בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד דער חשוב'ער זומער דירעקטאר מרדכי ראזענבערגער נרו יאיר
מיר ווילן געבן א קלייניקייט ארויס צו ווייזן אונזער דאנקבארקייט פארן מאכן אזוי געשמאק די זומער וואכן פאר אונזערע קינדער יחזקאל און מענדל נרם יאיר.
זיי האבן זייער הנאה געהאט פון די זומער פראגראם, מיר זענען זייער דאנקבאר.
א כתיבה וחתימה טובה.
משפחת ...
בעזרת ה' יתברך - ערב שבת קודש לסדר כי תבוא לאומאן, ט"ו אלול, שנת תשפ"ו לפרט קטן
לכבוד ... נרו יאיר
מען האט נאך צוויי שבתים די יאר תשפ"ו, און אז דו וועסט די וואך זיין פרייליך, דו וועסט זיך נישט קריגן אין שטוב - וועסטו מיט דעם פאררעכטן אלע שבתים פונעם יאר.
איך בעט דיר זייער, גיי ארויס פון די קטנות הדעת וכו', קריג זיך נישט אין שטוב, זיי מוותר, פארגעב, און אפילו דו האסט נישט אויף וואס איבער צו בעטן - זאלסטו זיין בגדלות המוחין און בעט איבער.
אויך זאלסטו אהיים קומען היינט פרייטאג אביסל פריער, הער אויף נאכלויפן די בהמות וכו', וואס דאס זענען עוונות (עיין ספורי מעשיות מעשה יא, מבן מלך ובן שפחה שנתחלפו), ענדערש קום אהיים העלפן דיין ווייב אריינברענגען דעם הייליגן שבת און זיך אביסל אראפלייגן, אז דו זאלסט קענען מאכן שיינע שבת סעודות.
בעט זיך איבער אין שטוב; אז דו וועסט זיך איבערבעטן וועט די שכינה זיין ביי ענק אין שטוב, און אז דו וועסט זיין א מוותר - וועט דער אייבערשטער דיר מוותר זיין. די הייליגע חכמים זאגן (ראש השנה יז.): "כָּל הַמַּעֲבִיר עַל מִידוֹתָיו", ווער עס געבט נאך, "מַעֲבִירִין לוֹ עַל כָּל פְּשָׁעָיו", איז מען אים מוחל אויף אלע עבירות, און דיינע תפילות וועלן אנגענומען ווערן, און דו וועסט האבן א כתובה וחתימה טובה, א גוט געבענטשט יאר.
א פרייליכן שבת.
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד ... נרו יאיר
מיר פארן שוין פון היינט צוויי וואכן קיין אומאן צום הייליגן רבי'ן, ביים רבי'ן האט מען נאר געקענט זיין דער וואס האט שלום בית. מוהרא"ש דערציילט, אמאל איז דער רבי געזעצן ביים טיש מיט זיינע תלמידים, אינמיטן האט דער רבי זיך צוקאכט און געזאגט: "ווי וואגט זיך צו קומען צו מיין טיש איינער וואס האט נישט קיין ריינע מחשבות", און דער רבי האט זיך אויפגעשטעלט, ער איז אריין אין צימער און מער נישט געוואלט בלייבן זיצן ביים טיש. ווען דער אינגערמאן האט געזען ווי דער רבי גייט אריין אין צימער, האט ער זיך אויפגעשטעלט, ער איז צוגעגאנגען צום רבינ'ס צימער און אנגעהויבן וויינען, און זיך איינגעבעטן ביים רבי'ן, ביז דער רבי איז צוריק ארויסגעקומען און ווייטער ממשיך געווען די תורה.
וואס איז געווען די מעשה מיט דעם אינגערמאן? מוהרא"ש פלעגט דערציילן, אז דער אינגערמאן האט זיך אביסל צעאמפערט מיט זיין ווייב בעפאר ער איז געקומען צום רבי'ן, און דער רבי האט שוין נישט געוואלט זיצן מיט אים ביי איין טיש, אזוי שטארק האט דער רבי מקפיד געווען מען זאל האבן שלום בית; ווייל אז מען קריגט זיך אין שטוב האט מען נישט קיין מח, מען ווערט אויס מענטש, און נאכדעם פאלט מען אראפ אין א טיפע גרוב.
ווי קען מען קומען קיין אומאן ווען מען טוט וויי די ווייב? ווי קען מען קומען אין אומאן ווען מען טשעפעט און מען האט נישט קיין שלום בית? מוהרא"ש פלעגט אלע יארן ראש השנה רעדן פון וואס דער הייליגער אריז"ל זאגט, אז שופ"ר איז די ראשי תיבות פונעם פסוק (דברים כט, יז): "פֶּן יֵשׁ בָּכֶם שֹׁ'רֶשׁ פֹּ'רֶה רֹ'אשׁ וְ'לַעֲנָה"; לכאורה וואס האט דער פסוק מיט בלאזן שופר? זאגט מוהרא"ש, אז רש"י זאגט, וואס איז דאס שורש פורה ראש ולענה? "שׁוֹרֶשׁ מְגַדֵּל עֵשֶׂב מַר כְּגִידִין שֶׁהֵם מָרִים, כְּלוֹמֶר מַפְרֶה וּמַרְבֶּה רֶשַׁע בְּקִרְבְּכֶם"; דאס הייסט אז ווען מען הערט דעם שופר דארף דאס אויפוועקן דעם מענטש ער זאל תשובה טון, ארויס נעמען פון זיך דאס רשעות וואס ליגט אין אים וכו', און דאס הייבט זיך אן אין שטוב, מען זאל אויפהערן טשעפען און וויי טון די ווייב.
איך האף דו וועסט אריינעמען די בריוו אין דיר, דו וועסט זיך איבערבעטן און אנהייבן לעבן ריכטיג, וועסט רעדן ווייך, וועסט רעדן שיין און הארציג צו דיין ווייב.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ה' לסדר כי תבוא לאומאן, י"ד אלול, שנת תשפ"ו לפרט קטן
לכבוד ... נרו יאיר
דו האסט נישט קיין פרנסה, דו פרעגסט וואס דו קענסט טון צו האבן פרנסה.
