בריוון פונעם ראש ישיבה שליט"א

בעזרת ה' יתברך - ערב שבת קודש פרשת שמות, י"ז טבת, שנת תשפ"ה לפרט קטן

... תחי'

איך האב ערהאלטן אייער בריוו.

אז עס איז אייך שווער די זאך פון זיך באשטימען א צייט צו מאכן התבודדות - זאלט איר אויף דעם אליין בעטן, בעטס אויף די זאך: "הייליגער באשעפער העלף מיר איך זאל קענען פאלגן דעם רבי'ן וואס האט געזאגט (לקוטי מוהר"ן חלק ב', סימן כה) אז מען זאל זיך באשטימען יעדן טאג א צייט און א פלאץ צו רעדן און שמועסן מיט דיר. הייליגער באשעפער יעדן טאג פארגעס איך, יעדן טאג איז דא אנדערע תירוצים, עס גייט אריבער די טעג און די יארן און איך פארגעס צו רעדן און שמועסן מיט דיר, איך בעט דיר, העלף מיר איך זאל קענען פאלגן דעם רבי'ן און מאכן יעדן טאג התבודדות, וואס דאס וועט מיך ברענגען זייער נאנט צו דיר".

בנוגע אויב דו זאלסט גיין מיט אן אפענע קנעפל ביים האלז; איר זאגט אז די מיידלעך ביי ענק אין קלאס, ווען מען לערנט ענגליש - עפענען זיך אלע די קנעפל; איר ווילט וויסן אויב עס איז צניעות'דיג?

איר ווייסט אוודאי אז אין ברסלב ענטפערט מען נישט דעם מענטש ווי אזוי ער זאל טון, מען זאגט אים נאר די זאך פון תפילה; ווייל אז מען זאגט דעם מענטש טו אזוי און אזוי, קען אמאל זיין אז דער מענטש האלט נישט ביי דעם, און דורך דעם קען יענער אוועק פאלן, עס קען ווערן שבירת הכלים; נאר די זאך פון תפילה, דאס ענטפערט מען ביי אנשי שלומינו.

דאס זאג איך אייך אויך, בעטס דעם אייבערשטן איר זאלט האבן א געפיל צו צניעות, איר זאלט בלייבן איידל. איר זענט אן איידל קינד, איר האט איידעלע עלטערן; זאלט איר בלייבן איידל, וועלן איידלקייט, ליב האבן איידל, ליב האבן די אידישע איידעלע חן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת ויחי, ח' טבת, שנת תשפ"ה לפרט קטן

... תחי', תלמידה בית פיגא

איר זענט א גוט קינד, איר זענט א טייער קינד, איך האף בקרוב וועט איר א כלה ווערן און אויפשטעלן א שיינע אידישע שטוב, וואו די שכינה וועט רוען, און ברענגען ערליכע דורות פארן אייבערשטן.

איך בעט אייך, האלטס אויס דאס ביסל אין סקול, פירט זיך מיט דרך ארץ, שטעלט זיך צו צו די סקול, ווען מען דאווענט - דאווענט מיט, און ווען מען לערנט - זאלט איר מיט האלטן, און אויך ווען מען נייט - זאלט איר מיט נייען, אפילו עס איז אייך גאר ווייניג אינטערעסאנט; דאס אליין איז די וויכטיגסטע זאך אין לעבן, זיך אויסלערנען אז מען טוט נישט נאר וואס מען וויל און וואס מען האט ליב, מען טוט וואס איז ריכטיג, מען טוט וואס מען דארף טון.

איך בעט אייך מיט מיין גאנצע הארץ, האלטס אויס ביז איר ווערט א כלה; א שאד דאס ביסל צייט וואס איר האט נאך - ארויס צו פאלן פון די ווארעמע היים "בית פיגא", אפילו עס איז אייך ביטער שווער. בעטס דעם אייבערטן א תפילה איידער איר גייט אריין אין קלאס: "רבונו של עולם, געב מיר די כוחות זיך איינצובייגן מיין רוקן ביין און מיין קאפ פאר די טיטשערס, רבונו של עולם געב מיר הכנעה, רבונו של עולם העלף איך זאל קענען פאלגן וואס שטייט דא אינעם בריוו".

מיטן אייבערשטנ'ס הילף וועט איר באלד טרעפן אייער שידוך, אבער איך בעט אייך פאלגט מיר.

בעזרת ה' יתברך - יום ד' פרשת ויחי, ח' טבת, שנת תשפ"ה לפרט קטן

... תחי'

איך בעט נאכאמאל, סיי אייך און סיי אייערע חבר'טעס, מען זאל נישט רעדן קיין ניבול פה. איך הער אז מען רעדט ווייטער פון בחורים, מען רעדט ניבול פה; אויב מען וועט אזוי ווייטער ממשיך זיין - וועל איך פארמאכן ענקער קלאס, ענק וועלן מער גארנישט האבן מיט בית פיגא.

אויך איז די דרך ארץ זייער נישט גוט, ענק לאכן זיך אויס פון די געטרייע טיטשערס; עס טוט מיר זייער וויי.

