר אז דו העלפסט אין ישיבה מיט וואס מען דארף העלפן, עס איז זייער א גרויסע זכות צו העלפן סיי אין ישיבה, סיי אין בית המדרש, ספעציעל ביים הייליגן רבינ'ס ישיבה און בית המדרש, דעמאלט איז דאס גאר א גרויסע זכות, אז מען איז זוכה צו משמש זיין דעם רבי'ן, די זכות איז גאר גרויס.

שטארק זיך, יעצט אין די זומער טעג קען מען זייער מצליח זיין אין עבודת השם, עס איז א גוטע צייט זיך צו באנייען, ווייל די גאנצע בריאה טוט זיך יעצט באנייען, אלע ביימער, אלע גראזן הייבן אן צו שפראצן; נאכן זיין א גאנץ ווינטער טויט, נאכן זיין א גאנץ ווינטער טריקן - הייבן אלע אן מיט א פרישקייט ארויסצוגעבן שיינע פרוכט און שיינע בלעטלעך; איז דאס א צייט פאר אונז אלע זיך צו אויפפרישן, זיך באנייען צו דינען דעם אייבערשטן. דערפאר בעט איך דיר טייערער ליבער ברודער, יעצט אין די זומער טעג זאלסטו זיך באנייען מיט תפילה והתבודדות, טראכט נישט אויף צוריק, טראכט נישט פון די פריערדיגע זמן, פון די ווינטער זמן, קוק נישט אויף צוריק, ווייל דאס צוריק קוקן לאזט נישט דעם מענטש מצליח זיין, און אזוי ווי אלע ביימער און אלע פעלדער הייבן אן מיט א פרישקייט צו וואקסן, צו שפראצן, ארויס צו געבן די גוטע פרוכט און די שיינע בלומלעך - אזוי אויך זאלסטו אנהייבן מיט א נייע התחלה דינען דעם אייבערשטן; מאך זיך א קביעות יעדן טאג צו שמועסן און אויסרעדן דיין הארץ צום אייבערשטן, און אז דו האסט א פעלד - זאלסטו גיין א שפאציר אין פעלד, זיי זיך דארט מתבודד, ווייל עס איז אזוי געשמאק זיך צו מתבודד זיין צווישן די ביימער און גראז, דער הייליגער רבי זאגט (שיחות הר"ן, סימן קסג), ווי געשמאק איז צו גיין צווישן די גראז הערן ווי זיי זינגען שירות ותשבחות צום אייבערשטן, יעדע גראז זינגט א ניגון צום אייבערשטן אן קיין פניות, אן קיין מחשבות זרות, ווי גוט און ווי שיין איז צו זיין צווישן זיי; און אויך אז מען האט נישט קיין פעלד קען מען גיין א שפאציר אין א שטילע גאס און דארט שמועסן מיטן אייבערשטן, אים דערציילן ווי שטארק מען וויל זיין גוט און ווי מען האלט אין איין צוריק פאלן, זיך אויסגיסן דאס הארץ פארן אייבערשטן, אזוי זאלסטו טון יעדן טאג ביז דו וועסט זוכה זיין נאנט צו ווערן צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

מרת ... תחי'

פון יעדע פראבלעם איז דא א וועג ארויס, נישטא קיין צרה וואס מען קען נישט ארויסגיין פון דעם; אז ענקער שלום בית איז צעפאלן, עס איז שוין נישטא די אמאליגע ליבשאפט וכו', די וועג ווי אזוי ענק רעדן איז נישט ווי אמאל, מען טוט זיך וויי, מען שרייט וכו'; אויך פון דעם קען מען ארויסגיין.

נעכטן ל"ג בעומר האבן מיר געלערנט דעם הייליגן זוהר (תקוני זוהר תקון ע, דף קלד.), רבי אלעזר פרעגט זיין טאטע: "אַבָּא", טאטע, וואס איז די עצה מיט אן "אִתְּתָא בִּישָׁא"? "אָמַר לֵיהּ", האט רבי שמעון בר יוחאי געזאגט: "בְּרִי", מיין קינד, "שִׁנּוּי מַעֲשֶׂה", מען זאל תשובה טון; אז מען טוט תשובה, מען פאררעכט, מען הייבט אן שיין רעדן, מען זוכט דאס גוטס איינער אין צווייטן – ווערט אלעס גוט.

דערפאר, אז ענק וועלן רעדן שיין, ווייך, וועט צוריק ווערן ענקער שלום בית מער שענער ווי אמאל, איר פון אייער זייט זאלט נישט שרייען אויף אייער מאן, רעדט שיין; און אז אייער מאן טוט אייך וויי, ער זאגט אייך נישט שיינע ווערטער, זאלט איר אים שיינערהייט זאגן ער זאל רעדן שיין, ווייל איר ווערט וויי געטון.

אינדערפרי ווען איר זאגט ברכות השחר, קריאת שמע, אני מאמין, זאלט איר צולייגן א קליינע תפילה, בעטס: "הייליגער באשעפער, העלף מיר איך זאל רעדן שיין צו מיין מאן, איך זאל נישט שרייבן אויף אים, איך זאל אים נישט צעדרוקן, איך זאל גארנישט נעמען פערזענליך.

הייליגער באשעפער העלף מיר, איך הער נישט אויף צו שרייען, געב מיר שטארקע נערווען, געב מיר שטארקע כוחות אז איך זאל נישט ווערן פארלוירן ווען זאכן גייען אנדערש ווי איך וויל, איך זאל נישט נעמען זאכן צום הארצן, און אז מיין מאן ענטפערט נישט די טעלעפאן ווען איך רוף אים – זאל איך נישט אנהייבן שרייען, בלאזן, סטראשען וכו'.

אנא ה', איך בעט דיר אייבערשטער געב מיר א שטארקע אמונה, איך זאל שטענדיג געדענקען פון דיר, אז דו פירסט אלעס, דו מאכסט אלעס, נישטא קיין טבע, נישטא קיין פאסירונג, אלעס ביסטו, און דו ביסט אלעס, אמן".

מוהרא"ש האט זייער אסאך גערעדט צו אונז אז א קלוגע פרוי זוכט נישט צו זיין גערעכט, א קלוגע פרוי לאזט איבער די גערעכטיגקייט פארן מאן, און טוט וואס איז קלוג און וואס האלט די שטוב.

מיט די צוויי זאכן, מיט רעדן שיין און מיט התבודדות ותפילה – וועט ענקער שטוב צוריק ווערן אזוי שיין ווי יום החתונה.

בעזרת ה' יתברך - יום א' פרשת אחרי קדושים, ב' אייר, שנת תשפ"ו לפרט קטן

... תחי'

זאגט תהלים און פלעכטס אריין אייערע אייגענע לויב ווערטער צום אייבערשטן.

