בריוון פונעם ראש ישיבה שליט"א

בעזרת ה' יתברך - יום א' פרשת בא, כ"ט טבת, שנת תשפ"ו לפרט קטן

... תחי', תלמידה בית פיגא

איך האב ערהאלטן אייער בריוו.

שטארקט זיך מיט אלע אייערע כוחות, און אפילו עס זעט אייך אויס ווי אלעס איז טונקל, אלעס איז שווארץ, זאלט איר אויפזוכן אין די טונקלקייט דאס גוטס וואס דער אייבערשטער מאכט מיט אייך, דער רבי האט אונז געלערנט (לקוטי מוהר"ן חלק א, סימן קצה), מיר זאלן אויפזוכן דאס גוטס און דאנקען דעם אייבערשטן אויף דעם, דער רבי זאגט אז דאס איז געווען ווי אזוי דוד המלך האט זיך געקענט דערהאלטן אין זיינע צרות, ער האט שטענדיג געזוכט אויף וואס ער קען דאנקען דעם אייבערשטן, און אזוי האט ער זיך מחיה געווען און געווארן פרייליך און געקענט אנגיין אין לעבן.

העלפט אין שטוב אייער מאמע, און אז איר האט איבריגע צייט - זאלט איר זאגן תהילים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת וארא, כ"ה טבת, שנת תשפ"ו לפרט קטן

... תחי', תלמידה בית פיגא ירושלים

איך האב ערהאלטן אייער בריוו.

אויף אייער פראגע, וואס האט שובבי"ם מיט מיידלעך? די הייליגע צדיקים האבן געזען און געוואוסט וואס טוט זיך אין די הויכע הימלען, ווען עס זענען די צייטן וואס מען קען זיך גרינגער דערנענטערן צום אייבערשטן און אפלאזן אלע נארישקייטן, זיי האבן אונז אנטפלעקט א גרויסע סוד, אז די זעקס וואכן פון פרשת שמות, וארא, בא, בשלח, יתרו און משפטים (און אין אן איבער-יאר נאך צוויי וואכן, תרומה און תצוה) - איז א צייט וואס מען קען גרינגערהייט ווערן נאנט צום אייבערשן און אלעס פאררעכטן.

דערפאר איז אין די צייט א פאסיגע געלעגנהייט פאר יעדן איינעם פון גרויס ביז קליין - צו זאגן תהלים, זאגן תהלים ברענגט צוריק דעם מענטש צום אייבערשטן. דער רבי זאגט (לקוטי מוהר"ן חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה וכו', ווער עס וויל זוכה זיין תשובה צו טון, זאל זאגן תהלים; ווייל באמת וויל יעדער איד זיין אן ערליכער איד און טון דעם ווילן פונעם אייבערשטן, אבער נישט יעדער איז זוכה אויסצופירן זיין ווילן אויף למעשה, עס זענען דא מענטשן וואס האבן בכלל נישט קיין שום התעוררות תשובה צו טון, און אפילו דער וואס האט שוין יא א התעוררות תשובה צו טון, ווייסט נישט וואס צו טון זוכה זיין צו תשובה, און אפילו דער מענטש וואס האט יא א התעוררות תשובה צו טון און ווייסט וואס מען דארף טון צו ווערן אן ערליכער איד, דארף ער די חיזוק און עידוד אנצוגיין און נישט ווערן צעבראכן וכו' וכו'; זאגט דער רבי, אויב דער מענטש איז זוכה און ער זאגט תהלים, אפילו ער האט נישט קיין שום התעוררות, ווערט ער אבער נתעורר תשובה צו טון דורכדעם, "וְגַם זוֹכֶה עַל יְדֵי תְּהִלִּים לְהַגִּיעַ אֶל הַשַּׁעַר וְאוֹת הַשַּׁיָּךְ לוֹ, וְלִפְתֹּחַ הַשַּׁעַר; נִמְצָא שֶׁזּוֹכֶה עַל יְדֵי תְּהִלִּים לַעֲשׂוֹת תְּשׁוּבָה", און ער קען אנגיין מיט א מורא'דיגע שטארקקייט וכו', ביז ער איז זוכה תשובה צו טון און ווערן אן ערליכער איד.

זאלסטו זאגן יעדן טאג קאפיטלעך תהלים און ביים זאגן די פסוקים זאלסטו אריינפלעכטן אייגענע לויב ווערטער און בקשות אין דיין שפראך, דאס וועט אייך ברענגען צו ווערן א צדיקת.

זעט צו פאלגן די בית פיגא טיטשערס און אויסהערן אלעס וואס זיי לערנען מיט ענק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת שמות, י"ט טבת, שנת תשפ"ו לפרט קטן

... ירושלים

איך האב ערהאלטן אייער בריוו.