בעזרת ה' יתברך - יום ג' פרשת ויגש, א' דראש חודש טבת, ו' דחנוכה, שנת תשפ"ה לפרט קטן

... תחי'

איך האב ערהאלטן אייער בריוו.

איך האב זייער הנאה צו הערן אז איר האט זייער הנאה געהאט פון די שבת התוועדות מיט בית פיגא תלמידות, ווי איר האט געזען מיידלעך וואס זענען פרייליך, מען לעבט אן קיין דרוק, מען לעבט נישט פאר א צווייטן.

דאס וואס איר שרייבט אז איר זענט טרויעריג אז איר דארפט צוריק גיין צו אייער סקול וואו אלעס איז פרעשור וכו' וכו', און ווען איר בעט פון אייערע טייערע עלטערן צו קומען צו בית פיגא, זאגן זיי: "עס איז נאכנישט די צייט", איר פרעגט וואס איר קענט טון.

תפילה איז די עצה, בעטס דעם אייבערשטן איר זאלט זיין צוגעבינדן צום רבי'ן, לעבן מיט די עצות פון רבי'ן, בעיקר מיט די עצה פון שמחה. דער רבי זאגט (לקוטי מוהר"ן חלק ב', סימן כד), עס איז זייער א גרויסע מצוה צו זיין שטענדיג פרייליך, ווי אזוי איז מען פרייליך? ווי אזוי קומט מען צו די גרויסע מדריגה? דורך זוכן דאס גוטס וואס דער אייבערשטער טוט שטענדיג און ארויסזאגן מיטן מויל: "שכוח אייבערשטער" אויף די חסדים.

מאכט זיך א קביעות יעדן טאג צו דאנקען און לויבן דעם אייבערשטן אין אייער שפראך, אין אידיש, זאגט: "שכוח אייבערשטער איך בין א איד, שכוח אייבערשטער איך בין געזונט, שכוח אייבערשטער פאר מיינע טייערע עלטערן, שכוח אייבערשטער איך קען זען, שכוח אייבערשטער איך ווייס פון די עצות פון רבי'ן", און אזוי ווייטער.

דאס דאנקען און לויבן דעם אייבערשטן טראגט ארויס אלע פרעשור, מען פליט אריין אין גן עדן, מען ווערט פרייליך, מען ווערט אין א גוטע מוט.

בעטס דעם אייבערשטן איר זאלט קענען לערנען אין רבינ'ס סקול, און בעטס שוין פאר אייערע דורות, אלע זאלן זיין ביים רבינ'ס מוסדות, אייערע דורות זאלן לערנען און דאווענען, און איר זאלט זיי נישט שטערן, עס זאל זיין די שענסטע זאך אז מען טראגט דעם רבינ'ס נאמען, עס זאל נישט זיין קיין בושה.

געבט א גרוס פאר אייערע טייערע עלטערן.

בעזרת ה' יתברך - יום ג' פרשת וישב, ט"ז כסליו, שנת תשפ"ה לפרט קטן

... תחי', תלמידה בית פיגא טברי'

איך האב ערהאלטן אייער בריוו.

אה מחי' אז איר הויבט אן די טאג מיט דריי מינוט התבודדות; איין מינוט דאנקט איר דעם אייבערשטן, איין מינוט געבט איר אוועק פאר תשובה, און נאך א מינוט פאר תפילה ובקשה.

אין אמת'ן האט דער רבי געוואלט מיר זאלן א גאנצן טאג נאר רעדן צום אייבערשטן (חיי מוהר"ן, סימן תלח), אבער אז מען קען נישט - זאל מען זיך באשטימען א צייט, א שעה יעדן טאג - צו רעדן צום אייבערשטן, קומט מוהרא"ש און זאגט, הויב אן מיט אפאר מינוט און מיט די צייט וועט ווערן די גאנצע טאג ארום גענומען מיט רעדן צום אייבערשטן.

אזוי זאלט איר טון; הויבט אן מיט דריי מינוט, און מיט די צייט וועט איר מאכן נאך אמאל דריי מינוט, און נאכדעם פינף מינוט, און אזוי וועט די גאנצע טאג זיך ארומדרייען מיט טראכטן און מיט רעדן צום אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - מוצאי שבת קודש פרשת וישלח, י"ד כסליו, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

וואס איז די פראגע בכלל? אודאי זאלט איר נישט רעדן מיט די חבר'טע, ענדערש זאלט איר בלייבן אליין, נישט האבן קיין חבר'טע - ווי צו האבן א נישט גוטע חבר'טע וואס רעדט צו אייך פון בחורים און פון חתונה האבן וכו', א נישט גוטע חבר'טע קען פארלעשן די לעבן, און נאכדעם מוטשעט מען זיך זייער.

רעדט נישט מיט די שכינה, געבט אכטונג פאר אייער שיינע לעבן וואס ווארט אייך, א שאד צו רעדן מיט מיידלעך וואס זענען געפאלן און רעדן פון זאכן וואס איז נישט געמאכט צו רעדן; אלעס וואס איר דארפט וויסן פארן לעבן - וועלן אייערע עלטערן רעדן מיט אייך ווען איר וועט עס דארפן וויסן, אויך אייערע לערערינס וועלן רעדן מיט אייך ווען איר וועט א כלה ווערן און אויך שפעטער נאך די חתונה. געבט אייך אכטונג פון די געפאלענע שכנ'טע וואס מאכט אייך קראנק מיט רעדן פון בחורים וכו'.

