בעזרת ה' יתברך - יום ה' פרשת ראה, כ"ה מנחם-אב, שנת תשפ"ד לפרט קטן
לכבוד ... נרו יאיר
איך האב זייער הנאה געהאט צו פארברענגען מיט דיר, הלואי וואלסטו געקומען מער אפט, וואלטן מיר זיך געקענט מער מחזק זיין מיט די עצות פון הייליגן רבי'ן; אז מען האלט זיך נאנט בדיבוק חברים - קען מען זוכה זיין צו גאר שיינע זאכן.
פארלייג זיך אויף די איין זאך, אויף זיין פרייליך, גיי א טענצל אפאר מאל א טאג, טאנץ נאך שחרית, טאנץ ביי די ארבעט, און אויך ווען דו קומסט אהיים גיי א טענצל. צינד אן לעבעדיגע מוזיק, ניגונים פון אמונה; ממלא כל עלמין וסובב כל עלמין, אלעס איז דער אייבערשטער און דער אייבערשטער איז אלעס; דאס זאל זיין דיין זאך, נאר שמחה.
איך פריי זיך יעדעס מאל איך זע דיך אדער ווען איך זע דיין שריפט.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה, א גוט געבענטשט יאר.