בעזרת ה' יתברך - יום ד' פרשת ואתחנן, י"ב מנחם-אב, שנת תשפ"ה לפרט קטן
מרת ... תחי'
גייט צו אייערע עלטערן, און אז זיי פירן זיך קאלט צו אייך וכו' צוליב אייער התקרבות צום רבי'ן – זאלט איר ווייטער גיין צו זיי, און ווייטער העלפן.
וויסן זאלט איר, אייערע עלטערן זענען זייער ערליכע אידן, זיי האבן געהערט שרעקליכע לשון הרע אויף היכל הקודש, און זיי ווילן נישט אז די קינדער זייערע זאלן זיין אין אזא פלאץ.
איך ווייס אז דאס איז זייער נישט איינגענעם, צו גיין און זיין ביי די עלטערן ווען זיי איגנארירן און זיי ענטפערן ממש וואס זיי מוזן און פירן זיך קאלט וכו', דאך זאלט איר ווייטער גיין און זיי דן זיין לכף זכות. ווייל דער רבי זאגט (לקוטי מוהר"ן חלק א', סימן ו), דורכדעם וואס מען שווייגט אפ אויף די בזיונות דורך טרעפן אין די וואס טשעפען און פארשעמען - א צד זכות, "שאינו חייב כל כך במה שמבזה אותו", אז ער איז נישט שולדיג אויף דעם וואס ער טשעפעט, "כי לפי דעתו וסברתו", ווייל לויט זיין קוק ווינקל, לויט זיין פארשטאנד, "נדמה לו", האלט ער, "שראוי לו לבזות אותו", אז מען איז מחויב צו פארשעמען וכו'; "על ידי זה", דורכדעם, "נעשה בחינת 'כתר'", ווערט מען זייער נאנט צום אייבערשטן, מען ווערט א קרוין פארן אייבערשטן און מען איז זוכה צו כבוד אלקי, צו תשובת עולם הבא און צו אדם לשבת על הכסא.