שמחה איז מסוגל פאר פרנסה; מוהרא"ש זאגט, די הייליגע שם פון פרנסה, חת"ך, איז די סופי תיבות פונעם פסוק (תהלים קמה, טז): "פּוֹתֵחַ' אֶת' יָדֶךָ'" אז מען וויל שפע, מען וויל ציען צו זיך די שם הקדוש פון ח'ת'ך' - דארף מען זיך שטארקן מיט שמחה, ווייל די שם הקדוש איז די סופי תיבות פון (דברים טז, טו): "וְהָיִיתָ' אַךְ' שָׂמֵחַ'", ווייל אז מען איז פרייליך האט מען פרנסה.
אויך זאלסטו זיך נישט קריגן מער מיט קיינעם, זיי מוותר, קריג זיך נישט, זיכער אין שטוב, דארט זאלסטו מער אכטונג געבן; ווייל אז מען קריגט זיך אין שטוב, מען גרויסט זיך איינער אויפן צווייטן - גייט די פגם ביז די פרנסה, עס גייט אוועק די שפע.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' לסדר כי תבוא לאומאן, י"ג אלול, שנת תשפ"ו לפרט קטן
לכבוד ... נרו יאיר
מיר פארן שוין אין ווייניגער פון צוויי וואכן צום הייליגן רבין קיין אומאן צו זיין דארט ראש השנה, טון וואס דער רבי האט אונז געזאגט צו טון, מיר זאלן קומען צו אים; מיר דארפן מאכן די ריכטיגע הכנות צו קומען, דער עיקר וואס מיר דארפן איז - זיך שטארקן און זיך נישט נאכלאזן.
שטארק זיך, און אז דו פאלסט כסדר אראפ - זאלסטו זיך אויפשטעלן, געב נישט אויף, הייב זיך אויף; ווייל אויף אלע צדיקים איז איבערגעגאנגען נסיונות, אלע האבן געהאט די געפיל אז מען דארף זיי נישט, און נאר ווייל זיי האבן זיך דערהאלטן - האבן זיי זוכה געווען צו וואס זיי האבן זוכה געווען. אזוי ווי רבי נתן האט אמאל גערעדט מיט אנשי שלומינו אז מען דארף זיך דערהאלטן מיט אלע כוחות, ווייל אויף יעדן איינעם גייט אריבער שווערע ביטערע נסיונות; אינמיטן רעדן האט ער זיך צופייערט און געזאגט: "פארוואס איז רבי שמעון בן יוחאי געווען רבי שמעון בן יוחאי? ווייל ער האט געהאט די מאס התחזקות! פארוואס איז דער אר"י הקדוש געווען דער אר"י הקדוש? ווייל ער האט געהאט די מאס התחזקות! פארוואס איז דער בעל שם טוב הקדוש געווען דער בעל שם טוב הקדוש? ווייל ער האט געהאט די מאס התחזקות! פארוואס איז דער הייליגער רבי געווען דער הייליגער רבי? ווייל ער האט געהאט די מאס התחזקות! און פארוואס בין איך וואס איך בין? ווייל איך האב די מאס התחזקות", זעט מען פון דעם אז אויף אלע צדיקים איז איבערגעגאנגען וואס איז איבערגעגאנגען, און נאר ווייל זיי האבן זיך דערהאלטן זענען זיי צוגעקומען צו זייערע מדריגות.
גיי הפצה, זיי נישט סעלפיש און נאר טראכטן און קוקן אויף זיך; אז דו האסט געפונען די אוצר פון רבי'ן וואס מאכט דיר ליכטיג דיין לעבן - פארוואס זאלסטו דאס נישט געבן פאר אנדערע? אז דו וועסט גיין פארשפרייטן פאר אנדערע די ספרים, גליונות וכו' - וועסטו מתקן זיין וואס דו דארפסט מתקן זיין, אזוי ווי דער הייליגער רבי זאגט (ספר המדות אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה, שֶׁיִּשְׁתַּדֵּל לְהַחֲזִיר בְּנֵי אָדָם בִּתְשׁוּבָה", דורך צוריק ברענגען מענטשן צום אייבערשטן פאררעכט מען די עבירה פון פגם הברית.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ג' לסדר כי תבוא לאומאן, י"ב אלול, שנת תשפ"ו לפרט קטן
לכבוד ... נרו יאיר
מיר פארן שוין פון היינט צוויי וואכן קיין אומאן צום הייליגן רבי'ן, ביים רבי'ן האט מען נאר געקענט זיין דער וואס האט שלום בית. מוהרא"ש דערציילט, אמאל איז דער רבי געזעצן ביים טיש מיט זיינע תלמידים, אינמיטן האט דער רבי זיך צוקאכט און געזאגט: "ווי וואגט זיך צו קומען צו מיין טיש איינער וואס האט נישט קיין ריינע מחשבות", און דער רבי האט זיך אויפגעשטעלט, ער איז אריין אין צימער און מער נישט געוואלט בלייבן זיצן ביים טיש. ווען דער אינגערמאן האט געזען ווי דער רבי גייט אריין אין צימער, האט ער זיך אויפגעשטעלט, ער איז צוגעגאנגען צום רבינ'ס צימער און אנגעהויבן וויינען, און זיך איינגעבעטן ביים רבי'ן, ביז דער רבי איז צוריק ארויסגעקומען און ווייטער ממשיך געווען די תורה.
וואס איז געווען די מעשה מיט דעם אינגערמאן? מוהרא"ש פלעגט דערציילן, אז דער אינגערמאן האט זיך אביסל צעאמפערט מיט זיין ווייב בעפאר ער איז געקומען צום רבי'ן, און דער רבי האט שוין נישט געוואלט זיצן מיט אים ביי איין טיש, אזוי שטארק האט דער רבי מקפיד געווען מען זאל האבן שלום בית; ווייל אז מען קריגט זיך אין שטוב האט מען נישט קיין מח, מען ווערט אויס מענטש, און נאכדעם פאלט מען אראפ אין א טיפע גרוב.