איך האף איר וועט מיך פאלגן, ווייל איך וויל נאר אייער גוטס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויצא, ב' כסליו, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

זוכט אייך נישט קיין צרות, זוכט אייך נישט קיין פראבלעמען, קוקט נישט אויף פרעמדע בחורים און מענער, וואס דארפט איר צרות? אז איר גייט אין גאס אדער איר פארט מיט די באס – זאלט איר נישט קוקן אויף פרעמדע, אזוי וועט איר זיין אפגעהיטן פון צרות.

אז איר וועט זיך פירן בצניעות - וועט איר באקומען א גוטע חתן און זוכה זיין צו ערליכע קינדער. די הייליגע חכמים זאגן (מגילה יג:): "בִּשְׂכַר צְנִיעוּת שֶׁהָיְתָה בָּהּ בְּרָחֵל זָכְתָה וְיָצָא מִמֶּנָהּ שָׁאוּל", רחל אמינו האט זוכה געווען אז פון איר איז ארויסגעקומען דער גרויסער צדיק שאול המלך, וויבאלד זי האט זיך געפירט בצניעות, "וּבִשְׂכַר צְנִיעוּת שֶׁהָיָה בּוֹ בְּשָׁאוּל זָכָה וְיָצָאת מִמֶּנּוּ אֶסְתֵּר", און שאול המלך האט זוכה געווען - דורכדעם וואס ער האט זיך געפירט בצניעות - אז פון אים איז ארויסגעקומען די גרויסע צדיקת אסתר המלכה, און דער רבי זאגט (ספר המידות אות בנים, סימן ט): "הַצְּנִיעוּת שֶׁבְּאִשָּׁה מְזַכֶּה לָהּ לְבָנִים הֲגוּנִים", א פרוי וואס גייט אנגעטון צניעות'דיג וועט זוכה זיין צו גוטע קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת חיי שרה, י"ט מר-חשון, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

ערשטנס וויל איך אייך זאגן אז איך האב זייער הנאה צו הערן די שיינע גריסן אויף אייך פון אייערע לערערינס, ווי שיין איר פירט זיך מיט דרך ארץ, און פון אייערע גוטע מידות, איר מאכט מיר א נחת רוח.

אייערע עלטערן גייען אריבער שווערע צייטן, זיי זענען זייער געדרוקט אין געלט, זאלט איר זיי נאר העלפן, און חס ושלום נישט גיסן אויל צום פייער, זיך אפרעדן וכו'. בעטס דעם אייבערשטן פאר אייערע עלטערן זיי זאלן האבן שפע, און זייט נישט ברוגז אויף זיי אז זיי קויפן אייך נישט קיין קליידער, זיי זענען זייער געדרוקט. זייט מכבד אייערע עלטערן, אין דעם זכות וועט איר זען אז דער אייבערשטער וועט מאכן גרויסע ניסים מיט ענק, עס וועט קומען גרויס שפע, מען וועט קענען קויפן קליידער פאר די קינדער, און מען וועט קענען קויפן עסן, עס וועט שוין נישט זיין הונגער.

בתנאי אז איר וועט נאר העלפן אייערע עלטערן און נישט ארויס ווייזן פאר זיי אז איר זענט צעבראכן פון די מצב וואס הערשט אין שטוב, נאר העלפן און זיך פירן מיט גרויס דרך ארץ.

איר דארפט זיך זייער שטארקן, און גלייבן אינעם אייבערשטן, אז דער אייבערשטער מאכט נישט קיין שלעכטס, און נאך אביסל וועט זיך אלעס איבערדרייען לטובה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת לך לך, ד' מר-חשון, שנת תשפ"ה לפרט קטן

... תחי'

איך האב ערהאלטן אייער בריוו.

ערשטנס זאלט איר וויסן אז דער אייבערשטער פרייט זיך זייער ווען מען טוט תשובה, ער האט אזוי ליב די וואס ווארפן אוועק זייערע נישט גוטע מעשים און נעמען זיך פאר צו זיין גוט.

חכמינו זכרונם לברכה זאגן (יומא פו.): "גְּדוֹלָה תְּשׁוּבָה שֶׁמַּגַּעַת עַד כִּסֵּא הַכָּבוֹד", ווען א מענטש טוט תשובה קומט ער אן ביזן כסא הכבוד. חכמינו זכרונם לברכה זאגן (שמות רבה יט, ד) אויפן פסוק (איוב לא, לב): "'בַּחוּץ לֹא יָלִין גֵּר', אֵין הַקָּדוֹשׁ בָּרוּךְ הוּא פּוֹסֵל לִבְרִיָּה", דער אייבערשטער ווארפט נישט אוועק קיין שום מענטש, "אֶלָּא לַכֹּל הוּא מְקַבֵּל", מען נעמט יעדן איינעם צוריק "הַשְּׁעָרִים נִפְתָּחִים בְּכָל שָׁעָה", די טירן זענען שטענדיג אפן, "וְכָל מִי שֶׁהוּא מְבַקֵּשׁ לִכָּנֵס יִכָּנֵס", ווער עס וויל צוריקקומען צום אייבערשטן קען שטענדיג צוריקקומען צו אים.