אויך זאלט איר אים בעטן פאר אייערע דורות, זיי זאלן וואקסן הייליג און זיין גרויסע צדיקים.

בעזרת ה' יתברך

יום ג' פרשת ויצא, ה' כסליו, שנת תשפ"ו לפרט קטן

... נרו יאיר, לינדן ניו דזשערסי

זוך אויף גוטע חברים וואס פירן זיך בתמימות, מיט זיי זאלסטו זיך חבר'ן, און אנטלויף פון חכמות און ליצנות, בפרט פון די חכמות און ליצנות וואס איז דא ביי די וואס זעען אויס ווי חסידים וכו'.

מוהרנ"ת רופט זיי אן (לקוטי הלכות נזיקין הלכה ד, אות כח): "קְלִפַּת נֹגַהּ", זיי זענען אויסגעמישט טוב מיט רע, פון איין זייט איז טאקע דא אין זיי טוב, "כִּי אֵינָם פּוֹרְקִין עֹל חַס וְשָׁלוֹם", זיי האבן נישט אראפגעווארפן די עול התורה והמצוות, "וּקְצָתָם הֵם אֲנָשִׁים כְּשֵׁרִים קְצָת, וְלִפְעָמִים אוֹמְרִים דִּבְרֵי אֱמֶת", אבער פון די אנדערע זייט האבן זיי אין זיך חכמות מיט ליצנות. מוהרנ"ת זאגט דארט, פון איין זייט זענען זיי מער סכנה ווי פון הערן גוים און אפיקורסים, "כִּי מֵעַכּוּ"ם וְאֶפִּיקוֹרְסִים רֹב יִשְֹרָאֵל מְרַחֲקִים עַצְמָן מֵהֶם", ווייל פון גוים און מינים זענען רוב אידן אינגאנצן דערווייטערט, "אַךְ מֵאֵלּוּ הַכְּשֵׁרִים קְצָת", אבער פון די – "אֵין מִתְרַחֲקִים מֵחָכְמָתָם כָּל כָּךְ", איז מען נישט דערווייטערט, "וּבֶאֱמֶת הֵם מַזִּיקִים הַרְבֵּה", און זייערע ווערטער שאטן, "שֶׁמִּתְלוֹצְצִים מִכַּמָּה דַּרְכֵי הַתְּמִימוּת הָאֲמִתִּיּוֹת" וְכוּ', ווייל זיי שפעטן פון די תמימות פון די צדיקי אמת.

זיי זיך קובע צו זאגן יעדן טאג "אכצן פרקים משניות", און דעם "יום תהילים", בתמימות ופשיטות, ווייל נאר דאס וועט בלייבן פון אונז.

בעזרת ה' יתברך - יום א' פרשת אמור, ט' אייר, שנת תשפ"ו לפרט קטן

... נרו יאיר

איך האב גערעדט מיט דיין ווייב בנוגע דיינע קינדער; איך בעט פאר ענק אז אלע זאלן זיין געזונט, עס זאל נמתק ווערן אלע דינים פון די גאנצע משפחה, איך בין זיכער אז אלעס וועט זיך איבערדרייען לטובה.

יעצט קומט ל"ג בעומר; ל"ג בעומר איז א מנהג צו שיסן מיט א פייל און בויגן. איינע פון די טעמים איז, חכמינו זכרונם לברכה דערציילן (בראשית רבה עט, ו), ווען דער הייליגער תנא רבי שמעון בן יוחאי מיט זיין זון דער הייליגער תנא רבי אלעזר זענען ארויס פון די מערה נאך דרייצן יאר, האבן זיי געזען ווי א פאנגער פאנגט פייגלעך, זיי זעען ווי א פייגל ווערט שיער אריינגעכאפט, און אין די לעצטע סעקונדע האט זיך די פייגל געראטעוועט, נאכדעם קומט א פייגל און זיי הערן א בת קול פון הימל וואס זאגט: "געפאנגען" און די פייגל איז געפאנגען געווארן; האט דער הייליגער תנא רבי שמעון בן יוחאי געזאגט פאר זיין זון: "זעסט, אפילו א קליינטשיג פייגעלע קען אויך נישט געכאפט ווערן אן דעם וואס מען זאל דאס אפשרייבן אויבן אין הימל, איז דאך זיכער אז אלעס וואס איז אויף אונז אריבער איז פון הימל מיט א פינקטליכער חשבון"; דערפאר שיסט מען מיט די פייל און בויגן, צו געדענקען די לימוד פון דער פאנגער וואס האט געפאנגען און דער הייליגער תנא רבי שמעון בן יוחאי האט געזאגט אז אפילו א קליין פייגל קען מען נישט פאנגען נאר מיט רשות פון אויבן; מיר זאלן געדענקען אז יעדע זאך וואס פאסירט פון א קליינע זאך ביז א גרויסע זאך, אלעס איז מיט א פינקטליכער חשבון.

ליבער ברודער באשולדיג זיך נישט, און צעקוועטש זיך נישט, אלעס וואס גייט אריבער אויף דיר, מיט דיין ווייב, מיט דיינע קינדער, אלעס איז נאר ווייל מען וויל הערן דיין קול ווי דו רעדסט צום אייבערשטן, און דאס איז נאך א טעם אויף וואס מיר פירן זיך צו שיסן מיט א פייל און בויגן. ווייל דער זוהר הקדוש זאגט (תיקון ו, דף לו:), ווען משיח וועט קומען וועט מען זען א קשת מיט ליכטיגע קאלירן, און דאס וועט זיין די סימן אז משיח איז דא, ווען מען וועט זען די פייל און בויגן מיט ליכטיגע קאלירן, דאס מיינט מען די קשת פון אידישע קינדער; אידישע קינדער באניצן זיך נישט מיט געווער, אזוי ווי עס שטייט (תהלים מד, ז): "כִּי לֹא בְקַשְׁתִּי אֶבְטָח וְחַרְבִּי לֹא תוֹשִׁיעֵנִי", איך פארלאז זיך נישט אויף א פייל און בויגן און נישט אויף א שווערד; אידישע קינדער באניצן זיך מיט תפילה והתבודדות, דאס איז די שווערד פון אידן. אזוי ווי יעקב אבינו האט געזאגט פאר יוסף (בראשית מח, כב): "בְּחַרְבִּי וּבְקַשְׁתִּי", זאגט דארט רש"י, מיט מיינע תפילות; דאס איז אונזער שווערד און אונזער קשת, און דאס וועט אויך זיין די שווערד פון משיח, ווייל משיח וועט אייננעמען די וועלט אן קיין געווער, משיח וועט אייננעמען די וועלט מיט תפילה, ער וועט אריינברענגען אין די וועלט די זאך פון רעדן צום אייבערשטן און בעטן דעם אייבערשטן; דעריבער שיסן מיר ל"ג בעומר מיט א פייל און בויגן, צו דערמאנען אז מיר ווארטן אויף משיח וואס וועט אונז ברענגען דעם קשת בגוונא נהירין.