וויי געוואלד, ווי קענט איר זיין אזוי נאריש צו ווייטער רעדן מיט אייער פעטער דער מניוול וואס לויפט אייך נאך, וואס פרובירט אייך אנצוכאפן; וואס איז מיט אייך? וואס רעדט איר בכלל מיט אים? אויף וואס ווארט איר? עס זאל זיין דערנאך? איר זענט זעכצן יאר, איר דארפט גיין צו די חתונה ריין און הייליג; איר טארט מיט אים מער נישט רעדן און נישט גיין אין א פלאץ וואו ער געפינט זיך.

איך זאג אייך דעם אמת, איך האב געדארפט איבערליינען צוויי מאל די בריוו, ווייל עס איז נישט פארשטענדליך; ווי קען מען זיין אזוי נאיאוו צו זאגן אז עס פעלט ליבשאפט פון די טאטע, און דער פעטער ערפילט די ליבשאפט; אנטלויפט ווי מען אנטלויפט פון פייער, און איר זאלט גיין צו איינע פון אייערע לערערינס וואס איר שפירט אז זי וועט אייך מציל זיין פון אים.

דער אייבערשטער זאל רחמנות האבן אויף אידישע קינדער, אונזערע טעכטער זאלן זיין אפגעהיטן פון שלעכטס.

בעזרת ה' יתברך - יום ב' פרשת וישב, י"ח כסליו, שנת תשפ"ו לפרט קטן

לכבוד מיינע טייערע תלמידות שתחיו פון בית פיגא בני ברק

איך פריי זיך זייער צו הערן גוטע גריסן פון ענקערע טיטשערס, בעיקר אז ענק פירן זיך איידל מיט גרויס דרך ארץ, און עס איז דא אחדות צווישן ענק; דער אייבערשטער זאל ענק העלפן ענק זאלן מצליח זיין אין אלעס וואס ענק טוען.

איך וויל ענק בעטן א טובה וואס איז מיר זייער א חשוב'ע זאך און איך וועל זיך זייער פרייען אז איר וועט מיר דאס טון; איך וויל ענק בעטן ענק זאלן רעדן אין אידיש, און אפילו עס איז דא צווישן ענק שטיבער וואו מען רעדט נישט אידיש, זאלן ענק כאטש אין בית פיגא רעדן נאר אידיש; די שפראך אידיש איז הייליג, די שפראך האבן אונזערע עלטערן גערעדט אין אלע דורות, אין אלע צייטן, און איך וועל זיך זייער פרייען אז ענק וועלן רעדן נאר אידיש, און זיכער צווישן די ווענט פון בית פיגא.

איך ווארט יעדע וואך צו באקומען פון מרת לעווי בריוו פון ענק.

הצלחה רבה.

בעזרת ה' יתברך - יום א' פרשת וישלח, י' כסליו, שנת תשפ"ו לפרט קטן

... תחי', תלמידה בית פיגא טבריה

איך האב ערהאלטן אייער בריוו.

איר פרעגט אויב עס איז גוט איר זאלט רעדן ווייטער מיט די מיידל וואס רעדט נישט שיין צו איר מאמע, אויב דאס מיינט א נישט גוטע חבר'טע?

איר קענט ווייטער רעדן מיט איר, נאר אז איר וועט הערן ווי זי רעדט מיט גרינגשעצונג צו איר מאמע, זאלט איר זי פאררעכטן און זאגן: "א מאמע איז הייליג, צו א מאמע דארף מען רעדן מיט דרך ארץ"; זי ווייסט מן הסתם נישט דאס גרויסקייט פון א מאמע, אזוי ווי רוב קינדער ווייסן נישט די חשיבות און הייליגקייט פון א מאמע.

געבט איבער פאר אלע תלמידות פון בית פיגא טבריה אז איך פריי זיך זייער צו הערן די גוטע גריסן אז עס איז דא דרך ארץ צווישן ענק און עס איז דא אחדות צווישן ענק, איך בעט פאר ענקער הצלחה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן

... תחי'

איך האב ערהאלטן אייער בריוו.

אויף אייער פראגע וואס איר זאלט בעטן פאר אייער שוועסטער וואס נעבעך נעבעך זי לעבט מיט אן אראבער; איר זאלט בעטן נאר די איין זאך, זי זאל תשובה טון, זי זאל צוריק קומען צו די תורה.

אויף אייער פראגע וכו'; עס לוינט נישט צו לערנען די זאך. ענדערש זאלט איר זיך אריינלייגן צו טון מיט קינדער; מען קען אין די פעלד אויך שיין פארדינען, לערנען מיט קינדער אדער בעבי-סיט'ן קינדער; דאס איז א גוטע זאך פאר אייך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת נח, כ"ח תשרי, שנת תשפ"ו לפרט קטן

... נרו יאיר

לאז זיך נישט פאלן, לאז זיך נישט נאך, דער רבי האט אונז געלערנט: "אם נפלת, קמת", אז מען פאלט – הייבט מען זיך אויף; ווי אזוי הייבט מען זיך אויף? דורך רעדן צום אייבערשטן, דורך וידוי דברים.

