בעזרת ה' יתברך - יום ד' פרשת כי תצא, ו' אלול, שנת תשפ"ג לפרט קטן
לכבוד ... נרו יאיר
נעכטן איז געווען א ברית ביי הרב יעקב לעזער נרו יאיר, ויקרא שמו בישראל "ישראל בן שרה", אזוי ווי דער הייליגער בעל שם טוב זכותו יגן עלינו.
דער אבי הבן האט מיך מכבד געווען מיט סנדקאות, איך האב אסאך געבעטן פאר אלע וואס דארפן ישועות.
ביים ברית האבן מיר געהאט די זכיה צו הערן דברות קודש פון זיין גרויסן טאטן, הרב רבי יצחק שליט"א, דורך אן הוקאפ. ער האט געזאגט בתוך הדברים מען זאל אריינקוקן די ווערטער פון די פרשת השבוע (דברים כג, ו): "וְלֹא אָבָה ה' אֱלֹקֶיךָ לִשְׁמֹעַ אֶל בִּלְעָם", דער אייבערשטער וויל נישט אויסהערן בלעם, "וַיַּהֲפֹךְ ה' אֱלֹקֶיךָ לְּךָ אֶת הַקְּלָלָה לִבְרָכָה", און דער אייבערשטער האט איבערגעדרייט די קללות צו ברכות, "כִּי אֲהֵבְךָ ה' אֱלֹקֶיךָ", ווייל דער אייבערשטער האט אונז ליב; ער האט געזאגט: "מיר דארפן חזר'ן די ווערטער 'דער אייבערשטער האט אונז ליב', אפילו מיר זענען אראפגעפאלן ביי בלעם, אפילו מיר זענען אין בלאטע, זאל מען וויסן – 'כִּי אֲהֵבְךָ ה' אֱלֹקֶיךָ' דער אייבערשטער האט אונז ליב"; די ווערטער זענען אזוי גוט צו הערן, ווייל דאס איז וואס פעלט; מענטשן גייען ארום צעבראכן, מען ווייסט נישט אז דער אייבערשטער האט אונז ליב.
נעכטן איז געווען א סיום הש"ס פון החתן מרדכי לייב נרו יאיר, ער האט געענדיגט די צווייטע מאל ש"ס, א גוטע הכנה צו זיין חתונה; ער האט חתונה דעם קומענדיגן זונטאג. דער חתן איז א גרויסער מפיץ, ער האט אסאך מפיץ געווען אין די צוויי יאר וואס ער האט געלערנט אין ישיבה, און אויך האט ער מחזק געווען און אריינגעבלאזן א פרישע גייסט צווישן די בחורים, אלע זאלן עוסק זיין אין הפצה; ער גייט צו זיין חתונה מיט א חשבון פון הונדערטער טויזנטער ספרים, קונטרסים, גליונות און נאך - וואס ער האט מזכה געווען נשמות ישראל, אשרי לו! זיי דו אויך מפיץ, האב רחמנות אויף אנדערע; זאלן אלע האבן דעם גוטן לעבן, די זיסע עצות.
איך בין היינט געווען באזוכן אין תפיסה מיט די אינגעלייט אין שטעטל וואס גייען כסדר אין תפיסה מחי' זיין די איינגעשפארטע אידן; וואס זאל איך דיר זאגן, מי כעמך ישראל, אידישע קינדער זענען א טייער פאלק; עס איז נישט פשוט וואס א איד איז. איך בין געווען ביי א בחור וואס זיצט שוין אפאר יאר און עס ווארט אים נאך אסאך יאר, מיר האבן געשמועסט פון אמונה און פון הלכות וואס איז אים שייך אין תפיסה. אמונה ראטעוועט אים, נאר מיט אמונה קען ער אנגיין, נאר מיט אמונה איז ער ביים זינען; ער איז פרייליך, שמייכלט און האט נישט קיין קשיות און טענות אויפן אייבערשטן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה, א גוט געבענטשט יאר.