דער ל"ג בעומר שיסער דארף אונז דערמאנען מיר זאלן זיך מחזק זיין אין תפילה והתבודדות, מיר זאלן בעטן יעדע זאך פונעם אייבערשטן, און ווען מען געפינט זיך אין א קלעם, אין א צרה - זאל מען ניצן די מויל; די ליפן זענען אין א פארעם פון א בויגן און די צינג איז די פייל, מען זאל בעטן דעם אייבערשטן. חכמינו זכרונם לברכה זאגן (ירושלמי ברכות ט, א): "אִם בָּא עַל אָדָם צָרָה", אז א מענטש האט א צרה, "לֹא יִצְוַוח", זאל ער נישט שרייען, "לֹא לְמִיכָאֵל, וְלֹא לְגַבְרִיאֵל", נישט צו מלאך מיכאל און נישט צו מלאך גבריאל – "אֶלָא לִי יִצְוַוח", נאר צו מיר זאל ער שרייען, "וַאֲנִי עוֹנֶה לוֹ מִיַד", און איך וועל אים גלייך העלפן; מיט תפילה קען מען אלעס פועל'ן, תפילה איז די שטערקסטע געווער מיט וואס מען קען באזיגן אלע פיינט.

דאס זאלסטו טון, נאר רעדן צום אייבערשטן; דאנק אים אויף יעדע זאך און בעט אים אויף אלעס וואס דו דארפסט, האלט די קשת אין האנט און שיס פיילן, עפן דיין מויל און שיס ארויס פיילן, דאס מיינט מען דיבורים צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויקהל-פקודי, כ"ב אדר, שנת תשפ"ו לפרט קטן

לכבוד ... נרו יאיר, קרית ברסלב

דעם שבת בענטשט מען חודש ניסן, חכמינו זכרונם לברכה זאגן (ראש השנה יא.): "בְּנִיסָן נִגְאֲלוּ", אין ניסן זענען אונזערע עלטערן אויסגעלייזט געווארן פון מצרים, "בְּנִיסָן עֲתִידִין לִיגָּאֵל", און אין חודש ניסן וועלן מיר אויסגעלייזט ווערן; דאס מיינט מען די גרויסע גאולה וואס משיח וועט אונז אלע אויסלייזן, און אויך מיינט דאס די גאולה פרטית; יעדער איינער קען זוכה זיין צו אויסגעלייזט ווערן פון זיינע שווערע נסיונות און שלעכטע תאוות, ווייל אין חודש ניסן קומט אראפ א הייליגקייט אויף יעדן איינעם.

ווי אזוי ווערט מען אויסגעלייזט פון די שווערע נסיונות? דורך תפילה והתבודדות, דורך זיך אויסרעדן דאס הארץ מיטן אייבערשטן אויף די אייגענע שפראך, די שפראך וואס מען איז געוואוינט צו רעדן. דער הייליגער רבי זאגט (לקוטי מוהר"ן חלק ב, סימן כה): "הִתְבּוֹדְדוּת הוּא מַעְלָה עֶלְיוֹנָה וּגְדוֹלָה מִן הַכֹּל", דאס שמועסן מיטן אייבערשטן אויף די אייגענע שפראך איז זייער א גרויסע זאך, עס איז העכער אלעס; דעריבער זאלסטו טון די הייליגע עבודה, גיי אין א פלאץ וואו קיינער איז נישט דארט, שמועס אויס דיין הארץ, בעט דעם אייבערשטן: "הייליגער באשעפער האב רחמנות אויף מיר, איך וויל אזוי שטארק זיין אן ערליכער איד, איך וויל נישט טון שלעכטע זאכן, וואס זאל איך טון אז איך האב שווערע ביטערע נסיונות, איך שפיר זיך ווי איך בין געבינדן אין תפיסה ביי די טומאה, העלף מיר איך זאל ארויסגיין פון מיינע תאוות רעות, העלף מיר איך זאל דיך דינען, איך זאל נאר טון דיין ווילן"; אזוי זאלסטו בעטן דעם אייבערשטן, און לייג צו דיינע אייגענע תפילות; וועסטו ארויסגיין פון דיין אייגענע גלות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת בא, ד' שבט, שנת תשפ"ו לפרט קטן

... נרו יאיר

איך האב ערהאלטן דיין לאנגע בריוו.

וויסן זאלסטו, אפילו מען איז צוגעקלעבט צו א נישט גוטע זאך, אבער מיט תפילה והתבודדות קען מען זיך אפקלעבן; אויב מען מאכט יעדן טאג תפילה מיט עקשנות, טאג נאך טאג, וואך נאך וואך, חודש נאך חודש, און אזוי ווייטער – קען מען זיך אפגעוואוינען פון די שלעכטע געוואוינהייט.

דערפאר בעט איך דיר מיין ליבער ברודער, מיין הארציגער חבר, אז דו ביסט צוגעקלעבט צו הערן פאדקעסטס פון יעדן קרעציגער און קראנקער און דאס איז ממש א חלק פון דיין לעבן – זאלסטו נעמען די היילונג פון הייליגן רבי'ן, זאלסט יעדן טאג זאגן די ווערטער: "הייליגער באשעפער העלף מיך, קוק מיך אן, קוק וואס איך טו, קוק וואס איך קוק, איך קוק און קוק פאדקעסטס פון יעדן קרעציגער און קראנקער, און איך וויל אבער זיין אן ערליכער איד, העלף מיך איך זאל מער נישט קוקן, איך זאל נאר קוקן וואס די הייליגע צדיקים זאגן, איך זאל נאר אויסהערן ערליכע אידן".

ליבער ברודער, אפילו עס זעט דיר אויס על מנת שתעלה לרקיע, אזוי ווי איינער וועט דיר זאגן אז מען קען ארויפגיין אין הימל, וועסטו אים אנקוקן 'ווי? וואס? ווען? עס איז אוממעגליך!' זאג נישט אזוי, דער רבי זאגט אז אלעס איז מעגליך, ביים אייבערשטן איז אלעס מעגליך; מיט תפילה, מיט עקשנות אין תפילה – קען מען ארויסגיין פון אלע טומאות און אלע זוהמות.

מי יודע, ווער ווייסט אויב דאס וואס דו מוטשעסט זיך אזוי אין פרנסה איז נישט פון אויסהערן די פאדקעסטס וואס איז פול מיט מינות וכפירה, קוק אריין אין די מעשה פונעם חכם און תם (סיפורי מעשיות מעשה ט', מחכם ותם), נאכדעם וואס דער חכם איז אריין אין חקירות און מינות האט ער פארלוירן זיין געלט, ער איז געווארן א קבצן, א בעטלער, א פיס גייער; ער האט פארלוירן זיין הויז, זיין קאר; ביז דער תם האט רחמנות געהאט און אים געברענגט צום צדיק, און דער צדיק האט רחמנות געהאט אויף אים און ער האט געמוזט מודה זיין אז עס איז יא דא א מלך מיט א צדיק, עיין שם.