טייערער ברודער, מאך זיך א צייט יעדן איינציגסטן טאג זיך מתבודד זיין, זיך אויסשמועסן דאס הארץ מיטן רבונו של עולם, דערציילט אים ווי דו פאלסט, דערצייל אים ווי שטארק דו ווילסט חתונה האבן, זיין ערליך, זיין הייליג, און ווי אזוי דו מוטשעסט זיך.

ברודער, וויסן זאלסטו, די תפילות פון בחורים און מיידלעך, ווי זיי וויינען צום אייבערשטן אז זיי ווילן זיין ערליך, די תפילות זענען זייער חשוב ביים אייבערשטן, עס ווערט א הערליכע בליטשקעדיגע קרוין פארן מלך מלכי המלכים, און דער אייבערשטער איז זיי מוחל אויף אלעס.

נאר שטארק זיך, נאר דערהאלט זיך.

זאג יעדן טאג די עשרה מזמורים, די צען קאפיטלעך תהילים [קאפיטל טז, לב, מא, מב, נט, עז, צ, קה, קלז, קנ], די תיקון הכללי וואס דער הייליגער רבי האט אונז אנטפלעקט.

בעזרת ה' יתברך - יום ב' פרשת כי תצא, ח' אלול, שנת תשפ"ה לפרט קטן

... תחי', תלמידה בית פיגא ירושלים

לכבוד אייער פופצנטע געבורטס טאג זאלט איר זיך מקבל זיין אנצוגרייטן נעגל וואסער און נישט אראפגיין פון בעט אן אפגיסן נעגל וואסער; נעגל וואסער איז זייער וויכטיג, עס מאכט הייליג, עס מאכט די טומאה זאל אוועקגיין.

איך וויל אייך זייער בעטן און אויך זאלט איר ווייזן דעם בריוו פאר אייער חבר'טעס, זיי זאלן אויך טון וואס איך בעט אייך; זוכט אויף די מיידלעך וואס קיינער וויל מיט זיי נישט שפילן, מיט זיי זאלט איר שפילן, מיט זיי זאלט איר שפאצירן; וועט איר זוכה זיין אז די שכינה הקדושה וועט זיין מיט אייך. אזוי ווי חכמינו זכרונם לברכה זאגן (שמות רבה ב, ב-ג), ווען דוד המלך איז געווען א יונגער בחור איז ער געווען א פאסטוך, פלעגט ער אלץ אכטונג געבן אויף די רחמנות'דיגע שעפעלעך און אויף די יונגע שעפעלעך זיי זאלן האבן וואס צו עסן. ער פלעגט קודם ארויסברענגען די קליינע שעפעלעך וואס זיי האבן נאך נישט קיין גרויסע ציין און קענען נישט עסן פון אונטן ביים ווארצל וואו עס איז הארט, זיי האט ער קודם ארויסגענומען זיי זאלן אפעסן די ווייכע תבואה. נאכדעם האט ער געעפנט די טיר פאר די עלצטע שאף וואס האבן שוין גרעסערע ציין זיי זאלן עסן פון די מיטלסטע חלק פון די תבואה, און נאכדעם האט ער ארויסגענומען די מיטעלע שאף וואס זיי האבן גאר שארפע ציין און קענען אויסרייסן די תבואה ביז די ווארצלען; האט דער אייבערשטער געזאגט פאר דוד: 'דוד, דו האסט רחמנות אויף די שעפעלעך, ביסטו ראוי צו זיין דער מנהיג ישראל', אזוי ווי עס שטייט (תהלים עח, עא) 'מֵאַחַר עָלוֹת הֱבִיאוֹ, לִרְעוֹת בְּיַעֲקֹב עַמּוֹ, וּבְיִשְׂרָאֵל נַחֲלָתוֹ'".

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת כי תצא, ח' אלול, שנת תשפ"ה לפרט קטן

... תחי', תלמידה בית פיגא טבריה

איך האב ערהאלטן אייער בריוו.

לכבוד אייער געבורטס טאג זאלט איר זיך מקבל זיין צו אנגרייטן נעגל וואסער איידער איר גייט שלאפן און נישט אראפגיין פון בעט אן אפגיסן נעגל וואסער.

ביים דאווענען זאלט איר נישט שמועסן מיט חבר'טעס און נישט זיין פארנומען מיט קיין שום זאך, שטעל זיך פאר איר שטייט פאר א גרויסע קעניג און איר רעדט מיט אים - וואלט איר זיכער נישט געטון קיין שום אנדערע זאך.

