בעזרת ה' יתברך
יום ד' פרשת בלק, י"ג תמוז, שנת תשפ"א לפרט קטן
לכבוד מיין ליבער ... נרו יאיר
מלמדות איז א 'חכמה ואינה מלאכה', מען דארף וויסן ווי אזוי צו כאפן די הערצער פון די קינדער – זיי זאלן פאלגן און טון וואס מען דארף.
בנוגע די צוויי קינדער וואס זיי האבן דיר געשטערט און נישט געפאלגט; איך ווייס נישט וואס איז פשט, ווייל די צוויי בחורים זענען א גאנץ יאר אזוי ליכטיג און טייער; זיי פאלגן, עס איז נישטא קיין ארבעט מיט זיי.
עס קען זיין זיי זוכן א שמייכל פון זייער נייער מלמד, א גוט ווארט, אביסל אויפמערקזאמקייט וכדומה; זאלסטו מיט חכמה געבן פאר אלע קינדער פריוואט ווארעמקייט, בפרט פאר הבחור ... נרו יאיר. ער האט שוין געהאט פיר מאמעס, פרוביר צו טראכטן ווי זיין הערצעלע איז צעריסן, יעצט האט זיך זיין טאטע גע'גט צום פערטן מאל. ער איז א טייער קינד, א שטיק גוטס; ער שטערט דיר בשעת'ן לערנען נאר ווייל ער וויל דיין גוט ווארט, דיין שמייכל.
איך בעט דיר און איך פארלאנג פון דיר זאלסט נוצן חכמה, נישט ארבעטן שווער.