מיט תפילה און מיט עקשנות אין תפילה וועסטו ווערן אן ערליכער איד.

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

... נרו יאיר, לינדן ניו דזשערסי

היינט ביים מעביר סדרה זיין האב איך זיך מחי' געווען מיט "וילך חרנה ויפגע במקום"; וואס טוט מען ווען עס איז דא 'וילך חרנה' - א חרון אף, עס איז דא דינים? – די עצה איז 'ויפגע במקום', בעטן און מוטשען דעם אייבערשטן, 'ויפגע' איז א לשון פון פגע'ן, מוטשען, מען דארף מוטשען דעם אייבערשטן ביז עס ווערט המתקת הדינים.

ברודער טייערער, הארציגער חבר, פון הימל שטופט מען דעם מענטש צום וואנט, מען מאכט אים ענג אז ער זאל דארפן שרייען צום אייבערשטן, ער זאל תשובה טון און זיך בארעכענען און געדענקען אז עס איז דא נאר איין באשעפער אויף די וועלט.

אז מען קען נישט רעדן, די מויל איז פארמאכט – דארף מען ניצן די פייל און בויגן, מען דארף ווארפן תפילות. אזוי זאגט דער רבי (שיחות הר"ן, סימן נב): "שצריך לזרוק ולהשליך אחריו יתברך תפילות", מען ווארפט תפילות, מען זאגט דא א תפילה און דארט א תפילה, אפילו עס איז נישט מסודר, אפילו אן טעם, אן שפירן ווי מען פועל'ט וכו' וכו'.

אשרינו מה טוב חלקינו ומה נעים גורלינו אז מיר האבן א רבי וואס שטארקט אונז און לאזט אונז נישט פאלן.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

לכבוד ... נרו יאיר

מוהרנ"ת איז אמאל געווען ביין רבי'ן אין שטוב, דער רבי איז געלעגן אין בעט און דער רבי רופט זיך אן (שיחות הר"ן, סימן שב): "דֶער עִקָּר אִיז 'מִבֶּטֶן שְׁאוֹל שִׁוַּעְתִּי'" (יונה ב, ג), אפילו איינער וואס איז שוין פארכאפט ביי די טומאה, ער איז שוין אינעם בטן פון די סטרא אחרא - זאל ער נישט אויפגעבן, נאר פון דארט שרייען צום אייבערשטן: "טאטע נעם מיך ארויס פון בלאטע, העלף מיר עס זאל מיר ליכטיג ווערן", און אויסזאגן דעם אייבערשטן אלעס וואס ער האט פוגם געווען במחשבה, דיבור און מעשה, ארויס זאגן די עבירות מיטן מויל. אזוי ווי דער זוהר הקדוש זאגט (בא, דף מ:): "כֵּיוָן דְּאַקְדִּים בַּר נָשׁ", און אז דער מענטש האט שכל, ער קומט ערשט צום אייבערשטן, "וּמְפָרֵיט חֶטְאוֹי", און ער דערציילט אויס זיין הארץ, די עבירות אין וואס ער איז דורכגעפאלן, "כָּל חַד וְחַד", ער דערציילט דעם אייבערשטן יעדן זינד, "לָא אַשְׁאִיר פִּטְרָא דְּפוּמָא לְהַהוּא מְקַטְרְגָא", האט שוין דער יצר הרע נישט וואס צו פאר'מסר'ן, דער אייבערשטער זאגט אים 'איך ווייס שוין אלעס, דער מענטש איז שוין דא געווען, ער האט שוין דערציילט, ער האט שוין תשובה געטון', "וְלָא יָכִיל לְמִתְבַּע עָלֵיהּ דִּינָא", און ער קען מער נישט בעטן מען זאל ברענגען א שטראף אויפן מענטש, "דְּהָא תָּדִיר תָּבַע דִּינָא בְּקַדְמִיתָא", ווייל שטענדיג זוכט ער ווי מען קען ברענגען שטראפן, "וּלְבָתַר מִשְׁתָּעֵי וּמְקַטְרֵג פְּלוֹנִי עָבֵד כַּךְ", און נאכדעם רעדט ער אָן אויפן מענטש אז ער האט געטון שלעכטס, "וְעַל דָּא", דערפאר, "אִצְטְרִיךְ לֵיהּ לְבַר נָשׁ לְאַקְדְּמָא", דארף דער מענטש אים פעדערן, זיך שטענדיג מתבודד זיין, זיך אויסשמועסן מיטן אייבערשטן, אים דערציילן אלעס וואס מען האט געטון, "וּלְפָרֵט חֶטְאוֹי", און אויסשמועסן יעדע עבירה, אזוי ווערט ער געראטעוועט, "כֵּיוָן דִּמְקַטְרְגָא חָמֵי דָּא", און ווען דער יצר הרע זעט אז דער מענטש מאכט התבודדות, "לֵית לֵיהּ פִּטְרָא דְּפוּמָא עָלֵיהּ", קען ער זיך נישט עפענען דאס מויל, ער האט נישט וואס צו דערציילן פון אים, "וּכְדֵין", און דורכדעם, "אִתְפְּרַשׁ מִנֵיהּ מִכֹּל וָכֹל", ווערט מען געראטעוועט פונעם יצר הרע, ער גייט אינגאנצן אוועק פון דעם מענטש.

ווען דיינע קינדער קומען אהיים פון חדר און פון שולע - זאלסטו זיי אויספרעגן: "ווי אזוי איז געווען דיין טאג? וואס איז געווען אין חדר? וואס האט דיין רבי געזאגט? וואס האט דיין לערערין געזאגט?" פרעג זיי: "ביסט דרך ארץ'דיג? אנדערע קינדער זענען דרך ארץ'דיג? דו ביסט פון די קינדער וואס שטערן?" עס זאל דיר אינטערעסירן דיינע קינדער, עס זאל דיר אינטערעסירן דיין שטוב; אזוי וועסטו זוכה זיין צו ערליכע דורות.

היינט זאגט מען נישט קיין יום כיפור קטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמות, י"ג טבת, שנת תשפ"ה לפרט קטן

לכבוד מיין טייערער ... נרו יאיר

מלומדות איז א חכמה, פון איין זייט דארפן די קינדער ליב האבן חדר, און עס דארף זיך שפירן א פרייליכקייט אין כיתה, און אין די זעלבע צייט דארף זיין א שטארקע דיסציפלין, די קינדער דארפן זיצן שטיל, יעדער אויף זיין פלאץ אן ארויסרעדן א ווארט; אז די צוויי זאכן זאלן גיין אינאיינעם – איז א חכמה, און מיט תפילה קען מען מצליח זיין.