ביים רבי'ן איז געווען דער עיקר דאווענען, דער הייליגער רבי האט געזאגט: "מיין זאך איז תפילה", עס איז נישט געווען איין שמועס וואס דער רבי האט געשמועסט און נישט גערעדט פון תפילה. דער הייליגער רבי זאגט (לקוטי מוהר"ן חלק ב', סימן פד): "דַּע, שֶׁעִקָּר הִתְחַבְּרוּת וּדְבֵקוּת לְהַשֵּׁם יִתְבָּרַךְ הוּא עַל יְדֵי הַתְּפִילָּה", דורך תפילה ווערט מען איינס מיטן אייבערשטן, "כִּי הַתְּפִילָּה הוּא שַׁעַר, שֶׁדֶּרֶךְ שָׁם נִכְנָסִין לְהַשֵּׁם יִתְבָּרַךְ", תפילה והתבודדות איז די טויער אריין צו קומען צום אייבערשטן.

דער אייבערשטער זאל העלפן איר זאלט האבן הצלחה אין אלע עניינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת ואתחנן, י"ב מנחם-אב, שנת תשפ"ה לפרט קטן

צו די כלה ... תחי', תלמידה בית פיגא

איך וויל אייך בעטן איר זאלט נישט רעדן מיט חבר'טעס, אויך נישט מיט די כלות – פון וואס איר לערנט ביי די מנהלת, שיעורים פאר די חתונה; פירט זיך איידל, פירט זיך ערליך.

אויך איז נישט אזוי קלוג צו רעדן מיט די כלות פון אייער חתן.

זוכט אויף איידעלע פרענדס וואס רעדן איידל און ערוואקסן, נעמט זיך קלוגע חבר'טעס וואס רעדן נישט פון 'מיין חתן', מיין חתן אהער, מיין חתן אהין; קיינער איז נישט אינטערעסירט צו הערן פון אייער חתן, און אזוי אויך נאך די חתונה, נעמט זיך גוטע חבר'טעס וואס רעדן נארמאל און ערוואקסן.

בעזרת ה' יתברך - יום ג' פרשת ואתחנן, י"א מנחם-אב, שנת תשפ"ה לפרט קטן

... תחי'

אייערע עלטערן זענען געווען היינט ביי מיר, האב איך געטראכט אייך צו שרייבן אפאר ווערטער און שיקן די בריוו מיט זיי.

בעטס דעם אייבערשטן יעדן טאג פאר א גוטע ערליכע געזונטע פרייליכע בא'טעמ'טע מאן, בעטס אים יעדן טאג אויף דעם. א שידוך איז נישט א זאך וואס מען קען זיך וועלן אדער קויפן מיט געלט, א שידוך קומט פונעם אייבערשטן; און מיט תפילה, מיט אסאך תפילה – קען מען אויסבעטן אן ערליכער חתן, א חתן א תלמיד חכם, מיט גוטע מידות, מיט יראת שמים און מיט שכל.

איך הער פון אייערע עלטערן אז איר האט גוטע חבר'טעס פון בית פיגא, גוטע חבר'טעס איז זייער וויכטיג, ווייל אפילו מען איז שוין מקורב צום צדיק, מען איז מקושר צום רבי'ן – דארף מען נאכאלץ האבן א גוטע חברותא. די הייליגע חכמים זאגן (תענית ז.): "וּמֵחֲבֵרַי יוֹתֵר מֵרַבּוֹתַי", פון א גוטע חבר קען מען מער מקבל זיין פון א רבי, פארשטייט זיך אלעס בזכות דעם רבי'ן.

אויך זאלט איר זאגן יעדן טאג די אני מאמין; זאגט עס מיט די טייטש, דאס וועט אויפבויען אין אייך א שטארקע אמונה.

אויך זאלט איר העלפן אין שטוב, העלפט אייער מאמע. איר האט גאר חשוב'ע עלטערן; סיי אייער טאטע נרו יאיר און סיי אייער מאמע תחי' זענען זייער חשוב און זייער ספעציעל פאר מיר.

בעזרת ה' יתברך - יום א' פרשת עקב, ט"ז מנחם-אב, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

זאגט יעדן טאג די דרייצן אני מאמין, אויך שבת קודש זאלט איר זאגן די דרייצן אני מאמין; אזוי וועט איר האבן א שטארקע אמונה.

עס איז גוט איר זאלט זאגן די אני מאמין מיט די טייטש, אזוי וועט איר דאס פארשטיין, עס וועט ווערן איינגעקריצט אין אייער הארץ.

איך האף אז איר פירט זיך איידל, ווי עס פאסט פאר א "בית פיגא תלמידה"; רעדט נאר מיט גוטע חבר'טעס, רעדט נישט פון שידוכים, רעדט נישט פון חתונה האבן, רעדט נישט פון די זאכן, מאכט מיר א נחת רוח. איך האף צום אייבערשטן איר וועט טרעפן א גוטע ערליכע שידוך, אויפשטעלן א ליכטיגע שטוב וואו די שכינה וועט רוען.

אויך זאלט איר זיין דרך ארץ'דיג פאר אייערע טיטשערס, און פאר די מנהלת תחי'.

