בעזרת ה' יתברך - יום ג' פרשת חקת, ה' תמוז, שנת תשפ"ה לפרט קטן
לכבוד מיין טייערער ... נרו יאיר
איך האב דיך זייער ליב, איך האב זייער הנאה פון דיר, צו זען ווי שיין דו פירסט זיך מיט דיין ווייב און פון דיין עבודת השם.
בנוגע הפצה; די תורה זאגט (קהלת ג, א): "לַכֹּל זְמָן" וכו', יעדע זאך האט זיין צייט, יעצט ווען דו האסט נאר פיצליך קינדער דארפסטו רחמנות האבן אויף דיין ווייב און זיין אין שטוב איר צו העלפן, נאך אפאר יאר ווען דיינע קינדער וועלן אונטער וואקסן, זיי וועלן העלפן אין שטוב – וועט זיין גרינגער פאר דיין ווייב זיך אן עצה צו געבן, וועסטו קענען זיין מער ביי הפצה, אבער יעצט איז א צייט פון העלפן די ווייב, אירע נערווען זאלן זיך חס ושלום נישט איבער רייסן.
דער זעלבער צדיק וואס האט אונז געזאגט גיין הפצה, דער זעלבער צדיק האט אונז געזאגט זיין אין שטוב העלפן די ווייב פיזיש און בעיקר גייסטיש, איר אויסהערן און איר אויספרעגן ווי אזוי איר טאג איז געווען, ווי אזוי זי שפירט זיך וכו'.
איך געדענק מיינע ערשטע יארן נאך די חתונה, ווי מיר זענען געווען איבער געשטרענגט מיט די פיצליך קינדער, איז קלאר אז הפצה איז נישט גרעסער ווי העלפן די ווייב.