שטיי אויף פארטאגס, גיי שפאצירן מיטן אייבערשטן; בעט אים אז דו זאלסט מצליח זיין מיט יעדן תלמיד, זאלסט טון דיין ארבעט בנאמנות; געבן פאר דיינע תלמידים דאס מערסטע וואס איז שייך.

א מלמד מוז גיין אין מקוה, איך נעם זיך אויס אז אויב מען גייט נישט אין מקוה אינדערפרי – קען מען נישט זיין ביי מיר א מלמד. היות איך ווייס נישט, איך קוק נישט נאך, פארלאנג איך מען זאל זיין אפן מיט די מוסד.

בעזרת ה' יתברך - יום א' פרשת ויחי, ה' טבת, שנת תשפ"ה לפרט קטן

לכבוד מיין טייערער ליבער ... נרו יאיר

ווען דו ביסט זיך מתבודד, זאלסטו דער עיקר מתפלל זיין אויף שמחה; ווייל אין שמחה איז אלעס אנגעהאנגען, אלע ישועות, אלע רפואות – באקומט מען ווען מען איז בשמחה, און אויך פארקערט, אויב חס ושלום מען איז בעצבות ובמרה שחורה, פון דעם קומט די אנגעצויגענע נערווען, און אויך אלע פארדרייטע מחשבות, דמיונות, השם ישמרינו.

נָא, איך בעט דיר – טו אלע צו זיין פרייליך, און מאך זיך אפילו נאריש במילי דשטותא, אזוי ווי דער רבי זאגט (לקוטי מוהר"ן חלק ב', סימן כד): "צריך להכריח את עצמו בכח גדול להיות בשמחה תמיד, ואפילו במילי דשטותא", מען דארף אלעס טון, אבי זיין פרייליך.

בעזרת ה' יתברך - יום ג' פרשת ויגש, א' דראש חודש טבת, ו' דחנוכה, שנת תשפ"ה לפרט קטן

... תחי'

איך האב ערהאלטן אייער בריוו.

איך האב זייער הנאה צו הערן אז איר האט זייער הנאה געהאט פון די שבת התוועדות מיט בית פיגא תלמידות, ווי איר האט געזען מיידלעך וואס זענען פרייליך, מען לעבט אן קיין דרוק, מען לעבט נישט פאר א צווייטן.

דאס וואס איר שרייבט אז איר זענט טרויעריג אז איר דארפט צוריק גיין צו אייער סקול וואו אלעס איז פרעשור וכו' וכו', און ווען איר בעט פון אייערע טייערע עלטערן צו קומען צו בית פיגא, זאגן זיי: "עס איז נאכנישט די צייט", איר פרעגט וואס איר קענט טון.

תפילה איז די עצה, בעטס דעם אייבערשטן איר זאלט זיין צוגעבינדן צום רבי'ן, לעבן מיט די עצות פון רבי'ן, בעיקר מיט די עצה פון שמחה. דער רבי זאגט (לקוטי מוהר"ן חלק ב', סימן כד), עס איז זייער א גרויסע מצוה צו זיין שטענדיג פרייליך, ווי אזוי איז מען פרייליך? ווי אזוי קומט מען צו די גרויסע מדריגה? דורך זוכן דאס גוטס וואס דער אייבערשטער טוט שטענדיג און ארויסזאגן מיטן מויל: "שכוח אייבערשטער" אויף די חסדים.

מאכט זיך א קביעות יעדן טאג צו דאנקען און לויבן דעם אייבערשטן אין אייער שפראך, אין אידיש, זאגט: "שכוח אייבערשטער איך בין א איד, שכוח אייבערשטער איך בין געזונט, שכוח אייבערשטער פאר מיינע טייערע עלטערן, שכוח אייבערשטער איך קען זען, שכוח אייבערשטער איך ווייס פון די עצות פון רבי'ן", און אזוי ווייטער.

דאס דאנקען און לויבן דעם אייבערשטן טראגט ארויס אלע פרעשור, מען פליט אריין אין גן עדן, מען ווערט פרייליך, מען ווערט אין א גוטע מוט.

בעטס דעם אייבערשטן איר זאלט קענען לערנען אין רבינ'ס סקול, און בעטס שוין פאר אייערע דורות, אלע זאלן זיין ביים רבינ'ס מוסדות, אייערע דורות זאלן לערנען און דאווענען, און איר זאלט זיי נישט שטערן, עס זאל זיין די שענסטע זאך אז מען טראגט דעם רבינ'ס נאמען, עס זאל נישט זיין קיין בושה.

געבט א גרוס פאר אייערע טייערע עלטערן.

בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן

מיין טייערער ... נרו יאיר, קרית ברסלב

וואלסטו געוואוסט וויפיל כוחות די מלמדים און לערערינס לייגן אריין אין דיינע קינדער טאג איין טאג אויס, ווי זיי געבן אכטונג אויף דיינע קינדער - וואלסטו זיי גערופן זאגן שכוח און זיי מטיב געווען.

טייערער ברודער, גיי יעדן טאג א שפאציר ארום דיין שטוב און רעד צום אייבערשטן, בעט אים ער זאל רחמנות האבן אויף דיר, ער זאל דיך מקרב זיין צו אים, בעט דעם אייבערשטן דיין לעבן זאל דיר אריבער גיין מיט תכלית.

זיי ממשיך מיט הפצה, מענטשן זאגן מיר דו האסט זיי אויפגעלעבט זייער לעבן, האסט זיי מקרב געווען צום רבי'ן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת חיי שרה, י"ט מר-חשון, שנת תשפ"ה לפרט קטן

לכבוד מיין טייערער ... נרו יאיר

שטארק זיך מיט אמונה, פארליר זיך נישט, דער אייבערשטער שטייט אונטער אלעס, ער איז באהאלטן אין דיין ביזנעס, אין אלעס וואס דו גייסט אריבער, עס וועט דיר בקרוב צוריק ברייטער ווערן, דו וועסט צוריק האבן גרויס שפע.

עס קען זיין אז דאס וואס דו גייסט אריבער וכו', איז נאר ווייל דער אייבערשטער וויל הערן דיין קול ווי דו געבסט א גוטע קרעכץ, און איין ווארט פון הארץ ארויס ווי דו בעטסט: "טאטע איך קען נישט מער, טאטע איך בין אזוי פארלוירן, טאטע העלף מיר, ראטעווע מיך, נעם מיך ארויס פון מיין צעקוועטשטקייט" וכו' וכו'.

