בעזרת ה' יתברך - ד' פרשת תרומה, כ"ט שבט, שנת תשפ"ה לפרט קטן
מרת ... תחי', טיטשער בית פיגא קרית ברסלב
איך האב ערהאלטן די הודעה.
איך וויל אייך זייער בעטן, אזוי ווי איר האט סבלנות צו אייערע תלמידות און איר געדענקט אז מיידלעך זענען נישט שלעכט, מיידלעך ווייסן נישט, און מען דארף זיי לערנען ווי זיך צו פירן, און אפילו נאכן לערנען דארף מען נאכאמאל איבערזאגן, און נאכן איבערזאגן דארף מען פון פריש איבערזאגן, און לערנען ביז מען דערהערט וואס מען לערנט זיי.
אזוי וויל איך אייך בעטן - איר זאלט קוקן אויף די מאמעס פון די תלמידות; איר זאלט וויסן און געדענקען אז נישט אלע מאמעס ווייסן ווי אזוי צו זיין א מאמע און ווי אזוי מען דארף מחנך זיין, און אז מען רופט אייך אן מיט טענות און מען זאגט די טענות ווען די קינדער הערן דאס - זאלט איר דאס נישט נעמען צום הארצן, נאר אויסהערן, און ממה נפשך; אויב איז דאס וואס מען דארף פאררעכטן - זאלט איר זאגן: "יישר כח, איך וועל פאררעכטן", און אויב איז דאס נישט וואס מען דארף פאררעכטן, זאלט איר אויך זאגן: "יישר כח", און בעטן דעם אייבערשטן אז אלע אידן זאלן האבן נאר גוטס און אלע גזירות זאלן בטל ווערן.
ווען מען באקומט א בזיון איז דאס א ספעציעלע צייט צו פועל'ן ישועות.
דער אייבערשטער זאל העלפן איר זאלט האבן הצלחה אין אלע ענינים.