בעזרת ה' יתברך - יום א' פרשת דברים, ב' מנחם-אב, שנת תשפ"ה לפרט קטן
לכבוד ... נרו יאיר
די וואך הויבן מיר אן ספר דברים, משנה תורה. וויל איך דיר בעטן זאלסט לערנען יעדן טאג אביסל פון די פרשת השבוע, חומש רש"י מיט תרגום איינגעטיילט לויט די וואך.
מוהרא"ש זאגט בשם דעם הייליגן צדיק רבי יששכר דוב מבעלזא זכותו יגן עלינו: "א טאג וואס מען לערנט חומש מיט רש"י, איז מען פארזיכערט אז אין דעם טאג וועט מען נישט זינדיגן"; אז מען לערנט חומש רש"י איז מען צוגעבינדן צום אייבערשטן.
וויפיל האט מוהרא"ש גערעדט צו אונז פון לערנען יעדן טאג חומש רש"י מיטן תרגום פון די פרשה, מוהרא"ש פלעגט אסאך דערציילן אז דער קדושת יום טוב זכותו יגן עלינו האט אמאל געשיקט זיינע צוויי קינדער דער הייליגער עצי חיים און דעם הייליגן סאטמער רבי זכותם יגן עלינו ווען זיי זענען נאך געווען גאר קליין, זיי זאלן גיין נעמען א ברכה פון דעם הייליגן צדיק רבי מרדכי'לע מנאדבורנא זכותו יגן עלינו. רבי מרדכי'לע האט זיי געבענטשט און זיי געזאגט די ווערטער: "קינדערלעך, פילעוועט זיך אין חומש רש"י (לערנט אסאך חומש רש"י), ווייל איך האב געקענט גרויסע גאונים וואס האבן נישט געוואוסט וואו דער אייבערשטער וואוינט ווייל זיי האבן נישט געלערנט חומש רש"י".
היט די הלכות פון די ניין טעג, נישטא קיין פלייש די וואך; מיר פירן זיך אז אפילו מיט א סיום עסן מיר נישט קיין פלייש, מוהרא"ש זאגט מען זאל זען צו מאכן יעדן טאג סיומים, וואס מער לערנען און ענדיגן מסכתות, אבער פלייש זאל מען נישט עסן אין די ניין טעג, "כדאי הוא בית אלקינו - עס איז ווערד דער חורבן בית המקדש - אז מען זאל טרויערן און נישט עסן פלייש", נישטא קיין טרינקען וויין (א גאנץ יאר טרינקען מיר נישט קיין וויין, א ברסלב'ער חסיד טרינקט נישט, א ברסלב'ער חסיד טרינקט נאר אונגארישע וויין, דאס מיינט מען די יין המשומר לצדיקים, די תורות און התחזקות פון הייליגן רבי'ן).
די וואך טאר מען זיך נישט באדן לשם תענוג, דאס מיינט זיך באדן פאר הנאה, שווימען, זיצן אין א ווארעמע וואנע, גיין אין שוויץ; ווייל די טעג טרויערן מיר אויפן חורבן בית המקדש, (די אינגעלייט וואס ארבעטן אין די היצן, זיי שוויצן און עס גייט א גערוך פון זיי, און אזוי אויך בחורים וואס שפרינגען און טאנצן, זיי שוויצן און עס גייט א גערוך וכו' - אין אזא פאל מעג מען זיך אביסל ארום וואשן און אראפנעמען די גערוך און שווייס. אזוי אויך פרויען און מיידלעך מוזן זיך וואשן).
דער אייבערשטער זאל העלפן זאלסט האבן הצלחה אין אלע ענינים.