ווי קען מען קומען קיין אומאן ווען מען טוט וויי די ווייב? ווי קען מען קומען אין אומאן ווען מען טשעפעט און מען האט נישט קיין שלום בית? מוהרא"ש פלעגט אלע יארן ראש השנה רעדן פון וואס דער הייליגער אריז"ל זאגט, אז שופ"ר איז די ראשי תיבות פונעם פסוק (דברים כט, יז): "פֶּן יֵשׁ בָּכֶם שֹׁ'רֶשׁ פֹּ'רֶה רֹ'אשׁ וְ'לַעֲנָה"; לכאורה וואס האט דער פסוק מיט בלאזן שופר? זאגט מוהרא"ש, אז רש"י זאגט, וואס איז דאס שורש פורה ראש ולענה? "שׁוֹרֶשׁ מְגַדֵּל עֵשֶׂב מַר כְּגִידִין שֶׁהֵם מָרִים, כְּלוֹמֶר מַפְרֶה וּמַרְבֶּה רֶשַׁע בְּקִרְבְּכֶם"; דאס הייסט אז ווען מען הערט דעם שופר דארף דאס אויפוועקן דעם מענטש ער זאל תשובה טון, ארויס נעמען פון זיך דאס רשעות וואס ליגט אין אים וכו', און דאס הייבט זיך אן אין שטוב, מען זאל אויפהערן טשעפען און וויי טון די ווייב.
איך האף דו וועסט אריינעמען די בריוו אין דיר, דו וועסט זיך איבערבעטן און אנהייבן לעבן ריכטיג, וועסט רעדן ווייך, וועסט רעדן שיין און הארציג צו דיין ווייב.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ב' לסדר כי תבוא לאומאן, י"א אלול, שנת תשפ"ו לפרט קטן
לכבוד ... נרו יאיר
איך וויל דיך מחזק זיין דו זאלסט גיין הפצה, דו זאלסט פארשפרייטן די גליונות און קונטרסים עצות פון הייליגן רבי'ן.
דער הייליגער רבי האט דערציילט (ספורי מעשיות, מעשה ג): "מעשה, אמאל איז געווען א חכם, פאר זיין טויט האט ער גערופן זיינע קינדער און זיין משפחה, און האט זיי געלאזט צוואה זיי זאלן 'אנטרינקען ביימער'; איר מעגט עוסק זיין אין אנדערע פרנסות אויך, נאר דאס זאלט איר זען שטענדיג צו טון: 'אנטרינקען ביימער'"; מוהרא"ש זאגט (ספר נהרי אפרסמון) אז דאס גייט ארויף אויף עוסק זיין אין הפצה אין מקרב זיין מענטשן צום אייבערשטן, ווייל א מענטש איז צוגעגליכן צו א בוים, אזוי ווי עס שטייט אין פסוק (דברים כ, יט): "כִּי הָאָדָם עֵץ הַשָּׂדֶה", און מען דארף עס אנטרינקען מיט אמונה.
מיר פארן שוין אין צוויי וואכן קיין אומאן צום הייליגן רבי'ן, זאלסטו קומען צום רבי'ן מיט טון די ווילן פון רבי'ן, וואס האט געוואלט מיר זאלן אלע עוסק זיין אין הפצה, אזוי ווי רבי נתן זכרונו לברכה זאגט (חיי מוהר"ן, סימן תקמג): דער רבי פלעגט אונז מבזה זיין פארוואס מיר זענען נישט עוסק אין 'הפצה'; וּפַעַם אַחַת בְּלֵיל מוֹצָאֵי שַׁבָּת עָמַדְנוּ לְפָנָיו עִם כַּמָּה אֲנָשִׁים מֵהַחֲשׁוּבִים שֶׁלּוֹ, וְהוֹכִיחַ אוֹתָנוּ מְאֹד כַּמָּה שָׁעוֹת עַל עִנְיָן זֶה, איינמאל מוצאי שבת האט דער רבי אונז געגעבן מוסר אפאר שעה היתכן מיר זענען נישט גענוג עוסק אין הפצה, וּפַעַם אַחַת קָרָא אוֹתָנוּ 'עֵצִים יְבֵשִׁים' עַל שֶׁאֵין אָנוּ מוֹלִידִים נְפָשׁוֹת שֶׁיִּתְקָרְבוּ לְהַשֵּׁם יִתְבָּרַךְ עַל יָדֵינוּ, 'טרוקענע ביימער' האט אונז דער רבי אנגערופן; ווייל דער רבי האט געוואלט מיר זאלן עוסק זיין אין אנטרינקען ביימער - מקרב זיין אידישע קינדער צום אייבערשטן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום א' לסדר כי תבוא לאומאן, י' אלול, שנת תשפ"ו לפרט קטן
לכבוד ... נרו יאיר
מוהרנ"ת אין די בריוון פון פרשת כי תבוא שרייבט ער: "לסדר 'כי תבוא לאומאן'"; מען פארט שוין צום הייליגן רבי'ן, יעדער איינער האט מניעות, יעדער האט שוועריקייטן, דאך פארט מען צום רבי'ן, און איך האף אז דו וועסט די יאר קומען, איך האף דו וועסט זיין שטארק, נישט קוקן אויף קיינעם, ווייל דער הייליגער רבי האט געזאגט (חיי מוהר"ן, סימן תג): "הָרֹאשׁ הַשָּׁנָה שֶׁלִּי עוֹלֶה עַל הַכֹּל", זיין ביי מיר ראש השנה איז גרעסער פון אלעס און איך וואונדער זיך אויף מיינע תלמידים וואס גלייבן אין מיר, פארוואס זאלן זיי נישט מעורר זיין מיינע מענטשן אז אלע זאלן קומען צו מיר אויף ראש השנה?! קיינער טאר נישט פעלן! "כִּי כָּל עִנְיָן שֶׁלִּי הוּא רַק רֹאשׁ הַשָּׁנָה", מיין גאנצע זאך איז ראש השנה, און מען זאל מודיע זיין פאר אלע וואס גלייבן אין רבי'ן, אז ער האט געהייסן קומען צו אים אויף ראש השנה, "וּמִי שֶׁזּוֹכֶה לִהְיוֹת עַל רֹאשׁ הַשָּׁנָה, רָאוּי לוֹ לִשְׂמֹחַ מְאֹד מְאֹד, אִכְלוּ מַעֲדַנִּים וּשְׁתוּ מַמְתַקִּים, כִּי חֶדְוַת ה' הִיא מָעֻזְּכֶם", און ווער עס איז זוכה צו זיין ביי אים אויף ראש השנה דארף זיך זייער פרייען א גאנץ יאר, עיין שם.
