בעזרת ה' יתברך - יום ב' פרשת יתרו, י"ב שבט, שנת תשפ"ה לפרט קטן
מיין טייערע טאכטער ... תחי'
איך האב ערהאלטן דיין בריוו.
איך פריי זיך אז דו העלפסט מאמי; די גרעסטע און הייליגסטע זאך ביי אידישע קינדער - איז העלפן א מאמע, מאכן א נחת רוח פאר די מאמע; מיט דעם קויפט מען זיך איין עולם הבא, און אויך אויף די וועלט וועט מען האבן אלע ברכות.
אויך פריי איך זיך זייער צו הערן פון דיין טיטשער אז דו האסט גוטע מידות, דו טשעפעסט נישט אנדערע, דו האסט א געפיל פאר אנדערע. גוטע מידות און א ווייכע הארץ - דאס איז ברסל"ב, די אותיות פון ל"ב בש"ר, א ווייכע הארץ, א הארץ מיט א געפיל פאר אנדערע; אזוי ווי דער הייליגער רבי זאגט (חיי מוהר"ן, סימן שלט), ווען משיח וועט קומען וועלן אלע זיין ברסלב'ע חסידים, אזוי ווי עס שטייט (יחזקאל לו, כו): "וְנָתַתִּי לָכֶם לֵב חָדָשׁ וְרוּחַ חֲדָשָׁה אֶתֵּן בְּקִרְבְּכֶם, וַהֲסִרֹתִי אֶת 'לֵב הָאֶבֶן' מִבְּשַׂרְכֶם וְנָתַתִּי לָכֶם 'לֵב בָּשָׂר'"; לב בשר איז די זעלבע אותיות ווי ברסלב.
דער אייבערשטער זאל העלפן זאלסט האבן הצלחה אין אלע ענינים.