בעזרת ה' יתברך - ערב שבת קודש פרשת ויקרא, ו' ניסן, שנת תשפ"ה לפרט קטן
מיין טייערער ... נרו יאיר
דאס וואס דו פרעגסט מיר, אז זייט דו האסט דערציילט פאר דיינע חברים פון דיינע פארדינסטן - האט זיך אפגעשטעלט די שפע, אויב דאס האט איינס מיטן צווייטן; וויסן זאלסטו, אפילו ביי נאנטע מענטשן קען זיין אמאל א שלעכט אויג, און דאס קען אפשטעלן די שפע.
דעריבער פון היינט אן זאלסטו פרובירן וואס מער צו באהאלטן דיין הצלחה, ווייל חכמינו זכרונם לברכה זאגן (בבא מציעא מב.): "אין הברכה מצויה אלא בדבר הסמוי מן העין", די ברכה איז נישט חל נאר ביי זאכן וואס זענען פארשטעלט פון די אויג; וואס דארפן דיינע חברים וויסן וויפל געלט דו פארדינסט? וואס פעלט דאס אויס? וואס ווייסטו ווער איז דיר מקנא? און ווער עס שטעלט אפ די שפע פון קומען ווייטער? ווען מען פרעגט דיר וואס איז מיט דיין פרנסה, זאלסטו זאגן: "שכוח אייבערשטער איך קען לייגן ברויט אויפן טיש, שכוח אייבערשטער איך קען צאלן שכר לימוד"; מער דארפסטו נישט רעדן.
פארן אייבערשטן זאלסטו אלעס דערציילן, פינקטליך וויפיל געלט דו מאכסט און אים דאנקען און בעטן אויף ווייטער.
בזכות וואס דו ביסט אזוי שטארק מכבד דיינע טייערע עלטערן, דו געבסט אויף זיי זייער אכטונג - וועסטו זוכה זיין צו האבן גרויס הצלחה.
דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.