אז ביי ענק אין די משפחה, ווער עס וויל זיין ערליך איז פארשעמט; א פילטער אויפן טעלעפאן איז א פארשעמטע זאך - זאלט איר זיך פירן מיט חכמה, דערציילט נישט קיינעם פון אייערע פריוואטע זאכן, גייט צו א געשעפט וואס לייגט ארויף א פילטער און לייגט די שטערקסטע פילטער, איר זאלט נישט קענען קוקן קיין מאוויס און נישט קענען האבן שייכות מיט שלעכטס, קיינער דארף נישט וויסן אז אייער טעלעפאן איז כשר מיט א שטארקע פילטער, טענה'ט נישט מיט קיינעם, ווייל די כח הטומאה איז ליידער זייער שטארק, זיי קומען מיט ליצנות און אזוי פארכאפט מען אין עבירות.

געוואוינט אייך צו, יעדן טאג צו מאכן דריי מינוט התבודדות, התבודדות מיינט רעדן צום אייבערשטן אזוי ווי מען רעדט צו א זייער נאנטע פריינד, מען דערציילט דעם אייבערשטן אלעס וואס מען גייט אריבער, מען דערציילט דעם אייבערשטן ווי שטארק מען וויל זיין גוט.

גייט אין א שטילע פלאץ, ווי למשל אין אייער פריוואטע צימער, אדער דאס גלייכן, פארמאכט אייך אייערע אויגן און רעדט אויפן קול, נישט צו הויך אבער גענוג הויך איר זאלט עס קענען הערן, און זאגט: "אייבערשטער איך וויל מיט דיר רעדן, איך וויל דיר דערציילן אלעס וואס אויף מיר איז אריבער"; דערציילט אים ווי שטארק איר ווילט זיין גוט און ווי דער יצר הרע האט אייך פארכאפט מיט אייערע נסיונות, בעטס אים ער זאל אייך געבן א גוטע שידוך, א וואוילער מאן וואס האט יראת שמים, וואס וועט גיין דאווענען און זיך מאכן א צייט צו לערנען, אזוי זאלט איר רעדן מיטן אייבערשטן. דאס רעדן צום אייבערשטן וועט אייך אפוואשן, דאס וועט אייך ברענגען צו האבן א שטארקע אמונה, און צו תשובה שלימה.

אויך זאלט איר יעדן טאג זאגן אביסל תהילים, אפאר קאפיטלעך תהילים; דאס וועט אייך העלפן טרעפן אייער שידוך און אויפשטעלן א שיינע שטוב.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת וזאת הברכה ב', י"ד תשרי, ערב סוכות, שנת תשפ"ה לפרט קטן

... תחי'

איך וויל אייך וואונטשן לכבוד אייער יום הולדת, איר ווערט היינט א 'בת מצוה', דער אייבערשטער זאל אייך געבן שיינע לאנגע געזונטע יארן, איר זאלט ברענגען אסאך אידיש נחת פאר אייערע עלטערן.

נעמט זיך פאר לכבוד אייער געבורטסטאג צו העלפן נאך מער אייערע עלטערן און זיי מאכן נאר נחת.

א גוט יום טוב.

בעזרת ה' יתברך - יום א' פרשת נח, כ"ה תשרי, שנת תשפ"ה לפרט קטן

... תחי'

איך פריי זיך זייער צו הערן ווי איר שטארקט זיך מיטן הייליגן רבינ'ס עצות, ווי דאס לעבן איז אייך געווארן שיין און זיס מיט די עצות און שכל פון רבי'ן, אייער כיבוד הורים איז געווארן אזוי גוט, אזוי אויך אייער צניעות, און זייט איר זענט מקורב צום רבי'ן האט איר באקומען אן עקל צו גיין אנגעטון ווי די אומות העולם.

בעטס דעם אייבערשטן איר זאלט טרעפן א שידוך א בחור וואס האט א געפיל אין הייליגן רבי'ן און וויל אויך אויפשטעלן א שטוב מיט די יסודות וואס מוהרא"ש האט אונז געלערנט, און אודאי און אודאי אז איר זענט גרייט זיך אפצושערן נאך די חתונה - זאלט איר אזוי טון, און אז מען רעדט אייך א שידוך קענט איר זאגן אז דאס איז אייער ווילן, איר ווילט ערליכע קינדער, איר ווילט נישט קיין קליפות אין שטוב, אזוי ווי מוהרא"ש און אלע צדיקים האבן אונז געלערנט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת וזאת הברכה א', ו' תשרי, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

זארגט נישט פאר אייער שידוך, ווייל אייער שידוך איז שוין אנגעגרייט נאך פון פאר איר זענט געבוירן, נאך פאר איר האט בכלל געטראכט פון חתונה האבן, און אז אייער מאמע זאגט אייך "פאר צוויי דריי יאר וועסטו נישט קיין כלה" – זאלט איר נישט צעבראכן ווערן, און חס ושלום זיך מתחצף זיין, ווייל די טאג וואס איר גייט חתונה האבן איז שוין אויך אנגעשריבן, אויך די פלאץ וואו אייער חתונה גייט זיין (אין ישיבה) – איז שוין אויך אנגעשריבן.