העלפט אייער מאמע תחי', איר האט זייער טייערע עלטערן.

בעזרת ה' יתברך - יום ב' פרשת מטות-מסעי, כ"ה תמוז, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

דאס וואס איר טראכט פון חתונה האבן, איר ווילט חתונה האבן, די מחשבות נעמען איבער אייער מח; דאס איז נארמאל, דאס איז די נאטור, אז מען וויל חתונה האבן, און מיטן אייבערשטנ'ס הילף וועט איר חתונה האבן, איר וועט באקומען א גוטע שידוך, אויפשטעלן אן ערליכע שטוב.

אבער איין זאך בעט איך זייער, איך בעט עס פון אייך און אזוי אויך פון אלע תלמידות בית פיגא, איך וויל נישט מען זאל רעדן צווישן די מיידלעך פון שידוכים, עס איז נישט קיין גוטע זאך און עס וועט מיר זייער וויי טון אויב ענק וועלן מיך נישט פאלגן, ענק וועלן רעדן צווישן ענק פון שידוכים, ווייל חכמינו זכרונם לברכה זאגן (שבת לג.): "הכל יודעין" וכו', טראכטן איז איין זאך, אבער ווער עס רעדט ניבול פה - וועט באקומען א גרויסע שטראף, דעריבער וויל איך ענק זאלן נישט רעדן פון שידוכים און פון חתונה האבן, אלס א גדר נישט צוקומען צו רעדן נישט גוטע זאכן.

איך האף איר וועט מיך פאלגן און אלע בית פיגא תלמידות וועלן מיך פאלגן, וועלן ענק נישט חרטה האבן, עס וועט ענק זיין גוט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת דברים, ב' מנחם-אב, שנת תשפ"ה לפרט קטן

... תחי', תלמידה בית פיגא בני ברק

איך פריי זיך זייער צו הערן פון אייערע עלטערן אז איר זענט א גוט קינד, איר העלפט און איר פירט זיך איידל, און ווען איר האט איבריגע צייט – זאגט איר תהילים.

זעט צו העלפן אייער מאמע, עס איז א גרויסע מצוה צו העלפן א מאמע, דאס איז די גרעסטע מצוה, דאס איז די גרעסטע סגולה, און מען איז גורם א שמחה אין אלע עולמות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת שלח, כ"א סיון, שנת תשפ"ה לפרט קטן

... תחי', תלמידה בית פיגא

לכבוד וואס איר טוט גראדואירן די אכט קלאסן פון בית פיגא, געב איך אייך א מתנה די ספר המידות, דער ספר וואס דער רבי האט געזאגט (חיי מוהר"ן, סימן שעט): "דער ספר האט מיך געמאכט פאר א איד". און אזוי ווי מיר האבן געהערט פון מוהרא"ש אז אפילו מען לערנט נישט אין בית פיגא קיין תורה מיט מיידלעך, איז אבער אנדערש די ספרים פון רבי'ן, וואס זענען איין שטיק מוסר, א מאגנעט וואס ציט און שלעפט צום אייבערשטן.

דער אייבערשטער זאל העלפן איר זאלט מיטנעמען מיט זיך די אכט יארן בית פיגא, וואס מען האט געלערנט מיט אייך די ריינע אמונה, צו וויסן און צו געדענקען אז אלעס וואס גייט אריבער אויף די וועלט בכלליות און אויפן מענטש בפרטיות - איז פונעם אייבערשטן, און נאר פאר דאס גוטס פונעם מענטש, און אפילו עס זעט אויס אמאל שווער, עס ווערט אמאל טונקל - דארף מען געדענקען אז דער אייבערשטער מאכט דאס נאר פאר אונזער טובה.

אויך זאלט איר מיט נעמען מיט אייך אייער גאנץ לעבן די זיסע עצה וואס איר האט געלערנט אין בית פיגא; די עצה פון שמועסן מיטן אייבערשטן. געדענק אז אויסער אייער טאטע האט איר נאך א טאטע, דער אייבערשטער, וואס איז די טאטע פון אונז אלע, און ווען איר דארפט עפעס זאלט איר זיך צו אים ווענדן, שמועסט מיט אים און בעטס אים, וועט איר זען וואונדער.

אויך זאלט איר מיט נעמען אין לעבן דאס שיינקייט פון אידישע טעכטער, צו גיין אנגעטון איידל און באשיידן, איר זאלט געדענקען דאס שיינקייט פון אידישע טעכטער. מיר זענען אין אמעריקע אבער מיר זענען נישט אמעריקאנער, מיר זענען אויסגעמישט צווישן די פעלקער אבער מיר זענען אידישע טעכטער; זאלט איר גיין מיט שטרימפ וואס זעט נישט אויס ווי די פיס, און אויך מיט קליידער וואס זענען נישט אויסגעשניטן, נישט קורץ און נישט געפאסט, איר זאלט מאכן א נחת רוח פארן אייבערשטן און פאר די צדיקים.

