בעזרת ה' יתברך
יום א' פרשת חיי שרה, י"ח מרחשון, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
איך ליין דיינע בריוו און איך וויל דו זאלסט מיר שרייבן אלעס פון דיין לעבן, און אפילו דו זעסט אז איך ענטפער דיר נישט - זאלסטו נישט מיינען אז איך וויל דיר נישט מקרב זיין, נאר פשוט איך בין זייער פארנומען און איך קום ממש נישט אן צו ענטפערן אויף די הונדערטער און טויזנטער שאלות מידי יום ביומו.
איך פריי זיך זייער צו הערן אז דיין גאנצע חיות שעפסטו פון הייליגן רבי'ן, ווי דיין לעבן האט זיך אינגאנצן געטוישט צום גוטן. דו פאלגסט דעם רבינ'ס עצות, דו האסט אנגעהויבן גיין אין מקוה. מקוה איז א באד פאר די נשמה, אזוי ווי מען קען נישט לעבן אן זיך וואשן, אזוי קען מען נישט לעבן אן מקוה.
בנוגע וואס דו פרעגסט וואו דו זאלסט זיך ענדערש טובל'ן - אין די קאלטע בור אדער אין די הייסע; וואו עס איז דיר באקוועמער, דער עיקר איז גיין אין מקוה, אזוי צי אזוי.
אויף דיין פראגע וויפיל טבילות מען דארף זיך טובל'ן; דאס האט מיט'ן מענטש, מוהרא"ש זאגט עס איז גענוג איין טבילה אראפצונעמען די טומאה און נאך איין טבילה ארויפברענגען אויף זיך קדושה, נאכדעם איז שוין דא אלע סודות און כוונות, דאס האט שוין מיט יעדע מענטש מיט זיינע ענינים.
בנוגע זיך אפווישן שבת אין מקוה מיט א האנטוך; מען מעג זיך אפווישן שבת מיט א האנטוך, מען דארף נאר אכטונג געבן ווען מען ווישט זיך אפ די האר פון קאפ און ביי די בארד.
אויף דיין פראגע אויב איז דא אן ענין צו בלייבן לאנג אין מקוה, ביי דיר נעמט א מקוה זעקס מינוט אבער דו זעסט מענטשן פארזוימען זיך לאנג, ביי דיר איז מקוה א נייע זאך, דו ווייסט גארנישט פון מקוה, אפשר זאלסטו אויך בלייבן לאנג; מוהרא"ש זאגט פאר איינעם וואס פרעגט וואס צו מכוון זיין אין מקוה, זאגט מוהרא"ש, כוונת המקוה איז ווי שנעלער אריין און ווי שנעלער ארויס, דאס איז ווען מען גייט אין מקוה מיט אן עולם, פריוואט אליינס אין מקוה קען מען זיך יא פארזוימען, אבער ווען די מקוה איז פול מיט מענטשן דארף מען זיך ווי ווייניגער פארזוימען.
דער אייבערשטער זאל העלפן זאלסט האבן הצלחה אין אלע ענינים.