בריוון פונעם ראש ישיבה שליט"א

#1 - ווי נאר מען הייבט אן טון, הייבט זיך אן ספיקות מיט חלישות הדעת
ספיקות, משמש דעם רבי'ן, הדרכות, בלבולים

בעזרת ה' יתברך


יום א' פרשת בשלח, י"א שבט, שנת תשפ"א לפרט קטן


 


לכבוד ... נרו יאיר


דיין ווייב האט מיר געשריבן וואס האט פאסירט.


איך בעט דיר זייער זאלסט מחזק זיין דיין ווייב; זיי איר מסביר אז אזוי גייט עס מיט אלע וואס העלפן און טוען. אז מען טוט נישט, מען העלפט נישט - האט מען נישט קיין ספיקות, מען האט נישט קיין בלבולים, ווי נאר מען הייבט אן טון - הייבט זיך אן ספיקות מיט חלישות הדעת וכו' וכו'.


בעט איר זי זאל ווייטער העלפן דעם רבי'ן; איך וועל ענק זייער מחזיק טובה זיין אויף וואס דו מיט דיין ווייב העלפן מיר, ענק וועלן נישט דערלייגן, ענק וועלן שיין באצאלט ווערן.


כדי עס זאל נישט ארויסקומען קיין מכשולות פון היינט און ווייטער זאלט איר מודיע זיין אין שטעטל אז אויב איינער וויל נוצן פרייטאג צו נאכטס וכו', - דארף מען קומען צו דיין ווייב נאכמיטאג זי זאל קענען זען אויב אלעס איז גוט וכו', און אז עס איז דא שאלות וועט זי האבן צייט זיך צו פארבינדן מיט'ן דיין פרעגן, כדי עס זאל נישט ארויסקומען קיין מכשולות.


איך שרייב דיר אן קיין חנופה, ענק זענען ביי מיר זייער חשוב; נישט אז אנדערע תלמידים זענען נישט חשוב, אבער די תלמידים ותלמידות וואס געבן אוועק זייער לעבן פאר'ן רבי'ן, זיי העלפן מיר בויען די מוסדות, זיי העלפן אריינברענגען דעם רבי'ן אין די וועלט - זענען ביי מיר גאר חשוב, עס האט אן אנדערע באדייט.


דער אייבערשטער זאל העלפן איר זאלט האבן הצלחה אין אלע ענינים.