מען זעט אן אינטערעסאנטע זאך, יעדער איינער פארט ראש השנה צו זיין רבי, ביי אלע חסידות'ן פארט מען אוועק אויף ראש השנה און קיינער זאגט גארנישט, אבער ווען עס קומט צו פארן קיין אומאן - דרייט זיך איבער די וועלט, הימל און ערד, "היתכן מען לאזט איבער די ווייב און מען פארט אויף אומאן?!" דאס אליינס איז א באווייז אז דאס איז די קול הברה וואס וויל פארשטעלן די קול דקדושה, אז מען זאל נישט קומען צום צדיק, מען זאל נישט באקומען אלע תיקונים.
געלויבט דעם אייבערשטן אז מיר האבן אונזערע ד' אמות אוועק פון די גאנצע טומל, אונזערע ד' אמות איז אפגעהיטן, מיר אלע תלמידי היכל הקודש ברענגען די קינדער צום רבי'ן, און אפילו מען האט נישט קיין געלט - געבט מען אוועק פון די אנדערע באקוועמליכקייטן, מען שפארט אפ געלט אינמיטן יאר אז מען זאל קענען ברענגען די קינדער צום רבי'ן.
גיי א שפאציר, שמועס אויס דיין הארץ, בעט דעם אייבערשטן אז דו זאלסט זוכה זיין צו ווערן אן ערליכער איד און קענען אלעס פאררעכטן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ה' פרשת כי תצא, ז' אלול, שנת תשפ"ו לפרט קטן
... נרו יאיר
איך וויל דיך מחזק זיין אז דו זאלסט רחמנות האבן אויף דיין ווייב, דו זאלסט זיך באגיין מיט איר ווי מען באגייט זיך צו די חשוב'סטע מענטש, און איך בין זיכער אז אין דעם ליגט דיין ישועה, און אנשטאט זוכן סגולות פון אונטער דער ערד, טון דאס און יענץ געהאלפן צו ווערן מיט וואס דו דארפסט געהאלפן ווערן; אויב דו וועסט מכבד זיין דיין ווייב, דו וועסט זיך פירן צו איר מיט ליבשאפט און עהרע – וועסטו געהאלפן ווערן, און איך זאג דיר צו אז אויב דו וועסט זיך אזוי פירן – וועסטו זען גלייך א ישועה.
איך ווייס אלעס, איך ווייס אז עס איז שווער, איך ווייס אלעס וואס גייט אריבער אויף דיר, ווייל אלעס פון מיינע תלמידים ווייס איך, אפילו אן דעם וואס מען דערציילט מיר; מיט דעם אלעם בעט איך דיר: האב רחמנות אויף דיין ווייב, בייג איין דיין קאפ פארן אייבערשטן, און נעם אלעס אן באהבה, רעד צו איר ווי מען רעדט צו די חשוב'סטע פערזענליכקייט, און טראג איר און ברענג איר ווי מען טראגט א מלכה, און פארברענג מיט איר; וועסטו זען גלייך דיין ישועה.
א כתיבה וחתימה טובה.
בעזרת ה' יתברך - יום ג' פרשת כי תצא, ה' אלול, שנת תשפ"ו לפרט קטן
מיינע ליבע טייערע ... נרו יאיר וזוגתו תחי'.
איך האף אז ענק האבן פארשטאנען וואס מיר האבן גערעדט, און ענק זאלן זיך נישט אראפקלאפן וכו'. איך האלט זייער פון ענק, ענק זענען ביי מיר זייער באליבט, און עס זאל ענק נישט אינטערעסירן וואס דער זאגט און וואס יענער זאגט וכו'.
ענקער עבודה אין די טעג איז לעבן מיט די תורה פון רבי'ן, לקוטי מוהר"ן חלק א, סימן קצה, (וסימנך 'הק"ץ', דו וועסט זען די ענדע פון אלע צרות), דער הייליגער רבי זאגט א וואונדערליכע זאך, אז אפילו ווען מען גייט אריבער צרות און יסורים – זאל מען גוט אויפזוכן די חסדים וואס דער אייבערשטער טוט מיט אים, ווייל אויך אין די צרה – טוט דער אייבערשטער העלפן און גוטס טון פארן מענטש.
דאס איז דיין עבודה, און נאר דאס; דו זאג פאר דיין ווייב זאכן וואס דו זעסט ווי דער אייבערשטער מאכט חסדים, און איר זאגט פאר אייער מאן זאכן אויף וואס צו דאנקען; ענק מוזן מסיח דעת זיין פון די פראבלעמען, מען טאר נישט טראכטן אזויפיל פון די פראבלעמען, מען מוז טראכטן פון די חסדים און די גוטס וואס דער אייבערשטער טוט.
א כתיבה וחתימה טובה.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
לכבוד ר' ... נרו יאיר
איך וויל זיך באדאנקען פאר די שיינע סכום צדקה וואס דו האסט געגעבן פאר די ישיבה, די חשוב'ע סכום פון פינף און צוואנציג טויזנט דאלער.
איך בין זיכער אז די זכות פון העלפן די ישיבה וואס העלפט אזויפיל בחורים – וועסטו זוכה זיין צו א שנה טובה ומבורכת, דו וועסט האבן א גוט געבענטשט יאר, דו מיט דיין גאנצע משפחה, און אויך בזכות וואס דו העלפסט ... נרו יאיר.
איך ווייס נישט אויב דו זעסט די גרויסע שנוי אויף אים, ער לערנט פלייסיג, ער פירט זיך מיט גוטע מידות, און ער איז פרייליך, איך האב אים זייער ליב; זיין הארץ, זיין תמימות; דאס איז דיין זכות, מיט דיין חבר ... נרו יאיר; דאס וועט מען לייגן אויפן וואגשאל, און דו וועסט האבן א גוטע יאר.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
... נרו יאיר
איך וויל דיך מחזק זיין זאלסט נישט רעדן מיט קיינעם זאכן וואס איז נישט איידל, איך הער צוריק פון דיינע חברים אז דו טראגסט און ברענגסט וכו', חתנים רעדן זיך אפ אז דו קומסט זיי ברענגען און טראגן, האסט געזען זייער כלה; דו מאכסט זיך צרות, מען רעדט אויף דיר אז דו ביסט נישט מסודר.