זארגט נישט, זייט ממשיך מיט אייערע גוטע מידות, און זייט מכבד אייערע עלטערן מיט די גרעסטע מאס דרך ארץ און כבוד, אפילו עס איז אייך שווער.

איר זאלט האבן א זיס יאר.

בעזרת ה' יתברך - יום ג' פרשת וזאת הברכה א', ו' תשרי, שנת תשפ"ה לפרט קטן

... תחי'

איך האב ערהאלטן אייער בריוו.

איך פריי זיך זייער צו הערן אז איר האט ליב געהאט בית פיגא קעמפ, און אז איר בענקט זיך זייער צוריק צו קומען אין בית פיגא.

אויף די פראגע וואס איר זאלט טון ווען איר הערט אין אייער שולע ווי מען רעדט שטותים וכו'; איר זאלט זיך פירן מיט דרך ארץ און שטילערהייט אין אייער הארץ זאלט איר דאנקען דעם אייבערשטן אז איר זענט מקורב צום רבי'ן און איר ווייסט אז דער אייבערשטער האט אונז ליב און ער הערט אויס אונזערע תפילות און יעדער איינער קען זיין נאנט צום אייבערשטן דורך תפילה און התבודדות, און שטילערהייט זאלט איר בעטן: "רבונו של עולם, וועט וועט שוין די גאנצע וועלט זוכה זיין צו וויסן פון די ליכטיגקייט פון רבי'ן".

אויף אייער צווייטע פראגע, ווען איר ליינט קריאת שמע מיט אייערע קליינע געשוויסטער, אויב איר מעגט איבערליינען קריאת שמע של אריז"ל איידער איר לייגט זיך שלאפן; דער ענטפער איז יא, אוודאי, מען מעג ליינען אפאר מאל קריאת שמע, יעדע מאל מען ליינט קריאת שמע האט מען נאכאמאל א מצוה.

זייט זיך מקבל לכבוד די נייע יאר צו מקרב זיין די מיידלעך אין סקול וואס האבן נישט קיין חבר'טעס, די מיידלעך וואס מען שטופט זיי אוועק, זיי קומען נישט אנגעטון רייך וכו'; זיי זאלסטו מקרב זיין, וועט דער אייבערשטער אייך מקרב זיין.

א זיסע יאר.

בעזרת ה' יתברך - יום ג' פרשת כי תבוא לאומאן, י"ד אלול, שנת תשפ"ד לפרט קטן

... תחי', תלמידה בית פיגא

איך הער פון די טיטשערס און פון די פרינציפל זייער שיינע זאכן אויף אייך, זיי זאגן אלע אז איר זענט א דרך ארץ'דיגע מיידל מיט גוטע מידות.

דאס ווייסט איר אוודאי אז דער הייליגער רבי האט אנטפלעקט די סוד ווי אזוי ער האט זוכה געווען צו ווערן אזא גרויסער צדיק, נאר ווייל ער האט זיך געפירט בתמימות ופשיטות און אסאך גערעדט צום אייבערשטן, און דער רבי האט געזאגט אז ווער עס וועט דאס טון וועט אויך ווערן א גרויסער צדיק; זאלט איר יעדן טאג אראפנעמען אפאר מינוט און רעדן צום אייבערשטן און שמועסן מיט אים אזוי ווי מען שמועסט מיט א גוטער פריינד, וועט איר זייער מצליח זיין אין לעבן.

ווייזט דעם בריוו פאר אייערע טייערע עלטערן, זאלן זיי האבן א פארגענוגן אז זייער טאכטער איז א דרך ארץ'דיגע מיידל און האט גוטע מידות.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת כי תבוא לאומאן, י"ב אלול, שנת תשפ"ד לפרט קטן

... תחי', תלמידה בית פיגא

אז איר וועט זיך אויפפירן מיט דרך ארץ, איר וועט מיטהאלטן אלעס וואס די סקול פארלאנגט - וועט איר מיר מאכן א נחת רוח.

איר האט מיר געזאגט אז איר ווילט א גוטע שידוך, א בחור א ירא שמים, איר ווילט א מאן וואס וועט דאווענען מיט מנין וכו'; איר קענט זוכה זיין צו דעם אויב איר וועט בעטן דעם אייבערשטן יעדן טאג אויף דעם: "רבונו של עולם איך דארף אן ערליכער מאן, איך דארף א מאן א ירא שמים, א מאן וואס וועט דאווענען און לערנען, הייליגער באשעפער איך וויל א מאן וואס וועט פרעגן יעדע זאך א דיין, אן ערליכער איד".