קען זיין נאר צוליב דעם דארפסטו דאס אריבערגיין, דיר צו ברענגען נענטער צום אייבערשטן, דער אייבערשטער זאגט: "כִּי קוֹלֵךְ עָרֵב", דיין קול איז מיר זיס, "וּמַרְאֵיךְ נָאוֶה", און דיין אויסזען איז שיין (שיר השירים ב, יד).

טייערער ברודער, עס וועט דיר בקרוב בעסער ווערן, דו וועסט צוריק האבן גרויס שפע, נאר איין זאך בעט איך דיר, מאך זיך א קביעות, גיי יעדן טאג התבודדות. פאר מיט דיין קאר צו א שטילע פארק, א שטילע וואסער וכדומה, לאז די טעלעפאן אין קאר, גיי אביסל א שפאציר, קוק ארויף צום אייבערשטן און בעט אים: "באשעפער העלף מיר, באשעפער איך וויל זיין מיט דיר, איך וויל געדענקען פון דיר, איך וויל תכלית, איך וויל לערנען און דאווענען, און פאר דעם דארף איך פרנסה בריווח".

אוי ווי זיס, אוי ווי שיין, אוי ווי געשמאק – ווען מען פאלגט דעם רבי'ן, מען באניצט זיך מיט התבודדות; מען זעט ישועות און מען ווערט געזונט, מען האט נישט מער די פאניק אטאקעס, ווייל די אמונה ווערט אזוי שטארק, ביז מען באקומט אייזערנע נערווען.

בעזרת ה' יתברך - יום א' פרשת תולדות, כ"ג מר-חשון, שנת תשפ"ה לפרט קטן

לכבוד מיין טייערער ... נרו יאיר

איך בענק זיך אזוי צו דיר, איך האף צום אייבערשטן אז אלעס איז גוט ביי דיר, ביי דיין משפחה מיט דיין ווייב און קינדער.

בעט אויף אמונה, בעט יעדן טאג דעם אייבערשטן אויף א קלארע לויטערע אמונה, ווייל דער רבי זאגט (שיחות הר"ן, סימן לב), ווער עס האט אמונה, אפילו ער גייט אריבער שווערע טעג חס ושלום, "יוּכַל לְנַחֵם עַצְמוֹ", קען ער זיך טרייסטן, "וּלְהַחֲיוֹת אֶת עַצְמוֹ", און זיך מחי' זיין, "כִּי הַשֵּׁם יִתְבָּרַךְ יְרַחֵם עָלָיו", אז דער אייבערשטער וועט זיך דערבארעמען אויף אים, און אז אלעס איז לטובה און פאר זיין כפרה, "וּבַסּוֹף יֵיטִיב לוֹ הַשֵּׁם יִתְבָּרַךְ", און ביים סוף וועט אים דער אייבערשטער גוט מאכן, "בָּעוֹלָם הַזֶּה אוֹ בָּעוֹלָם הַבָּא", אדער דא אדער שפעטער, אבער אן אמונה ווען מען גייט אריבער שוועריקייטן האט מען זיך נישט צו וועם צו ווענדן, נישטא קיין טרייסט.

דאס רעדן צום אייבערשטן און דאס בעטן דעם אייבערשטן, דאס אליין בויט אויף די אמונה, מען ווערט שטערקער און קלארער מיט די אמונה.

שכוח פאר אלעס וואס דו העלפסט די קהילה, דער רבי וועט דיר נישט שולדיג בלייבן.

בעזרת ה' יתברך - יום ג' פרשת חיי שרה, י"ח מר-חשון, שנת תשפ"ה לפרט קטן

לכבוד מיין טייערער ... נרו יאיר

די תורה לערנט אונז עצות אין יעדן פרט, ווי אזוי מען זאל זיך פירן, וואס מען זאל טון. אז דו דארפסט א שידוך, דו ווילסט שוין האבן דיין לעבן, עס איז דיר ביטער שווער צו זיין א פלג גוף, אליין, זאלסטו טון וואס שטייט אין די פרשה (בראשית כד, סג), "וַיֵּצֵא יִצְחָק לָשׂוּחַ בַּשָּׂדֶה", יצחק איז געגאנגען שמועסן אין פעלד מיטן אייבערשטן, חכמינו זכרונם לברכה זאגן: "אין שיחה אלא תפילה" (ברכות כו:), "לִפְנוֹת עָרֶב", פארנאכטס, נאך א פשט, "לִפְנוֹת עָרֶב", עס איז אים געווען טונקל, פינסטער; אז מען האט נישט חתונה, מען איז אליין, איז פינסטער. אזוי ווי די הייליגע חכמים זאגן (יבמות סב:): "כָּל אָדָם שֶׁאֵין לוֹ אִשָּׁה שָׁרוּי בְּלֹא שִֹמְחָה, בְּלֹא בְּרָכָה, בְּלֹא טוֹבָה", אן א שידוך איז טונקל וכו', יצחק איז געגאנגען דאווענען, בעטן דעם אייבערשטן: "הייליגער באשעפער געב מיר א שידוך, הייליגער באשעפער איך וויל נישט זיין אליין, איך וויל חתונה האבן", "וְהִנֵּה גְמַלִּים בָּאִים", און ער האט באקומען זיין שידוך.

טייערער ..., גיי יעדן טאג אין א שטילע פלאץ, פאר מיט דיין קאר צו א וואסער, צו א שטילע פארק און גיי דארט א שפאציר (אן די טעלעפאן), און בעט דעם אייבערשטן, הייב אויף דיינע אויגן צום הימל, הייב אויף דיינע הענט צום הימל און זאג: "רבונו של עולם, העלף מיר", אויך דאנק, זאג שכוח אייבערשטער.

בעזרת ה' יתברך - יום ב' פרשת וירא, י' מר-חשון, שנת תשפ"ה לפרט קטן

לכבוד מיין טייערער ליבער זון הרב ... שליט"א

איך האב גרויס נחת פון דיר, איך און מאמי תחי' פרייען זיך זייער צו באקומען גאר שיינע גריסן אויף דיר, פון דיין התמדת התורה און דיינע גוטע מידות ויראת שמים.

גיי שלאפן פרי, פעניע נישט אפ די נעכט, און שטיי אויף פרי, לערן דיינע שיעורים כסדרן בכל התורה כולה, מאך זיך א פלאן צו ענדיגן כל התורה כולה.

אויך זאלסטו גיין אין פעלד זיך מתבודד זיין, גיי הינטער דיין הויז, לייג א בענקל צווישן די ביימער, א קביעות'דיגע מקום, און בעט דעם אייבערשטן דו זאלסט זוכה זיין צו זיין א צדיק, נישט מסיח דעת זיין פון אים.

