בעזרת ה' יתברך
יום ג' פרשת עקב, י"ח מנחם-אב, שנת תשפ"א לפרט קטן
מרת ... תחי', קרית ברסלב
איך האב ערהאלטן אייער בריוו.
זייט מיר מוחל אז איך האב זיך פארזוימט אזוי לאנג, איך בין אזוי פארנומען מיט אזויפיל זאכן, איז דאס מיר ארויס פון קאפ.
וויסן זאלט איר, ביים אייבערשטן איז זייער באליבט ווען מען טוט תשובה; ווען א מענטש זאגט פאר'ן אייבערשטן ער וויל זיין גוט, ער בעט איבער דעם אייבערשטן – ווערט ער ניי געבוירן.
חכמינו זכרונם לברכה זאגן (ברכות לד:): "בְּמָקוֹם שֶׁבַּעֲלֵי תְּשׁוּבָה עוֹמְדִין, צַדִּיקִים גְּמוּרִים אֵינָם עוֹמְדִין", איינער וואס טוט תשובה איז אויף אן העכערע פלאץ ווי די וואס האבן נישט געזינדיגט; ווער רעדט נאך אז מען איז אן אונס, מען האט נישט געוויסט, מען האט נישט געלערנט אין די יונגע יארן ווי צו זיין אפגעהיטן, האט מען דאך ווערטער אין מויל וואס צו זאגן דעם אייבערשטן: "הייליגער באשעפער, זיי מיר מוחל פאר די נישט גוטע זאכן וואס איך האב געטון אין מיינע יונגע יארן, איך האב נישט געוויסט אז מען טאר נישט, איך האב נישט געוויסט ווי שעדליך דאס איז פאר'ן לעבן, וואס בין איך שולדיג; העלף מיר איך זאל פארגעסן די אלע זאכן און עס זאל מיר נישט שטערן אין מיין לעבן, אין מיין חתונה געהאטע לעבן, וואש מיר אפ".
די אלע וואס מען האט זיי נישט געלערנט אין די יוגענט וואס איז אסור – האבן דאך א פתחון פה צום אייבערשטן, און אויך די וואס האבן יא געוויסט און דאך האבן זיי געטון נישט גוט, האבן אויך א פתחון פה, זיי קענען זאגן: "אייבערשטער, זיי מיר מוחל, איך וויל זיין גוט, וואס זאל איך טון אז איך האב א יצר הרע; זיי מיר מוחל אויף וואס איך טו, אויף וואס איך קוק, איך וויל זיין גוט, איך וויל זיין וואויל".
איך בעט אייך זייער, צעקלאפט אייך נישט; איר זענט זייער חשוב, ביי מיר זענט איר פון די טייערסטע משפחות אין שטעטל.
איך דארף מקצר זיין, איך וועל אייך נאך שרייבן.