עס איז נישט מעגליך אראפצושרייבן די מסירות נפש וואס מוהרא"ש האט געהאט פאר אונז מיטן עפענען פאר אונז די סקול "בית פיגא", וויפיל טרערן מוהרא"ש האט פארגאסן פארן אייבערשטן אז מיר זאלן האבן די הייליגע בית פיגא שולע וואו די תלמידות וועלן ליב האבן צו זיין א איד, ליב האבן צו גיין אנגעטון איידל, ווי עס פאסט פאר די אידישע פאלק.

דער אייבערשטער זאל אייך געבן הצלחה.

בעזרת ה' יתברך - ערב שבת קודש פרשת אמור, י"ח אייר, ל"ג בעומר, שנת תשפ"ה לפרט קטן

... תחי', תלמידה בית פיגא בני ברק

זאגט יעדן טאג תהילים און ווען איר ענדיגט זאלט איר זיך פארצייכענען אינעם תהילים ווען און וויפיל מאל איר האט געענדיגט, און גלייך אנהויבן נאכאמאל.

אויך זאלט איר געדענקען אז איר זענט קיינמאל נישט אליין, דער אייבערשטער איז מיט אייך, ביי אייך און נעבן אייך, און איר קענט אים אלעס בעטן.

פון דער ראש ישיבה.

בעזרת ה' יתברך - ערב שבת קודש פרשת אמור, י"ח אייר, ל"ג בעומר, שנת תשפ"ה לפרט קטן

... תחי', תלמידה בית פיגא

זעט צו זאגן יעדן טאג תהילים, וועט איר ווערן א גרויסע צדיקת און זען גרויסע ישועות.

אויך זאלט איר רעדן צום אייבערשטן אויף אייער מאמע לשון, דאנקט אים און לויבט אים פאר אלע חסדים, און בעטס אים אלעס וואס איר ווילט.

פון דער ראש ישיבה.

בעזרת ה' יתברך - יום ה' פרשת אחרי קדושים, י' אייר, כ"ה לעומר, שנת תשפ"ה לפרט קטן

... תחי', תלמידה בית פיגא

איך האב ערהאלטן פון אייערע טיטשערס אז איר זענט זייער זייער וואויל, סיי אין דרך ארץ, סיי מיט גוטע מידות, איך בין זייער פרייליך צו הערן די שיינע גרוס, און איך קען קוים ווארטן צו טרעפן אייערע עלטערן און זיי איבער געבן די גוטע גרוס, זיי מחי' זיין.

ביים רבי'ן איז געווען זייער שטארק און וויכטיג מען זאל זיך פירן מיט "דרך ארץ". דער רבי האט געזאגט: "ווען קעניגן וואלטן געוואוסט וואס פאר א דרך ארץ איך לערן אויס פאר מיינע תלמידים, וואלטן זיי געשיקט זייערע קינדער צו מיר איך זאל זיי אויסלערנען דרך ארץ"; אז א מיידל פירט זיך אויף מיט דרך ארץ אין שטוב צו די עלטערן און אין שולע צו די טיטשערס - איז זי א ריכטיגע תלמידה פון בית פיגא און דאס הייסט א תלמידה פון היכל הקודש.

נעמט זיך פאר זיך צו באדאנקען פאר אלעמען. ווען די אידישע טיטשער ענדיגט לערנען מיט ענק - זאלט איר צוגיין איידעלערהייט און זאגן שכוח, ווען די ענגליש טיטשער ענדיגט לערנען - זאלט איר זיך באדאנקען פאר איר און זאגן שכוח, ווען די נייען טיטשער ענדיגט מיט ענק לערנען ווי אזוי צו נייען - זאלט איר זיך באדאנקען, און אזוי אויך ווען איר גייט אריבער די מנהלת - זאלט איר אלץ זאגן שכוח פאר אלעס, אויך ווען איר דארפט עפעס פון אפיס, איר זעט די סעקריטעריס - זאלט איר זיי שטענדיג באדאנקען.

אויך אין שטוב זאלט איר זאגן פאר טאטע מאמע: "שכוח פאר אלעס", אז איר וועט זיך אזוי צוגעוואוינען - וועט איר אויך האבן הכרת הטוב פארן אייבערשטן. ווייל נאר דער וואס האט הכרת הטוב פאר דער וואס טוט א טובה, דער געדענקט צו דאנקען און לויבן דעם אייבערשטן. ביי פרעה, דער קעניג פון מצרים שטייט – "אֲשֶׁר לֹא יָדַע אֶת יוֹסֵף" (שמות א, ח), ער האט זיך געמאכט ווי ער ווייסט נישט ווער יוסף הצדיק איז, ווער עס האט אים געראטעוועט, אים מיט זיין לאנד, און שפעטער שטייט (שם ה, ב): "לֹא יָדַעְתִּי אֶת ה'", איך ווייס נישט פונעם אייבערשטן; ווייל נאר דער וואס באדאנקט זיך - דער געדענקט פונעם אייבערשטן.