בנוגע כולל, בנוגע לערנען ספרי אחרונים וכו'; לערן בעיקר טור בית יוסף, מחבר רמ"א, טורי זהב און מגן אברהם; דאס זאלסטו לערנען און גוט קענען, מער פון דעם וועט דיך נאר מער צעמישן.

איך ווייס אז היינטיגע אברכים זיצן שעות און לערנען וכו', אבער פון זיידע זכרונו לברכה האב איך מקבל געווען צו לערנען הלכה; טור בית יוסף, שלחן ערוך, טורי זהב מגן אברהם; אז דו וועסט אזוי לערנען – וועסטו מצליח זיין.

בעזרת ה' יתברך - יום א' פרשת וירא, ט' מר-חשון, שנת תשפ"ה לפרט קטן

לכבוד ... נרו יאיר

טייערער ברודער, שטארק זיך מיט אלע דיינע כוחות, ווער נישט צעפאלן, באניץ זיך מיט די עצה פון רבי'ן, די עצה וואס משיח וועט אריינברענגען אין די וועלט; זאלסט זיך צוגעוואוינען מיט א קביעות, א באשטימטע צייט - זיך אויסצורעדן דאס הארץ צום אייבערשטן. דאס רעדן צום אייבערשטן איז אונזער שווערד, אונזער געווער. חכמינו זכרונם לברכה זאגן (שוחר טוב קמט, ב): "פיהם של ישראל חרבם", די מויל פון א איד איז ווי א שווערד, אז מען ניצט די מויל פאר תפילה והתבודדות - איז דאס ווי א שווערד קעגן אלע פיינט.

מיש זיך נישט אין קיין מחלוקת, אפילו מען וועט דיר איינרעדן אז דאס איז לשם שמים און עס איז א מצוה. ליבער ברודער, שטיי ווייט פן מחלוקת (אויך וואס איז נוגע צו מיר; נעם זיך פאר מיר נישט אן, אז דו הערסט רעדן אויף מיר, און דו ווילסט זיך אננעמען פאר מיר - זאלסטו שווייגן).

אויך אין משפחה, אז מען וויל דיר אויפהעצן - זאלסטו זיך מיט חכמה ארויסדרייען, ווייל מען ליידט זייער פון מחלוקת. חכמינו זכרונם לברכה זאגן (עיין רש"י במדבר טז, כז), אפילו קליינע קינדער וואס מען באשטראפט נישט - ווערן אויך אוועק געריסן דורך מחלוקת.

זע צו זיין פרייליך און געב אכטונג אויף דיין שטוב, דער עיקר און די יסוד פאר שלום בית איז - מען זאל נאכגעבן, און נישט מקפיד זיין איינער אויפן צווייטן. זוך נישט קיין חסרונות אין דיין ווייב, זוך דאס גוטס אין איר.

מארגן נאכט וועט זיין די יערליכע מיטונג אין בית פיגא פון די עלטערן מיט די טיטשערס, איך בעט דיר זייער זאלסט אלעס אפלאזן און זען אז דיין ווייב זאל קענען קומען רעדן מיט די טיטשערס און הערן וויכטיגע יסודות פון די מנהלת, ווייז אז די חינוך פון דיינע קינדער זענען דיר חשוב און דריי זיך נישט ארויס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת נח, א' דראש חודש מר-חשון, שנת תשפ"ה לפרט קטן

לכבוד הילד ... נרו יאיר, מאנסי

איך ווארט צו הערן וואס דו מאכסט, ווי דו שטארקסט זיך בעבודת השם, אויב דו מאכסט יעדן טאג התבודדות; דער רבי אלס קינד פלעגט זיך באהאלטן ביי זיין טאטע אין בוידעם און דארט זיך מתבודד זיין. דער רבי דערציילט (שבחי הר"ן, סימן י) אז ער האט זיך באהאלטן אין בוידעם ביי זיין טאטן אין שטוב, דארט איז געווען א באזונדערע שטוב וואו מען האט געהאלטן שטרוי פאר די בהמות, דארט פלעגט זיך דער רבי באהאלטן, ער פלעגט דארט זאגן תהלים, "וְהָיָה צוֹעֵק בְּלַחַשׁ לְהַשֵׁם יִתְבָּרַךְ", און ער פלעגט שרייען שטילערהייט צום אייבערשטן, "שֶׁיְזַכֵּהוּ לְקָרְבוֹ אֵלָיו יִתְבָּרַךְ", אז דער אייבערשטער זאל רחמנות האבן אויף אים, ער זאל ווערן אן ערליכער איד.

טייערער ... נרו יאיר, זוך דיר א פלאץ וואו קיינער איז נישט דארט און רעד זיך אויס צום אייבערשטן, בעט אים ער זאל דיר העלפן דו זאלסט זיין אן ערליכער איד.

שרייב מיר וועסטו מיך מחי' זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת נח, כ"ט תשרי, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

אז דיין קינד זינגט א חוזק ניגון אויף זיין מלמד און טיטשער - זאלסטו זיין קלוג און נישט מיטזינגען דעם ניגון; זיי מחנך דיינע קינדער זיי זאלן האבן דרך ארץ, נישט קיין חילוק ווער דער מלמד איז און ווער די טיטשער איז.

ווען דיינע קינדער וועלן שפירן ווי דו מיט דיין ווייב זענען איינשטימיג מיט די מוסד - דעמאלט וועט זיך אנהויבן די הצלחה ביי דיינע קינדער, דיינע קינדער ווייסן אז דו לאכסט זיך אויס פונעם מלמד און פון די מנהלת, און דאס לאזט זיי נישט מצליח זיין.

גיי אינדערפרי א שפאציר און זאג: "אייבערשטער איך וויל נכלל ווערן אין דיר, איך וויל בטל ווערן צו דיר". דער רבי זאגט (לקוטי מוהר"ן חלק א, סימן נב): "וְאִי אֶפְשָׁר לָבוֹא לִידֵי בִּיטּוּל, כִּי אִם עַל יְדֵי הִתְבּוֹדְדוּת", מען קען זוכה זיין צו ווערן נכלל אינעם אייבערשטן נאר דורך התבודדות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת נח, כ"ט תשרי, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

בנוגע וכו'; מאך זיך א שיעור, יעדן טאג זאלסטו לערנען א פרק משלי, הויב אן ראש חודש, יעדן טאג א פרק, ביז סוף חודש. מוהרא"ש פלעגט אזוי טון, אויך איך פיר זיך אזוי. אויך זאלסטו יעדן פארטאגס זאגן שיר השירים, און אויך זאלסטו לערנען אביסל קהלת יעדן טאג. רבי נתן זאגט (חיי מוהר"ן סימן תס) איך האב אמאל אריינגעבליקט אין רבינ'ס כתבים, האב איך געזען ביים רבי'ן פארשריבן א סגולה אויף דעם, מען זאל זאגן שיר השירים, משלי און קהלת, דאס איז מרומז וואס רבי שמעון בן יוחאי זאגט אין תיקוני זוהר, די בחינה פון תלת טיפין (תיקון יג, נג:), עיין שם.

