בעזרת ה' יתברך
יום ג' פרשת עקב, י"ח מנחם-אב, שנת תשפ"א לפרט קטן
לכבוד מיין טייערער ... נרו יאיר, קרית ברסלב
איך מוז דיר זאגן אז איך באוואונדער דיר, איך זע דיין התנהגות ווי אזוי דו פירסט זיך שבת אין שול, ווי דו האלסט דיינע קינדער מיט דיר דאס גאנצע דאווענען; דיינע קינדער זיצן נעבן דיר דאס גאנצע דאווענען, פון אנהייב ביז'ן סוף, דו געבסט זיך אזוי אפ מיט זיי, אשריך ואשרי חלקיך!
איך ווייס אז דאס איז נישט גרינג, דאס איז פון די עבודות קשות שבמקדש; בפרט א אינגערמאן ווי דו וואס דו ארבעסט ביטער שווער א גאנצע וואך, מהבוקר עד צאת הנשמה, דו ביסט גוט פאריאגט, דו ביסט מקיים דעם ששת ימים תעבוד ועשית כל מלאכתיך; וואלסטו זיך געקענט פטר'ן שבת פון אלעס, וואלט ווען געקענט זיצן אין שול און לאזן די קינדער ארום לויפן וכו', דאך האסטו דעם קאפ אויפ'ן פלאץ, דו לייגסט אריין אין זיי דאווענען; איך באוואונדער דיר.
הלואי זאלן אלע אזוי טון; איך בין זיכער אז נאך אינגעלייט וועלן זיך אפלערנען פון דיר, מען וועט אוועקלייגן די באקוועמע מינוטן פון זיצן אביסל רואיג, מען וועט ענדערש טראכטן פונעם עתיד.
אז מען וויל – קען מען דאס מאכן אינטערעסאנט, מען קען מיטברענגען קליינע צוקערלעך, נאש וכדומה, און מען געבט זיי א צוקערל; יעדע שטיק צייט געבט מען נאך א שטיקל נאש, אזוי קען מען זיי האלטן ביים דאווענען מיט געשמאק, אן דרוק.
מען דארף אסאך בעטן דעם אייבערשטן אויף די קינדער, זיי זאלן אויסוואקסן ערליך און געזונט.