וואס קוקסטו נאך יענעמ'ס כלה, יענעמ'ס פרוי? און אז דו האסט יא געזען – וואס זאגסטו? וואס טראגסטו נייעס פון דעם צו יענעם?
איך בעט דיר זייער, פיר זיך איידל, 'מעשיך יקרבוך ומעשיך ירחקוך', ווייל איך האב מורא אז אויב דו וועסט נישט אפלאזן די וועג ביז אהער – וועסטו מער נישט האבן קיין חברים, אלע וועלן דיך אפלאזן; און אז דו וועסט זיך פירן איידל – וועסטו זוכה זיין צו איידעלע ערליכע דורות, ווייל אז מען פירט זיך איידל – באקומט מען א מתנה, 'שתילי זתים סביב לשלחנך', אמן.
א כתיבה וחתימה טובה.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
... נרו יאיר
איך האף דו שעצט די מתנה וואס דו האסט באקומען פון באשעפער, אן איידעלע באשיידענע פרוי; גלייב מיר, עס איז נישטא עפעס שענערס און בעסערס ווי אן איידעלע באשיידענע פרוי, גלייב מיר; און אפילו עס ברענט אין דיר א פייער וכו' – זאלסטו מיר נאכאלץ גלייבן, ווייל די שכינה הקדושה רוט אין א שטוב וואו די פרוי איז איידל און באשיידן, און אויב חס ושלום מען ווארפט אראפ די איידלקייט – גייט די שכינה ארויס פון שטוב.
געב א קוק וואס האט פאסירט ביי ענק אין די משפחה ה' ישמרינו, עס טוט מיר אזוי וויי; איך האף נאר אז יעצט טוסטו מער שעצן די מתנה וואס דער אייבערשטער האט דיר געשאנקען, זאלסטו סיי דאנקען דעם אייבערשטן, און בעט אויף ווייטער, און אויך זאלסטו געבן א גוט ווארט פאר דיין ווייב פאר איר איידלקייט.
איך ווייס פינקטליך די פייער וואס אינגעלייט גייען אריבער וכו' וכו', גלייב מיר, עס לוינט אן אשה צנועה, די גאנצע שטוב ווערט געבענטשט אין די זכות פון צניעות.
א כתיבה וחתימה טובה.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
... נרו יאיר
איך וויל דיר זאגן אז איך בין זייער איבערגענומען פון דיר, מיט אלעס וואס גייט אריבער אויף דיר, ווי דו ווארטסט אזוי לאנג אויף דיין שידוך, מיט דעם אלעם דערהאלטסטו זיך אזוי שיין, דו שטארקסט זיך מיט אלע כוחות; איך בין זיכער אז דו וועסט בקרוב געהאלפן ווערן מיט א גוטע שידוך, רק חזק, דראפע זיך און דעהאלט זיך, כי קרובה ישועתך.
איך האף דו האסט שוין א טיקעט צו קומען צום הייליגן רבי'ן קיין אומאן אויף ראש השנה, ביים רבי'ן וועסטו פועל'ן דיין שידוך. דער הייליגער רבי זאגט (לקוטי מוהר"ן חלק ב, סימן פט): "הַדַּעַת מְשַׁדֵּךְ כָּל הַשִּׁדּוּכִים", דער צדיק איז דער שדכן; ביים ציון זאלסטו בעטן: "רבי איך דארף א שידוך, רבי איך קען נישט מער, רבי איך וויל זיין אן אדם השלם, רבי איך וויל צוריק קומען איבער א יאר מיט א טלית..." אזוי און נאכמער זאלסטו זיך מתבודד זיין ביים ציון אין אומאן.
איך בעט דיר דו זאלסט נעמען אן אכסניא ביי אן ערליכע חבורה, מען דארף ערליכע חברים וואס האבן תמימות, וואס פירן זיך מיט יראת שמים, אז די טעג פון ראש השנה און פון ערב און מוצאי – זאלן אריבער גיין הייליג און אויסגעהאלטן מיטן שלחן ערוך וכו'.
זיי מקפיד צו דאווענען די דריי תפילות מיט מנין, מיט א סידור.
א כתיבה וחתימה טובה.
בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ו לפרט קטן
... תחי'
איך האב ערהאלטן אייער בריוו.
לכבוד אייער זיבעצנסטע געבורטס טאג זאלט איר זיך פארנעמען צו בענטשן ברכת המזון מיט א בענטשער און נישט בענטשן פון אויסנווייניג, ווייל ווען מען בענטשט פון אויסענווייניג קען מען אויסלאזן פון די נוסח וואס די הייליגע חכמים האבן מתקן געווען, און מוהרא"ש זכרונו לברכה פלעגט אסאך רעדן פון דעם, אז מען זאל זיך צוגעוואוינען צו בענטשן דוקא אין א בענטשער, און מוהרא"ש האט שטענדיג געזאגט אז דאס איז א סגולה פאר עשירות, און דאס וואס ער האט זוכה געווען צו זיין גרויסע עשירות, איז נאר ווייל ער האט זיך צוגעוואוינט נאך פון אלס בחור צו בענטשן אינעווייניג.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה.
בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ו לפרט קטן
... נרו יאיר
מזל טוב פאר די גרויסע שמחה, דיין טאטע האט מיר געשריבן אז דו האסט זוכה געווען צו ענדיגן ש"ס, יעצט האסטו זוכה געווען צו א צלם אלקים, ווייל דער הייליגער רבי האט געזאגט: "ווער עס ענדיגט ש"ס איז זוכה צו א צלם אלקים".