איך בעט אייך זייער, האלטס מיט די דאווענען אין סקול, קוקט נישט ארויס פון סידור, לאכט נישט צו קיינעם, טראכטס ווי איר שטייט יעצט אין גן עדן און איר רעדט צום אייבערשטן, און אלע מלאכים שטייען ארום אייך, און זענען מקנא ווי איר קענט דאווענען וויפיל איר ווילט, און זיי קענען נאר איין מאל דאווענען, און מער נישט.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תצא, ז' אלול, שנת תשפ"ד לפרט קטן

... תחי', תלמידה בית פיגא

איך הער זייער שיינע גריסן אויף אייך פון אייערע לערערינס, ווי שיין איר פירט זיך אויף, מיט דרך ארץ און מיט גוטע מידות.

לייגט אריין אייער גאנצע הארץ אין דאווענען, בית פיגא תלמידות דארפן דאווענען מיט די גאנצע הארץ. דער הייליגער רבי האט געזאגט: "מיין זאך איז תפילה", עס איז נישט געווען איין שמועס וואס דער רבי האט געשמועסט און נישט גערעדט פון תפילה. דער הייליגער רבי זאגט (לקוטי מוהר"ן חלק ב', סימן פד): "דַּע, שֶׁעִקָּר הִתְחַבְּרוּת וּדְבֵקוּת לְהַשֵּׁם יִתְבָּרַךְ הוּא עַל יְדֵי הַתְּפִילָּה", דורך תפילה ווערט מען איינס מיט'ן אייבערשטן, "כִּי הַתְּפִילָּה הוּא שַׁעַר, שֶׁדֶּרֶךְ שָׁם נִכְנָסִין לְהַשֵּׁם יִתְבָּרַךְ", תפילה והתבודדות איז די טויער אריין צו קומען צום אייבערשטן.

ווייזט דעם בריוו פאר אייערע חבר'טעס, זיי זאלן האבן חיזוק אויף תפילה.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת כי תצא, ז' אלול, שנת תשפ"ד לפרט קטן

... תחי', תלמידה בית פיגא

איך פריי זיך צו הערן פון די מנהלת אז איר האט געבעטן איר ווילט העלפן די סקול פאר די קומענדיגע יאר און איר ווילט ווערן א טיטשער; דאס ווייזט אז איר האט א שטארקע געפיל פאר בית פיגא, איר האט א שטארקע הכרת הטוב, למעשה די יאר דארפן מיר נישט נאך טיטשערס, די יאר האבן מיר שוין גוטע טיטשערס.

וויסן זאלט איר, אויך ווען מען איז נאך אין קלאס - קען מען העלפן בויען די סקול, דורך זיך צושטעלן צו אלעס וואס די סקול זאגט. איר קענט מיר די יאר העלפן בויען בית פיגא דורך זיין א תלמידה וואס האלט מיט אלעס וואס מען פארלאנגט; סיי ביים דאווענען, מיט צו דאווענען מיט די גאנצע הארץ, סיי ביים לערנען, אויסהערן און מיטהאלטן, סיי ביים טאנצן, זיין א חלק פון די סקול, און ביים עסן, מיט עסן און נישט אוועק מאכן די עסן וכו'.

מיטן אייבערשטנ'ס הילף וועט איר נאך זיין א טיטשער ביי אונז אין בית פיגא, אדער קומענדיגע יאר, אדער שפעטער, אבער אז עס אינטערעסירט אייך אזוי שטארק בית פיגא, איר ווילט אויפבויען און העלפן - דארפט איר נישט ווארטן ביז איר וועט באקומען עמטליך א פאסטן, איר קענט שוין יעצט העלפן.

ביים דאווענען זאלט איר נישט ארויסקוקן פון סידור, עס זאל אייך נישט אינטערעסירן קיין איין מיידל; קוקט נישט אויף קיינעם, קוקט אין סידור און בעט פאר אייך און פאר אייערע דורות. בית פיגא תלמידות דארפן דאווענען מיט די גאנצע הארץ, ווייל דעם רבינ'ס זאך איז תפילה, דער רבי זאגט (לקוטי מוהר"ן חלק ב', סימן צג): "מיין גאנצע זאך איז תפילה"; מיט דעם וועט איר מיר מאכן א נחת רוח.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת עקב, ט"ז מנחם-אב, שנת תשפ"ד לפרט קטן

... תחי'

איך וויל אייך בעטן איר זאלט גיין העלפן אייער שוועגערין ... תחי' אין די טעג וואס די מענער פארן קיין אומאן אויף ראש השנה; די גרעסטע זכות פאר אייך פארן יום הדין - אז איר וועט טון חסד מיט אידישע מאמעס וואס קענען זיך נישט באפארען מיט די קליינע קינדער.

דער גרויסער צדיק רבי משה לייב סאסובער זכותו יגן עלינו איז געווען אויפן וועג צו שול צו כל נדרי, האט ער געהערט א געוויין, ער איז נאכגעגאנגען דאס געוויין און געזען אן ארעמע פרוי אן אלמנה, מיט קליינע קינדער - האבן נישט קיין הייצונג, איז ער געגאנגען זארגן פאר זיי, און שפעטער האט ער געזאגט פאר די מתפללים אז דאס איז אין הימל חשוב'ער פון די גרעסטע מדריגות, מחי' זיין א איד איז אין הימל די חשוב'סטע זאך.

