בעזרת ה' יתברך
יום א' פרשת אחרי ב', כ"ג ניסן, שנת תשע"ט לפרט קטן
... תחי', תלמידה בית פיגא ברסלב.
איך האב ערהאלטן דיין בריוו.
איך האב הנאה צו הערן אז עס איז דא אחדות צווישן אלע מיידלעך; מען פארברענגט צוזאמען מען טאנצט צוזאמען און מען שפילט צוזאמען, מיט דעם מאכט איר א נחת רוח פאר מוהרא"ש וואס האט מייסד געווען די סקול.
זע שטענדיג צו נוצן דיין מויל אויף גוטס; ווען דו זעסט א מיידל זאלסטו איר געבן א גוט ווארט. חכמינו זכרונם לברכה דערציילן (ויקרא רבה לג, ב): רבינו הקדוש האט אמאל געמאכט א סעודה פאר זיינע תלמידים און ביי די סעודה האט מען געגעבן צינג פלייש, עס איז געווען ווייכע צינג און הארטע צינג, ווען רבינו הקדוש האט געזען ווי די תלמידים זוכן צו נעמען די ווייכע צינג און נישט די הארטע, האט ער זיי געזאגט: "אזוי ווי איר זוכט גוטע און ווייכע צינג און איר נעמט נישט די הארטע צינג, אזוי זאלט איר נוצן אייער צינג פון מויל נאר צו רעדן גוט און שיין איינער צום צווייטן, און נישט רעדן שלעכט".
יעצט ווען דו ביסט נאך יונג דארפסטו נאך נישט זאגן מציאת הזיווג, ענדערש זאלסטו זאגן תהילים.
שרייב מיר יעדעס מאל וואס דו ביסט מסיים תהילים.
דער אייבערשטער זאל העלפן זאלסט מצליח זיין אין אלע דיינע וועגן.