ווייזט דעם בריוו פאר אייערע חבר'טעס, אלע זאלן זיך אזוי פירן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת תזריע מצורע, א' דראש חודש אייר, ט"ו לעומר, שנת תשפ"ה לפרט קטן

... תחי', תלמידה בית פיגא

לכבוד אייער געבורטס טאג, איר זענט געווארן היינט זיבעצן יאר – זאלט איר זיך פארנעמען צו זיין זייער שטארק אין אפגיסן "נעגל וואסער"; נישט אראפטרעטן פון בעט אן אפגיסן נעגל וואסער, און אויך נישט גיין שלאפן אן אנגרייטן נעגל וואסער.

עס שטייט אין הייליגן זוהר, אז מען גיסט אפ נעגל וואסער ביים בעט ווערט מען הייליג, און אלע רוחות רעות און קליפות אנטלויפן פונעם מענטש.

אויך זאלט איר זיך שטארקן און זאגן תהילים, זינגט זיך די פסוקים פון תהילים און פלעכטס אריין אייגענע לויב ווערטער, און אייגענע געבעט, ווייל ביים אייבערשטן איז זייער טייער צו הערן אייגנארטיגע לויב ווערטער, פריש געמאכטע תפילות, עס שפאלט אלע הימלען.

זארגט נישט, אייער שידוך וועט שוין קומען.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

... תחי', תלמידה בית פיגא

איך האב ערהאלטן א בריוו פון אייער מאמע תחי', זי שרייבט, זי מיינט אז קיין איין מאמע האט נישט אזא טאכטער וואס העלפט מיט אזא גוטע געפיל און מיט אזא שמחה - אזוי ווי אייך, זי שרייבט אז איר האט אפגעקאכט עסן פאר די גאנצע יום טוב פסח, און געהאלפן אזוי סאך, און ווען אייער מאמע האט אייך געזאגט איר קענט גיין שפילן - האט איר זי געזאגט אז איר ווילט מיט נעמען די קליינע קינדער זיי זאלן איר נישט שטערן, זי זאל זיך קענען אפרוען, איר זארגט נאר פאר איר זי זאל האבן כח און נאר ווי איר קענט איר עפעס העלפן.

אויך שרייבט אייער מאמע אז ביים איינקויפן קליידער ווילט איר אלץ גיין איידל אנגעטון און איר פארלאנגט נישט קיין טייערע קליידער, איר זענט צופרידן מיט וואס זי געבט אייך.

איך בין זייער איבערגענומען פון אייך, איר מאכט א גרויסע נחת רוח פארן אייבערשטן, און בזכות וואס איר העלפט אייער מאמע זאלט איר האבן א זיסע און גוטע לעבן, איר זאלט טרעפן א גוטע שידוך און האבן ערליכע געזונטע דורות און איר זאלט זיין געזונט און שטארק.

זעט אויך אין סקול, אין בית פיגא - צו זיין פון די קינדער וואס העלפן די טיטשערס און די מנהלת מיטן זיין דרך ארץ'דיג, און ווען מען לערנט אדער מען טוט זאכן וואס די קינדער האבן נישט קיין נערווען – זאלט איר זיין פון די קינדער וואס זענען דא צו העלפן בויען בית פיגא און זיך פירן מיט גרויס דרך ארץ.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

... תחי'

איך פריי זיך צו הערן פון אייער אידיש טיטשער אז איר דאווענט שיין הויך אויפן קול; אוי ווי שיין ווען מען דאווענט צום אייבערשטן, אלע מלאכים זענען מקנא דעם איד אז ער קען יעדן טאג נאכאמאל דאווענען צום אייבערשטן ווען זיי קענען נאר איינמאל אין לעבן דאנקען דעם אייבערשטן.

טייערע ... תחי', איך וויל אזוי שטארק אז אלע אונזערע תלמידות פון בית פיגא זאלן דאווענען, אלע זאלן וויסן אז נאר דאס איז אונזער האפענונג, און אז מען קען אלעס באקומען אז מען דאווענט צום אייבערשטן.

ביי שמונה עשרה, איידער מען טרעט אויס, דארט איז א גוטע פלאץ זיך אויסצובעטן ביים אייבערשטן אין די אייגענע שפראך, זאלט איר נעמען די סידור און עס לייגן אויפן פנים, אזוי וועט איר נישט זען קיינעם און נישט ווערן געשטערט פון קיינעם, און בעטס שטילערהייט דעם אייבערשטן פאר אייער שידוך, פאר אייערע דורות, פאר אייער געזונט, פאר אייער אלעס; ווייל מיט תפילה, און נאר מיט תפילה - באקומט מען אלעס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת תזריע מצורע, ב' דראש חודש אייר, ט"ז לעומר, שנת תשפ"ה לפרט קטן

... תחי'

איך האב ערהאלטן אייער בריוו.