נאך אביסל וועט איר א כלה ווערן, חתונה האבן און זיין א מאמע, דעמאלט וועט איר פארשטיין דאס חשיבות פון העלפן יונגע ווייבלעך, אידישע מאמעס - מיט די קינדער.

אז איר האט צייט אדער צו זאגן תהלים אדער צו העלפן אייערע געשוויסטער - זאלט איר גיין העלפן אייערע געשוויסטער מיט די קליינע קינדער, און אז איר האט צייט אדער צו זאגן תהלים אדער צו שמועסן מיט פרענדס - דעמאלט זאלט איר נעמען דעם תהלים און בעטן פאר זיך.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת מטות מסעי, כ"ב תמוז, שנת תשפ"ד לפרט קטן

... תחי', תלמידה בית פיגא ליבערטי

איך האב ערהאלטן אייער בריוו.

איך בין פרייליך צו הערן אז איר זענט צופרידן פון סקול און איר האט ליב אייערע טיטשערס.

אויך פריי איך זיך צו הערן אז איר זאגט תהילים, און אז איר האט שוין דריי מאל געענדיגט ספר תהילים.

וואס איר דארפט זאלט איר בעטן פונעם אייבערשטן, רעדט צו אים, בעטס אים אין אייער שפראך.

בעזרת ה' יתברך - יום ב' פרשת דברים, ראש חודש מנחם-אב, שנת תשפ"ד לפרט קטן

... תחי', תלמידת בית פיגא

עס זאל אייך נישט וויי טון אז איר האט נישט קיין בעסטע פרענד, עס איז נאר א מעלה אז מען האט נישט א חבר'טע וואס איז צו נאנט, אזוי וועט איר קענען נאנט ווערן מיט אייער מאן וכו'.

נעמט אייך דעם ספר תהלים פאר אייער בעסטע פריינד; זאגט יעדן טאג תהלים, און פלעכטס אריין אייערע אייגענע לויב ווערטער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת דברים, ב' מנחם-אב, שנת תשפ"ד לפרט קטן

... תחי', תלמידה בית פיגא

איך האב ערהאלטן אייער בריוו.

אז איר גייט אין גאס און א בחור פרעגט אייך וויפיל אזייגער עס איז, זאלט איר זיך נישט וויסנדיג מאכן, נאר גייט ווייטער; זייט עקסטרעם אפגעהיטן, רעדט נישט מיט קיין שום פרעמדער מאן אדער בחור.

דרייט זיך נישט אין די גאס, דרייט זיך נישט וואו מענער גייען – וועט איר טרעפן א גוטע ערליכע שידוך, מיט הייליגע קינדער. חכמינו זכרונם לברכה זאגן (תנחומא וישלח, ו): "כְּשֶׁהָאִשָּׁה מַצְנַעַת אֶת עַצְמָהּ בְּתוֹךְ הַבַּיִת", א פרוי וואס פירט זיך איידל, זי גייט נישט אין גאס וואו מענער גייען, "רְאוּיָה לְהִנָּשֵׂא לְכֹהֵן גָּדוֹל", איז זי ווערד צו באקומען א מאן א צדיק, "וְתַעֲמִיד כֹּהֲנִים גְּדוֹלִים", און קינדער צדיקים.

די שענסטע זאך ביי אידישע טעכטער איז - זיך פירן איידל, אזוי ווי חכמינו זכרונם לברכה זאגן (בראשית רבה יח, ב): "וְעַל כָּל אֵבָר וְאֵבָר שֶׁהָיָה בוֹרֵא בָהּ", ווען דער אייבערשטער האט באשאפן חוה, "הָיָה אוֹמֵר לָהּ", האט ער גערעדט צו אירע אברים און געזאגט, "תְּהֵא אִשָּׁה צְנוּעָה, אִשָּׁה צְנוּעָה", זיי אן איידעלע פרוי, פיר זיך איידל, נאר אז דו וועסט זיין איידל - באשאף איך דיר.

בעטס דעם אייבערשטן: "הייליגער באשעפער, געב מיר א טעם אין איידלקייט, געב מיר ליבשאפט צו איידלקייט, איך זאל ארויפקוקן איידלקייט".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת מטות מסעי, כ"ה תמוז, שנת תשפ"ד לפרט קטן

... תחי'

אייער מאמע תחי' האט מיר געשריבן אז איר זענט נישט צופרידן אין סקול, מיידלעך טשעפען אייך וכו'.

איך בעט אייך זייער, שטארקט זיך, ווערט נישט צעבראכן און נישט צעפאלן, און ווארטס נישט מען זאל אייך מקרב זיין, זייט איר די וואס איז מקרב אנדערע, און אז מען מאכט אייך אוועק וכו' - זאל אייך דאס נישט באדערן, איר זאלט טראכטן 'נעבעך אויף מיידלעך וואס מאכן אוועק אנדערע'; זייט נישט אנגעהאנגען אויף קיינעם, זייט נישט קיין נצרך לבריות.

