בעזרת ה' יתברך - תשרי, שנת תשפ"ו לפרט קטן
... נרו יאיר, קרית ברסלב
איך בין מקנא דיין זכות, דיין כיבוד אב ואם, ווי דו זארגסט פאר דיין טאטע, ווי דו העלפסט אים מיט געלט פאר יום טוב, ווי דו געבסט אכטונג אויף זיין כבוד.
בזכות די גרויסע מצוה – וועסטו זוכה זיין צו אלע ברכות און אלע ישועות, ביים אייבערשטן איז די מצוה זייער גרויס. חכמינו זכרונם לברכה זאגן (קידושין ל:): "הִשְׁוָה הַכָּתוּב כְּבוֹד אָב וָאֵם לִכְבוֹד הַמָּקוֹם", דער אייבערשטער וויל מען זאל מכבד זיין עלטערן אזוי ווי מען איז אים מכבד.
מענטשן האבן נישט קיין השגה אין די מצוה, מען איז ליידער מזלזל אין דעם, מען אנטלויפט פון דעם, מען ווארפט עס צו די אנדערע געשוויסטער, און נאר שפעטער ווען עס איז שוין צו שפעט, מען קען שוין נישט טון די מצוה – דעמאלט האט מען חרטה.
זיי זיך מוסר נפש צו דאווענען די דריי תפילות מיט מנין, לכבוד די נייע יאר זאלסטו זיך פארלייגן צו דאווענען די דריי תפילות דוקא אין שול, און אז עס איז שוין נישטא קיין מנין – זאלסטו נאכאלץ גיין אין שול דאווענען.