הייב אן נאכאמאל ש"ס און לערן יעדן טאג אסאך בלעטער גמרא ביז דו וועסט זוכה זיין צו ענדיגן נאכאמאל און נאכאמאל, ביז דו וועסט ענדיגן ש"ס הונדערט און איין מאל, דאס וועט דיך מאכן פאר א גרויסער צדיק; ווייל עס איז נישטא נאך א זאך וואס ברענגט דעם מענטש אזוי נאנט צום אייבערשטן ווי לערנען די הייליגע גמרא, און דאס פארברענט אלע קליפות ומזיקים וואס מען האט באשאפן פון עבירות, אזוי ווי דער הייליגער רבי זאגט אז גמרא פארברענט די קליפות; דער רבי זאגט (לקוטי מוהר"ן חלק א, סימן ריד): "תַּלְמוּד בְּגִימַטְרִיָּא אוֹתִיּוֹת שֶׁל שְׁמָהּ 'לִילִית'", תלמוד באטרעפט אזוי ווי די קליפה וואס ווארפט אראפ דעם מענטש אין פגם הברית רחמנא לצלן, תלמו"ד באטרעפט פיר הונדערט אכציג, און די קליפה לילי"ת באטרעפט אויך פיר הונדערט אכציג, "עַל כֵּן יֵשׁ כֹּחַ בְּלִמּוּד הַתַּלְמוּד לְהַכְנִיעַ אוֹתָהּ", אז מען לערנט גמרא איז מען מכניע די קליפה.
געב א גרוס פאר דיין טייערע טאטע.
איך האף דיך צו זען ראש השנה ביים רבי'ן אין אומאן.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ו לפרט קטן
.... נרו יאיר, תלמיד ישיבת היכל הקודש ירושלים
איך האב ערהאלטן דיין בריוו.
איך פריי זיך זייער אז דו שטארקסט זיך מיטן הייליגן רבינ'ס עצות, דו לערנסט און דו דאווענסט, אבער איין זאך וויל איך נאך ביי דיר פועל'ן, דו זאלסט נישט קוקן קיין מאוויס און נישט קיין פלעיס; איך בעט דיר זייער, ווארף אוועק אלעס וואס דו האסט, אויך כשר'ע זאכן זאלסטו נישט קוקן, ווייל אזוי איז די וועג פונעם סמ"ך מ"ם, צו פארנארן און פארכאפן דעם מענטש אין עבירות, "היום אומר לו עשה כך, ולמחר אומר לו עשה כך, עד שאומר לו עבוד עבודה זרה" (שבת קה:), ערשט זאגט ער טו נאר דאס, שפעטער - טו נאר יענץ, ביז ער זאגט אים אלעס אפצולאזן השם ישמרינו; און דאס איז ביי קוקן, ערשט רעדט ער צו נאר צו קוקן קליפס פון עדווערטייזמענטס, שפעטער רעדט ער צו מען זאל קוקן פלעיס און כשר'ע אינטערטעינמענט, ביז ער ווארפט אראפ דעם מענטש אין קוקן די ערגסטע זאכן רחמנא לצלן.
ליבער ברודער הארציגער חבר, אויב מען היט נישט די אויגן, מען קוקט קליפס און מאוויס פון עבירות - פארלירט מען די אמונה, דער הייליגער רבי זאגט (לקוטי מוהר"ן חלק א, סימן לא), אמונה און שמירת הברית גייען צוזאמען, אזוי ווי עס שטייט (תהילים פט, כט): "וּבְרִיתִי נֶאֱמֶנֶת לוֹ"; ווען א מענטש קוקט עבירות פאלט ער אראפ און ער איז פוגם בברית רחמנא לצלן, און ער פארלירט די אמונה, און אן אמונה איז מען א געשלאגענער, די לעבן ווערט פארטינקלט, און דאס מאכט מען זאל זיך פייניגן מיט שלעכטע מחשבות, דמיונות און פחדים; פרעג איך דיר, וואס ווילסטו אין לעבן, ווילסט זיך מוטשען דיין גאנצע לעבן? אדער דו ווילסט זיין פרייליך און צופרידן?
נעם די עצה פון רבי'ן, די עצה פון התבודדות און תפילה, בעט דעם אייבערשטן ער זאל דיך העלפן זאלסט קענען זיין שטארק נישט צו קוקן קיין עבירות, בעט אים: "רבונו של עולם, העלף מיר, איך וויל זיין אן ערליכער איד; העלף מיר איך זאל נישט קוקן קיין מאוויס, איך זאל נישט קוקן קיין עבירות. איך ווייס נישט וואס צו טון, איך בין אזוי צוגעקלעבט צו קוקן מאוויס, איך קען זיך נישט ארויסזען פון דעם! איך ווייס דאס שעדליכקייט דערפון, איך ווייס אז עס איז נישט גוט, דאך איז מיר אזוי שווער; וויפיל איך מאך אפ אז איך גיי מער נישט קוקן - פאל איך אריין טיפער און טיפער.
הייליגער באשעפער העלף מיר, לייג אריין אין מיר א ריינקייט, לייג אריין אין מיר א הייליגקייט; לֵב טָהוֹר בְּרָא לִי אֱלֹקִים, געב מיר א נייע הארץ, וְרוּחַ נָכוֹן חַדֵּשׁ בְּקִרְבִּי, באניי אין מיר א נייע ווילן, א נייע גייסט - איך זאל זיך עקלען פון קוקן מאוויס. עֲנֵנוּ ה' עֲנֵנוּ, העלף מיר אייבערשטער ענטפער מיר, נעם אן מיין געבעט. העלף מיר בזכות די הייליגע צדיקים וואס האבן זיך מוסר נפש געווען פאר דיינעט וועגן, בזכות דעם הייליגן רבי'ן רבינו נחמן בן פיגא זכותו יגן עלינו ובזכות אלע צדיקים, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ ה' צוּרִי וְגֹאֲלִי".
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' פרשת שופטים, כ"ט מנחם-אב, שנת תשפ"ו לפרט קטן
ר' מרדכי נרו יאיר, מנהל תלמוד תורה היכל הקודש קרית ברסלב
איך וויל נאכאמאל בעטן דעם מנהל, איך הער פון די קינדער און פון די עלטערן אז מען שלאגט קינדער; איך וויל נאכאמאל קלארשטעלן אז איך אסר אנצורירן די קינדער בי מיר אין מוסד, די מוסד איז מוהרא"ש'ס מוסד און מוהרא"ש האט געזאגט אז א מלמד וואס שלאגט א קינד - זאל גיין ארבעטן ביי די מיסט, ער זאל צאמנעמען די מיסט און זיך אויסגעבן ביים ווארפן די מיסט קאנעס.
