בעזרת ה' יתברך - יום א' פרשת תצוה, ה' אדר, שנת תשפ"ו לפרט קטן
... נרו יאיר
פורים איז זייער א הייליגע טאג, מען קען פועל'ן ביים אייבערשטן אלעס וואס מען דארף, וויל איך דיך מחזק זיין דו זאלסט אויסניצן די טאג מיט קדושה וטהרה, דער עיקר זאלסטו אויסניצן די טאג מיט תפילה והתבודדות, ווען דו טאנצט און שפרינגסט - זאלסטו זיך שטילערהייט מתבודד זיין, שריי צום אייבערשטן: "צָרוֹת לְבָבִי הִרְחִיבוּ", מיינע צרות זענען אזוי שטארק, "מִמְּצוּקוֹתַי הוֹצִיאֵנִי", באשעפער זיסער העלף מיר, נעם מיך ארויס פון מיין פלאנטער.
עס איז געווען ביי אנשי שלומינו א איד ר' מאיר טעפליקער, ער פלעגט מאכן ביי זיך אין שטוב פורים נאכמיטאג א סעודה, אנשי שלומינו זענען זיך צאמגעקומען, מען האט געגעסן, געטרינקען און געטאנצן, איין יאר פורים זעט ר' מאיר ווי איינער זיצט אין דער זייט און וויינט, בשעת אלע טאנצן זיצט ער דארט אין א מרה שחורה, ר' מאיר האט דאס נישט געקענט סובל זיין. ער גייט צו צו אים און פרעגט אים: "זאגט מיר וואס גייט פאָר? היינט איז פורים, אלע טאנצן, אלע זענען פרייליך, פארוואס טאנצט איר נישט מיטן גאנצן עולם?!" דער איד הייבט אן קרעכצן: "ווי קען איך טאנצן ווען איך האב א צבי' אויפן קאפ? איך האב א טאכטער, זי איז שוין עלטער, זי דארף א שידוך, איך האב נישט קיין געלט איר חתונה צו מאכן, קיינער וויל זיך נישט משדך זיין מיט מיר, די טאכטער צבי' דרוקט מיר אויף מיין מח, איך הער נישט אויף טראכטן פון מיין צרה", ר' מאיר זאגט אים: "איר האט טאקע א גרויסע פראבלעם, אבער איז דאס דען די עצה? זיצן פארביטערט איז אן עצה?! דער רבי האט אונז געלערנט, אז מען האט א צרה - שרייט מען צום אייבערשטן, דער רבי האט אונז געלערנט, אז עס דרוקט אויפן הארץ - גיסט מען זיך אויס דאס הארץ צום אייבערשטן, קומט טאנצן מיט מיר, איך וועל אייך ווייזן וואס איר זאלט טון מיט צבי', איך וועל זאגן ווערטער צום אייבערשטן און איר וועט מיך נאך זאגן", ר' מאיר הייבט אן זאגן דעם פסוק: "צָרוֹת לְבָבִי הִרְחִיבוּ", מיינע צרות זענען אזוי שטארק, "מִמְּצוּקוֹתַי הוֹצִיאֵנִי", באשעפער זיסער העלף מיר, נעם מיך ארויס פון מיין פלאנטער"; ר' מאיר זאגט אים: "זאגט מיך נאך"; דער איד האט נאכגעזאגט און זיי האבן אנגעהויבן טאנצן, ביז דער איד איז זייער פרייליך געווארן, ער האט שוין נישט געשפירט צבי' אין זיין קאפ, ער האט אנגעהויבן שפירן דער אייבערשטן, און נאך פורים איז געשען א גרויסע נס, זי איז א כלה געווארן און חתונה געהאט און אויפגעשטעלט א שיינע שטוב.
ליבער ברודער אזוי זאלסטו טון, ביים טאנצן זאלסטו זיך אויסגיסן דיין הארץ צום אייבערשטן שריי: "צָרוֹת לְבָבִי הִרְחִיבוּ", מיינע צרות זענען אזוי שטארק, "מִמְּצוּקוֹתַי הוֹצִיאֵנִי", באשעפער זיסער העלף מיר, נעם מיך ארויס פון מיין פלאנטער, איך בין אזוי פארפלאנטערט ביים יצר הרע, ער פייניגט מיך מיט שלעכטע תאוות, הייליגער באשעפער העלף מיך, ראטעווע מיך".
דער אייבערשטער זאל העלפן זאלסט האבן הצלחה אין אלע ענינים.