בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן
... נרו יאיר
הייב אן די יאר מיט לערנען חומש רש"י יעדן טאג פון די וואך, ווארט נישט אויף ענדע וואך, ווארט נישט אויף שבת, הייב אן פון אנהייב וואך, מאך זיך א קביעות - זאל זיין וואס זאל זיין – יעדן טאג צו לערנען חומש רש"י מיט תרגום; זונטאג ביז שני, מאנטאג ביז שלישי, און אזוי ווייטער, ביז סוף וואך וועסטו האבן געלערנט די גאנצע פרשה; דאס וועט דיר ברענגען אסאך גוטס, סיי בגשמיות; דו וועסט האבן פרנסה, וועסט האבן אריכות ימים, שלוות הנפש, און אויך ברוחניות וועט דיר עס העלפן, דו וועסט האבן כח עומד צו זיין אין די שווערע ברענעדיגע נסיונות, השם ישמרינו.
מוהרא"ש, ווען ער פלעגט אונז מחזק זיין צו מעביר סדרה זיין שוין פון אנהייב וואך, פלעגט ער שטענדיג דערמאנען די ווערטער פונעם הייליגן אריז"ל זכותו יגן עלינו, וואס זאגט אז מען זאל טון די מצוה ערב שבת, אבער מוהרא"ש פלעגט זאגן, א מענטש דארף לעבן מיטן מציאות, זיך נישט לאזן נארן; אז מען זעט עס גייען אריבער די טעג, וואכן און יארן און מען עפנט נישט אויף קיין חומש – דארף מען אוודאי טון וואס שטייט אין שלחן ערוך (אורח חיים סימן רפה, סעיף ג), "מיום ראשון", פון זונטאג קען מען שוין טון די מצוה, און אזוי האט זיך דער הייליגער גר"א געפירט (עיין משנה ברורה שם, סעיף קטן ח).
וואויל איז דער וואס לאזט זיך נישט נארן.