בעזרת ה' יתברך - יום ה' פרשת יתרו, י"ח שבט, שנת תשפ"ו לפרט קטן
משה נרו יאיר, קרית ברסלב
איך האב זייער הנאה געהאט דיך צו טרעפן דינסטאג נאכט איידער די יארצייט סעודה, ביים ציון פון הרב הקדוש מריבניץ זכותו יגן עלינו, און אזוי אויך פאריגע וואך ליל שישי ביים ציון פון הייליגן רבי'ן זכותו יגן עלינו אין קרית יואל, איך זע אז דו לעבסט ביי קברי צדיקים, ווי דו קענסט נאר גייסטו צו קברי צדיקים, דו זאגסט דארט תהלים און דו ביסט זיך מתבודד; זייער גוט טוסטו, אשריך ואשרי חלקיך, ביי קברי צדיקים קען מען גוט מתפלל זיין, מען קען זיך דארט אויסבעטן.
שטארק זיך מיט דיין הייליגע ארבעט פון ארויפלייגן אלע שיעורים אויפן האטליין קול ברסלב, אזויפיל מענטשן אין די גאנצע וועלט, הונדערטער טויזנטער מענטשן זענען זיך מחי' מתים דורך די שיעורים. הלוואי זאלסטו אריינלייגן וואס מער כח אינעם האטליין, וואס מער הארץ, דאס פארשפרייטן וואס מער, צו ראטעווען די בני הנעורים וואס דער מלך האכזר שיסט זיי מיט די צען פיילן באשמירט מיט די צען ערליי גיפט רחמנא לצלן, און מען דארף דעם רבי'ן וואס היילט זי, אזוי ווי דער הייליגער רבי האט בפירוש געזאגט: "און איך הייל זי" (ספורי מעשיות מעשה יג, פון די זיבן בעטלערס).