בעזרת ה' יתברך - יום א' פרשת שלח (קרח בא"י), כ"ב סיון, שנת תשפ"ו לפרט קטן
... נרו יאיר
אויף די פראגע וועלכע לימודים און שיעורים איז די וויכטיגסטע, אויף וועלכע זאלסטו זיך פארלייגן דאס מערסטע?
ביי דיר איז דאס וויכטיגסטע זאך זיך פארצוקוקן די לימודים וואס דו גייסט לערנען אין חדר מיט דיינע תלמידים, נישטא עפעס גרעסער ווי לערנען תורה מיט תינוקות של בית רבן, און יעדע איבריגע מינוט וואס דו האסט – זאלסטו זיך פארגרייטן וואס צו לערנען מיט די קינדער, איינמאל דו ביסט גוט גוט אנגעגרייט מיט די לימודים, געדאנקען ווי אזוי דאס אריינצוברענגען מכח אל הפועל – זאלסטו לערנען חומש רש"י מיט תרגום, איינגעטיילט לויט די פרשת השבוע, נאכדעם משניות, גמרא והלכה וכו'.
בנוגע וועלכע נאמען צו געבן וכו'; דאס ענטפערט מען נאר נאכן געבוירן.
בנוגע נעמען פאר דיין ווייב א העלפער ביים געבוירן; אזוי פלעגן ענק טון ביי אלע קינדער, און יעצט הערן ענק אז אין היכל הקודש זאגט מען אז עס פעלט נישט אויס; מאכט זיך נישט נאריש, הערט נישט אויס די אלע זאכן, מאכט נישט קיין עסק פון די זאכן, ענק זאלן טון וואס ענק איז באקוועם; היכל הקודש איז נאר חיזוק, היכל הקודש איז חזר'ן די עצות פון הייליגן רבי'ן, פון תפילה והתבודדות, גארנישט מער פון דעם.
בנוגע טון חסד, ווען און וויפיל, ווי איין און ווי אויס; אויב דיין ווייב האט כח זאל זי אריינעמען יענעמ'ס קינדער, קוק אויף דיין ווייב'ס כוחות; אז עס נעמט אוועק צייט פון די קינדער – דאס איז נישט אויף וואס מען קוקט, אדרבה ואדרבה, די קינדער וועלן אויפוואקסן שענער און בעסער מיט ארייננעמען געסט; אז דיין ווייב האט כח זאלן ענק עפענען די טיר פאר חסד, בפרט פאר געשוויסטער – איז זייער א גרויסע מצוה.