בעזרת ה' יתברך
יום א' פרשת נצבים, כ"א אלול, שנת תשפ"א לפרט קטן
לכבוד ... נרו יאיר
אפשר קענסטו אריבער רופן איין טאג דעם מלמד ... ער זאל זען אביסל ווי אזוי מען געבט ליבשאפט פאר קינדער; ער איז זייער א געלונגענער מלמד, אבער עס איז אויסגעלאשן, עס איז נישטא קיין חיות ביי אים אין כתה. איך האלט אז ווען ער וועט הערן ווי אזוי דו רעדסט מיט די קינדער, די ווארעמקייט וואס דו גיסט, די ליבשאפט, דאס פארגינען; יעדער קינד איז א צדיק, יעדער קינד איז טייער, יעדער קינד איז דער בעסטער - וועט ער קענען אביסל משפיע זיין פאר זיינע תלמידים ווארעמקייט און ליבשאפט.
איך בעט דיר זייער, שטארק זיך מיט דיין הייליגע ארבעט. דו געדענקסט וואס מוהרא"ש פלעגט דערציילן פון הייליגן רבי מענדל וויטעבסקער זכותו יגן עלינו, ער איז געווען ביי זיך אזוי צעבראכן, ער האט ממש נישט געקענט אנגיין, האט אים זיין רבי דער גרויסער מגיד זכותו יגן עלינו געזאגט: "מענדל מענדל, ווען דו גייסט אין גאס, יעדן מענטש וועם דו זעסט - ביסטו מער פון אים"; דאס זעלבע זאג איך דיר, יעדער מלמד וועם דו זעסט - ביסטו מער.
דו ווייסט אז ביי מיר איז נישטא קיין חנופה, איך זאג וואס איך האלט, אויב דארף מען עפעס זאגן - זאג איך; איך בין נבהל ונשתומם פון די ווארעמקייט און ליבשאפט וואס דו לייגסט אריין אין די קינדער.
הלואי זאל זיין ביי כלל ישראל נאך אזעלכע מלמדים ווי דיר.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה, א גוט געבענטשט יאר.