זוכט אויף אין סקול איידעלע מיידלעך וואס לאכן נישט פון אנדערע, נעמט זיי פאר חבר'טעס, און קיינמאל זאלט איר נישט טשעפען א צווייטן, זייט מקרב די קינדער וועם מען שטופט אין דער זייט, אנגעהויבן מיט זיך אליין, זייט זיך מקרב, געבט זיך גוטע ווערטער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת בהעלותך, י"ד סיון, שנת תשפ"ד לפרט קטן

... תחי', תלמידה בית פיגא

איך האב ערהאלטן אייער בריוו.

אייער טענה איז, פארוואס געבן די לערערינס ביי אונז אין בית פיגא סקול, מער גוטע ווערטער פאר די קינדער וואס פירן זיך נישט אזוי מיט דרך ארץ, און איר און די תלמידות וואס מאכן נישט קיין פראבלעמען, זיי פירן זיך מיט גרויס דרך ארץ - באקומען נישט קיין גוטע ווערטער.

איר זענט גערעכט, הונדערט פראצענט גערעכט, אייך קומט נאך מער גוטע ווערטער און מער קאמפלימענטן פארן זיין די איידלסטע מיידל און קלאס און זיך אזוי שיין אויפפירן מיט דרך ארץ, איך וועל רעדן מיט אייערע לערערינס מען זאל אייך געבן נאך מער גוטע ווערטער.

איך וויל אייך אבער דערציילן א מעשה וואס האט פאסירט ביים רבינ'ס טאכטער, די צדיקת אדל. זי האט באקומען א בריוו פון איר טאטע - דער הייליגער רבי - מיט גאר שיינע טיטלען, ווען זי האט געליינט די בריוו האט זי געוויינט, זי האט געזאגט: "איך האב געהערט פון טאטן אז ווען א מענטש איז אין א קטנות הדעת דארף מען אים אויסרימען און אויסלויבן, און אז איך זע אז מיין טאטע שרייבט מיר אזעלכע טיטלען איז א סימן אז איך בין בקטנות הדעת"; דאס איז אן ענטפער פארוואס מען געבט איינעם מער גוט ווערטער און איינעם ווייניגער גוטע ווערטער און קאמפלימענטן.

שטארקט זיך ווייטער מיט אייער דרך ארץ און זייט פון די תלמידות וואס רעדן נישט ווען א טיטשער רעדט, און פאלגן אלעס די טיטשער - וועט איר מאכן א נחת רוח פאר אייערע עלטערן, און איר וועט מצליח זיין אין לעבן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - ערב שבת קודש פרשת בחוקותי, מברכים החודש, כ"ג אייר, ל"ח לעומר, שנת תשפ"ד לפרט קטן

... תחי'

איך האב ערהאלטן אייער בריוו.

נעמט אייך אריין אין קאפ אז אייער שידוך האט נישט מיט קיינעם, נאר מיטן אייבערשטן. עס איז א רחמנות אויב מען טראכט 'מיין שידוך איז אנגעהאנגען אין א בשר ודם'; אייער שידוך האט מיט קיינעם נישט, נאר מיטן אייבערשטן.

גייט יעדן טאג התבודדות; גייט אין א ווינקל, אין א שטילע פלאץ און שמועסט מיטן אייבערשטן. בעטס אים: "הייליגער באשעפער עס איז מיר אזוי שווער, איך קען נישט זיין אליין, איך וויל מיין שידוך", דערציילט אים אלע שידוכים וואס מען טראגט אן און אז אייערע עלטערן זאגן אלעס אפ, שמועסט מיט אים אזוי ווי מען שמועסט מיט א מטפל; מען דערציילט יעדע פינטל פון לעבן, יעדע מחשבה, יעדע בזיון, יעדע אטעם - וועט איר זען ניסים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת במדבר, כ"ח אייר, מ"ג לעומר, שנת תשפ"ד לפרט קטן

... תחי', תלמידה בית פיגא

איך האב ערהאלטן אייער בריוו.

דאס וואס איר שרייבט אז מענער קוקן אויף אייך און בחורים קוקן אויף אייך; דאס קומט ווייל איר קוקט אויף זיי, וועט איר נישט קוקן אויף פרעמדע מענער און פרעמדע בחורים - וועלן זיי נישט קוקן אויף אייך.

אז איר זענט אויפן וועג צו סקול, אויפן באס אדער אויפן גאס – זאלט איר נישט קוקן אויף קיין פרעמדער בחור אדער מאן, וועט קיינער נישט קוקן אויף אייך.

אז איר גייט אין גאס און א פרעמדער געבט אייך א זאג א ווארט – זאלט איר זיך נישט וויסנדיג מאכן; נישט אוועק לויפן און אויך נישט זיך אויסדרייען. גייט מיט זיכערע טריט, גייט מיט אמונה, גייט מיט שמחה – וועט איר זיין אפגעהיטן פון אלעם שלעכטס.

אויך וועגן דער שכן דער בחור וכו'; אויב איר שפירט ווי איר קענט מער נישט, די נסיון איז גאר ביטער – זאלט איר רעדן צו אייערע עלטערן, זיי וועלן אייך העלפן זיך היטן ביז איר טרעפט אייער שידוך.

דער אייבערשטער זאל העלפן איר זאלט האבן הצלחה אין אלע ענינים.