איך בין היינט פארטאגס געפארן קיין קרית יואל צום ציון פון הייליגן סאטמער רבי זכותו יגן עלינו, איך האב זיך דארט מתבודד געווען מיט בכיות, און איך האב זייער אסאך געבעטן דעם אייבערשטן, וואס טו איך דא מיט די חדר? איך דארף נישט א חדר וואו מען שלאגט, אז די קינדער וועלן אויסוואקסן מיט א פיינטשאפט צום אייבערשטן.
איך בעט דיר טייערער מנהל העלף מיר, און ענטפער מיר, זאג מיר צו אז געענדיגט מיט פעטש, געענדיגט מיט וויי טון קינדער; איך וועל ענדערש האלטן די קינדער אן מלמדים, זיי זאלן טאנצן א גאנצן טאג, ווי זיי זאלן צו'מזיק'ט ווערן.
איך שרייב דיר דעם בריוו נישט די ערשטע מאל, איך האב דיר שוין אזויפיל מאל געשריבן אז דו זאלסט זיך אויסנעמען מיט די מלמדים אז זיי קענען נישט אנרירן קיין קינדער, און אז מען דארף געבן א פאטש - דארפן זיי דיך רופן, און אז דו שפירסט ווי דו דארפסט געבן א פאטש - זאלסטו מיך רופן; דאס קען נישט גיין ווי עס גייט ביז אהער, איך בין זייער נישט רואיג.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום א' פרשת שופטים, כ"ו מנחם-אב, שנת תשפ"ו לפרט קטן
... תחי'
איך האב ערהאלטן אייער בריוו.
הויזן איז א פריצות פאר א פרוי, אויך ביינאכט ווען מען שלאפט איז הויזן פריצות, זאלט איר זיך קויפן א נאכט קלייד; ווי אזוי וועלן אייערע קינדער אייך געדענקען? א מאמע מיט הויזן?!
מאכט גרייט אייער שטוב אז די שכינה הקדושה זאל דארט וועלן אריינקומען.
דאנקט און לויבט דעם אייבערשטן פאר אלע חסדים, פאר אלע גאנאדע - וואס ער טוט מיט אייך; מוהרנ"ת זאגט: "ווען מען דאנקט און מען לויבט דעם אייבערשטן, זאגט דער אייבערשטער כביכול אין הימל פאר די מלאכים: 'קוקט דעם מענטש, ער דאנקט מיר און ער לויבט מיר, איך וועל אים געבן אזויפיל גוטס, אסאך מער וויפיל ער האט, אסאך מער וויפיל עס קומט אים, ער זאל מיר נאך מער דאנקען'".
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' פרשת שופטים, ערב ראש חודש אלול, שנת תשפ"ו לפרט קטן
...
דאס וואס דו העלפסט דרוקן די ספרים פון הייליגן רבי'ן און פון זיינע תלמידים, דאס איז די גרעסטע זכות פארן יום הדין, און ווען מען וועט משפט'ן ראש השנה און יום הכיפורים, מען וועט לייגן אלעס אויפן וואגשאל, וועט מען לייגן ביי דיר אויך אלע מצוות ומעשים טובים פון די צענדליגער טויזנטער אידן וואס ווערן נתעורר לתשובה פון די ספרים, און דו וועסט זוכה זיין צו א כתיבה וחתימה טובה, מיט דיין גאנצע משפחה.
בעזרת ה' יתברך - יום א' פרשת כי תצא, ג' אלול, שנת תשפ"ו לפרט קטן
לכבוד ... נרו יאיר
מען דארף זיך גרייטן צום הייליגן רבינ'ס ראש השנה, פרעג נישט קיינעם וועגן פארן קיין אומאן, טו וואס דו האסט צו טון; גרייט אן א טיקעט, א פאספארט - און קום קיין אומאן זיין ביים רבי'ן ראש השנה.
דער הייליגער רבי האט געזאגט (חיי מוהר"ן, סימן תה): "הָרֹאשׁ הַשָּׁנָה שֶׁלִּי הוּא חִדּוּשׁ גָּדוֹל, וְהַשֵּׁם יִתְבָּרַךְ יוֹדֵעַ שֶׁאֵין הַדָּבָר הַזֶּה בִּירֻשָּׁה מֵאֲבוֹתַי, רַק הַשֵּׁם יִתְבָּרַךְ נָתַן לִי זֹאת בְּמַתָּנָה, שֶׁאֲנִי יוֹדֵעַ מַהוּ רֹאשׁ הַשָּׁנָה. לֹא מִבָּעֲיָא אַתֶּם כֻּלְּכֶם בְּוַדַּאי תְּלוּיִין בָּרֹאשׁ הַשָּׁנָה שֶׁלִּי, אֶלָּא אֲפִילּוּ כָּל הָעוֹלָם כֻּלּוֹ תָּלוּי בָּרֹאשׁ הַשָּׁנָה שֶׁלִּי", די גאנצע וועלט איז אנגעהאנגען אין מיין ראש השנה, און דער אייבערשטער האט מיר דאס געגעבן פאר א מתנה; נישט נאר עטס - מיינע תלמידים - זענען תלוי אין מיין ראש השנה, נאר די גאנצע וועלט שטייט אויף מיין ראש השנה, און נאך האט דער רבי געזאגט (שם, סימן תג): "הָרֹאשׁ הַשָּׁנָה שֶׁלִּי עוֹלֶה עַל הַכֹּל, וְהָיָה פֶּלֶא אֶצְלִי, מֵאַחַר שֶׁהַמְּקֹרָבִים שֶׁלִּי מַאֲמִינִים לִי, וְלָמָּה לֹא יִזָּהֲרוּ כָּל הָאֲנָשִׁים הַמְקֹרָבִים אֵלַי, שֶׁיִּהְיוּ כֻּלָּם עַל רֹאשׁ הַשָּׁנָה, אִישׁ לֹא יֵעָדֵר; כִּי כָּל עִנְיָן שֶׁלִּי הוּא רַק רֹאשׁ הַשָּׁנָה", מיין גאנצע זאך איז ראש השנה און עס איז מיר א וואונדער פארוואס מיינע מענטשן וואס גלייבן אין מיר, זאלן נישט רעדן צו אלעמען מען זאל קומען צו מיר אויף ראש השנה, "וְהִזְהִיר לַעֲשׂוֹת כְּרוּז, שֶׁכָּל מִי שֶׁסָּר אֶל מִשְׁמַעְתּוֹ וּמְקֹרָב אֵלָיו יִהְיֶה עַל רֹאשׁ הַשָּׁנָה אֶצְלוֹ, לֹא יֶחְסַר אִישׁ, וּמִי שֶׁזּוֹכֶה לִהְיוֹת עַל רֹאשׁ הַשָּׁנָה רָאוּי לוֹ לִשְׂמֹחַ מְאֹד מְאֹד", דער רבי האט געהייסן מאכן א כרוז אז אלע זאלן קומען צו זיין ראש השנה. נאך האט דער רבי געזאגט, אז ווער עס קומט צו אים אויף ראש השנה דארף זיין פרייליך א גאנץ יאר.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
בעזרת ה' יתברך - יום ד' פרשת ראה, כ"ב מנחם-אב, שנת תשפ"ו לפרט קטן
... נרו יאיר
יעצט ווען דיין ווייב איז איבערגעשטרענגט, ענקער בעבי וויינט טאג און נאכט אן אויפהער – זאלסטו זיך מער קאנצענטרירן איר אויסהערן און איר אויסרעדן; דאס וועט איר געבן כח צו קענען אריבערגיין די צייט וואס ענק גייען אריבער.
