בעזרת ה' יתברך - יום א' פרשת חקת, ג' תמוז, שנת תשפ"ה לפרט קטן
טייערער ליבער הארציגער געטרייער ... נרו יאיר
דאס וואס דו שטייסט יעצט מיט אזוי סאך געלט איינגעשטעקט וכו', און עס קאסט דיר וכו', און דו זעסט נישט קיין וועג; דאס איז א גרויסע טובה, דאס מאכט מען ספעציעל יעדע שטיק צייט פאר דיר, מען וויל דיך צודרוקן צום אייבערשטן, ווייל פון איין זייט האסטו גרויס הצלחה, אבער ווען מען האט הצלחה קען מען זיך אמאל פארגעסן פון וואו די הצלחה קומט, מען קען זיך אליין איינרעדן אז "כח ועוצם ידי עשה לי את החיל הזה", אז מען איז געלונגען, מען טויגט, מען איז קלוג וכו' וכו', ביז מען זעט זיך אין א פלאנטער, מען ליגט מיט געלט איינגעשטעקט מיט גרויסע פראצענטן, מוז מען גיין אין א ווינקל וויינען צום אייבערשטן, עס צעפאלט די דמיונות אז מען קען אליין, מען איז מקבל גוטע קבלות, ביז עס ווערט צוריק גוט.
קוק צוריק וועסטו זען אז שטענדיג איז אזוי געווען; אט איז אלעס געגאנגען ווי געפלאנט, און אט האט מען געמיינט אז מען גייט באנקראטירן און מען האט געבעטן און תשובה געטון און עס איז צוריק גוט געווארן.
איך בעט פאר דיר אסאך.