עס איז דא נאך סגולות פון הייליגן רבי'ן. דער רבי זאגט (ספר המדות אות סגולה חלק ב', סימן ג) טרינקען רעגן וואסער איז מסוגל פאר דעם; שטעל ארויס א כלי פון דיין פענסטער און ווען עס וועט רעגענען וועט דאס ווערן אנגעפילט מיט רעגן וואסער, דאס זאלסטו אויסטרינקען - וועט דאס זיין פאר דיר א סגולה.

ועל כולם נעם די עצה פון תפילה והתבודדות; דאס איז די בעסטע עצה, מיט תפילה קען מען פועל'ן שלא כדרך הטבע, מען קען זען ניסים ונפלאות קעגן די טבע. דער רבי זאגט (לקוטי מוהר"ן חלק א', סימן רנ): "הַטֶּבַע מְחַיֵּב כָּךְ, וּתְפִלָּה מְשַׁנָּה הַטֶּבַע", מיט תפילה קען מען זוכה זיין צו טוישן אפילו די נאטור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת נח, כ"ו תשרי, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

האסט מיר געפרעגט ווי אזוי דו קענסט זוכה זיין צו ערליכע קינדער; דער ענטפער איז - זאלסט יעדן טאג אוועק געבן אפאר מינוט התבודדות אויף דעם.

מאך זיך א קביעות צו בעטן יעדן טאג פינף מינוט נאר אויף ערליכע דורות. חכמינו זכרונם לברכה דערציילן (תנא דבי אליהו רבה, פרק יח): "מַעֲשֶׂה בְּכֹהֵן אֶחָד שֶׁהָיָה יְרֵא שָׁמַיִם בַּסֵּתֶר, וְהָיוּ לוֹ עֲשָׂרָה בָּנִים מֵאִשָּׁה אַחַת, שִׁשָּׁה זְכָרִים וְאַרְבַּע נְקֵבוֹת", עס איז געווען א כהן זייער אן ערליכער איד וואס האט געהאט צען קינדער - זעקס זין און פיר טעכטער, "וּבְכָל יוֹם וָיוֹם הָיָה מִתְפַּלֵּל וּמִשְׁתַּטֵּחַ וּמִתְחַנֵּן וּמְבַקֵּשׁ רַחֲמִים וּמְלַחֵךְ בִּלְשׁוֹנוֹ עָפָר, כְּדֵי שֶׁלֹא יֵצֵא אֶחָד מֵהֶן לִידֵי עֲבֵירָה וְלִידֵי דְּבַר מְכֹעָר", ער פלעגט זיך יעדן טאג אראפווארפן אויף דער ערד וויינען און בעטן דעם אייבערשטן, אז אלע זיינע קינדער זאלן זיין ערליכע אידן; "אָמְרוּ לֹא יָצְתָה אוֹתָהּ שָׁנָה וְלֹא שֵׁנִית וְלֹא שְׁלִישִׁית, עַד שֶׁבָּא עֶזְרָא וְהֶעֱלָה אֶת יִשְׂרָאֵל מִבָּבֶל, וְהֶעֱלָה אֹתוֹ כֹּהֵן עִמָּהֶם. לֹא נִכְנַס אֹתוֹ כֹּהֵן לְבֵית עוֹלָמוֹ, עַד שֶׁרָאָה כֹּהֲנִים גְּדוֹלִים וּפִרְחֵי כְּהוּנָה מִבָּנָיו וּמִבְּנֵי בָּנָיו עַד חֲמִשִּׁים שָׁנָה, וְאַחַר כָּךְ נִכְנַס אוֹתוֹ כֹּהֵן לְבֵית עוֹלָמוֹ", ביז ער האט זוכה געווען ארויף צו גיין קיין ארץ ישראל מיט אלע זיינע קינדער צוזאמען מיט עזרא הסופר, און אלע זיינע קינדער זענען געווארן כהנים גדולים אין בית המקדש, און דער כהן האט זוכה געווען צו קינדער און אייניקלעך וואס אלע פון זיי האבן געטון די עבודה אינעם בית המקדש; זעט מען פון דעם אז תפילה איז די עצה זוכה זיין צו ערליכע קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת נח, כ"ה תשרי, שנת תשפ"ה לפרט קטן

לכבוד ... נרו יאיר

זע צו צאלן טעקס אויף דיין הויז, ווייל אז מען צאלט נישט קיין שטייער קען די רעגירונג אוועק נעמען די הויז, דו וועסט בלייבן אן א דאך איבערן קאפ.

געווענליך אז מען קויפט א הויז נעמט מען א מארטגעדזש און די באנק מאנט יעדע חודש פאר די שטייער, אבער ביי דיר אז דו האסט נישט ארויסגענומען קיין מארטגעדזש - דארפסטו אכטונג געבן צו צאלן שטייער אין צייט אז מען זאל דיר נישט צונעמען די הויז.

גיי יעדן טאג א שפאציר ארום דיין שטוב, דערצייל דעם אייבערשטן אלעס וואס דרוקט דיר, אלעס וואס שטערט דיר, ובעיקר ווי שטארק דו ווילסט זיין ערליך און ווי דער יצר הרע שפילט מיט דיר ארום און ער ווארפט דיר אראפ, נאר מיט התבודדות איז מען פארזיכערט אז מען פארקריכט נישט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת נצבים וילך, כ"ב אלול, שנת תשפ"ד לפרט קטן

מרת ... תחי'

איך האב ערהאלטן אייער בריוו.

מאכט נישט קיין עסק פון דעם וכו', רעדט נישט פון דעם, און ווען אייער מאן הויבט אן רעדן קעגן - זאלט איר חס ושלום נישט טענה'ן, הערט אויס ביז די שמועס וועט זיך ענדיגן; ווערט נישט צעפאלן און ווערט נישט פארלוירן, עס וועט אריבערגיין.

שטילערהייט בעטס דעם אייבערשטן אז אייער גאנצע שטוב זאל זיין געבויט אויף צדיקים, אייערע קינדער און אייניקלעך זאלן אלע לעבן מיטן צדיק.

מיט תפילה און מיט סבלנות קען מען איבערדרייען די טבע, מיט תפילה און מיט סבלנות קען מען אנקומען צו וואס מען וויל אנקומען, מען דארף אבער האבן אייזענע געדולד ווען מען זעט ווי עס גייען אריבער אזויפיל צייט וואס מען בעט און מען בעט און מען זעט נאכנישט ווי עפעס רוקט זיך, אבער דער וואס האט געדולד און לאזט נישט אפ תפילה - איז ביים סוף מנצח.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.