איך פריי זיך זייער צו הערן אז איר זאגט תהילים און איר האט שוין געענדיגט תהילים פינף און דרייסיג מאל; דאס איז א גרויסע זאך, צו הערן א קינד זאל האבן שכל צו זאגן תהילים, און ענדיגן אזויפיל מאל - נאך פאר די בת מצוה, פאר די צוועלף יאר.

לכבוד אייער בת מצוה זאלט איר זיך פארנעמען צו זאגן יעדן טאג די דרייצן אני מאמין, דאס וועט אויפבויען אייער אמונה; דאס זאל זיין די קבלה פאר די יאר, און די קבלה זאלט איר אנהאלטן אייער גאנצע לעבן.

אויך זאלט איר העלפן אייער מאמע אין שטוב מיט די קליינע קינדער, העלפן טאטע מאמע איז זייער זייער א הייליגע זאך. דער אייבערשטער זאגט (קידושין ל:), דער וואס איז מכבד טאטע מאמע - דער איז מיך מכבד, און דער וואס איז מכבד טאטע מאמע - דארט וויל איך וואוינען.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

... תחי', תלמידה בית פיגא

אייער זיידע האט מיר געברענגט א בריוו פון אייך, איר ווילט וויסן וואס זיך פארצונעמען לכבוד אייער געבורטס טאג, איר ווערט ניין יאר אלט.

לכבוד אייער געבורטס טאג זאלט איר זיך פארנעמען זיך אנצוגרייטן נעגל וואסער יעדע נאכט איידער איר גייט שלאפן, אויך זאלט איר אנגרייטן פאר אייערע עלטערן נעגל וואסער.

זעט זיך צו פירן מיט דרך ארץ פאר אייערע טיטשערס און פאר יעדן וואס איז עלטער פון אייך, גרוסט שיין יעדן איינעם און זייט מכבד יעדן איינעם, ווייל ביים הייליגן רבי'ן איז געווען דרך ארץ דאס וויכטיגסטע זאך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

... תחי', תלמידה בית פיגא

איך פריי זיך זייער צו הערן אז איר זענט א דרך ארץ'דיגע מיידל, איר פירט זיך מיט דרך ארץ און מיט איידלקייט, די מנהלת און אייערע טיטשערס זאגן אז איר זענט זייער וואויל.

איך וויל אייך בעטן, אויב איר זעט א קינד אין סקול אדער פון אייערע שכנים וואס קיינער שפילט נישט מיט איר, זאלט איר זי נעמען אין שפילן מיט איר, ווייל עס איז א גרויסע מצוה צו שפילן מיט די קינדער וואס מען באזייטיגט.

זאגט יעדן טאג אביסל תהילים, און ווען איר מאכט א סיום זאלט איר מיר דאס דערציילן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת צו, ח' ניסן, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

אזוי שיין צו הערן אז איר ליינט יעדע נאכט קריאת שמע שעל המיטה. חכמינו זכרונם לברכה זאגן (ברכות ח:) ווער עס גייט שלאפן אן קריאת שמע איז אזוי ווי ער שלאפט אין א גוי'אישע בעט, און דער וואס ליינט קריאת שמע איז אפגעהיטן פון אלע מזיקין (ברכות ה.).

ליינט יעדע נאכט קריאת שמע ביז כי אתה ה' מחסי. און ווען איר וועט עלטער ווערן וועט איר זאגן די גאנצע קריאת שמע.

אויך זאלט איר העלפן אייער מאמע, דער אייבערשטער האט ליב ווען מען איז מכבד א מאמע, ווען מען העלפט א מאמע. כיבוד אב ואם איז זייער הייליג, עס איז אזוי ווי מען איז מכבד דעם אייבערשטן. חכמינו זכרונם לברכה זאגן (קידושין ל:): "אָמַר הַקָּדוֹשׁ בָּרוּךְ הוּא, מַעֲלֶה אֲנִי עֲלֵיהֶם כְּאִלּוּ דַּרְתִּי בֵּינֵיהֶם וְכִבְּדוּנִי", ווען מען איז מכבד טאטע מאמע - זאגט דער אייבערשטער, איז עס אזוי ווי מען איז מיך מכבד. די הייליגע חכמים זאגן (שם לא:), אויפן הייליגער אמורא רב יוסף וואס איז געווען בלינד, ער האט נישט געקענט זען ווען זיין מאמע קומט אריין ער זאל זיך אויפשטעלן פאר איר, נאר ווען ער האט געהערט די קול פון אירע פיס טריט האט ער געוואוסט זיך אויפצושטעלן און געזאגט: "אֵיקוּם מִקַּמֵּי שְׁכִינָה דְּאָתְיָא", איך גיי זיך אויפשטעלן פאר די כבוד פון די שכינה.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.