דער עיקר וואס א מאן דארף געבן פאר זיין ווייב – איז אן אזן קשבת, אן אויער אויסצוהערן.
איך האב געזען א וואונדערליכע ווארט פון הרב ר' יצחק שליט"א, דער מאן איז זיך מחייב אין די כתובה: "ואנא אפלח ואיזון ואפרנס יתיכי", וואס איז די דאפלטע לשון? זאגט ער, 'איזון' איז אויך א לשון פון אוזן קשבת; סיי געבן שפייז, און סיי געבן די אויער אויסצוהערן און צו פארשטיין אירע געברויכן.
העיקר שטארק דיך און שטארק דיין ווייב, דאנקט אינאיינעם דעם אייבערשטן פאר די גרויסע ניסים אז ענק האבן א משפחה, און פאר אלע חסדים; דאס דאנקען דעם אייבערשטן וועט ברענגען ישועות.
א כתיבה וחתימה טובה, א גוט געבענטשט יאר.
בעזרת ה' יתברך - יום ב' פרשת שופטים, כ"ז מנחם-אב, שנת תשפ"ו לפרט קטן
... נרו יאיר
איך האב שוין לאנג נישט געהערט פון דיר, איך האף אז דו שטארקסט זיך און דו ניצט דעם רבינ'ס עצות.
זע עס זאל נישט אריבערגיין א טאג אן לערנען תורה, און אפילו דו ביסט אויסגעמאטערט פון ברענגען פרנסה – זאלסטו ארויסכאפן לערנען אויפן הייליגן רבינ'ס וועג (המבואר בשיחות הר"ן, סימן עו), לערן אביסל חומש, אביסל משניות און גמרא, נעם מיט דיר א זעקל ספרים; א חומש, א משניות, א גמרא, מיט א תהילים'ל; וואו דו גייסט זאלסטו דאס מיט דיר מיטנעמען, און ווען דו האסט צייט זאלסטו לערנען.
זאג נישט 'מארגן', טראכט נישט: 'קומענדיגע וואך וועל איך לערנען'; די הייליגע חכמים זאגן (אבות ב, ד): "שֶׁמָּא לֹא תִפָּנֶה", קען זיין אז דיין גאנץ לעבן וועסטו זיין פארנומען; וואס ווייסטו וואס מארגן וועט זיין? די הייליגע חכמים זאגן (תנחומא שמיני, ח): "לֹא כָּל מִי שֶׁשָׂמֵּחַ הַיּוֹם שָׂמֵחַ לְמָחָר", נישט דער וואס איז היינט פרייליך – וועט מארגן זיין פרייליך; וואס ווייסט א מענטש וואס דער מארגן וועט זיין?
מאך יעצט אויף א משניות, און זיי גורס א פרק, און מאך יעצט אויף די גמרא, לערן א שיעור אין גמרא, וועט דיר גוט זיין בזה ובבא.
א כתיבה וחתימה טובה, א גוט געבענטשט יאר.
בעזרת ה' יתברך - ערב שבת קודש פרשת עקב, י"ז מנחם-אב, שנת תשפ"ו לפרט קטן
... נרו יאיר
איך האב ערהאלטן דיין בריוו.
בלייב אין ישיבה וואו דו ביסט, קריג זיך נישט מיט דיין מאמע, און אפילו דיין טאטע איז מסכים אז דו זאלסט קומען, אבער אז דיין מאמע וויל דו זאלסט זיין אין די ישיבה וואו דו ביסט יעצט - זאלסטו זיך נישט קריגן. היינט קען מען מיט האלטן אלעס פון אונזער ישיבה אויף קול ברסלב, יעדע שמועס וואס דער ראש ישיבה שמועסט מיט די בחורים - קען מען הערן אויף קול ברסלב. עס קען אפילו זיין אמאל גרינגער צו מקבל זיין ווען מען איז אין א צווייטע ישיבה און מען הערט זיך צו אויף קול ברסלב צו די שיעורים פון דער ראש ישיבה - ווי ווען מען זיצט אין ישיבה; אמאל קען מען באקומען א חלישות הדעת וכו', אמאל קען דער ראש ישיבה זאגן עפעס מוסר, און אז מען איז נישט גענוג שטארק צו וויסן אז דאס איז לטובה - קען מען אמאל נתרחק ווערן דערפון.
בלייב אין דיין ישיבה, האלט מיט די סדרי הישיבה, און אז מען לערנט שיעור עיון - זאלסטו מיט האלטן די שיעור, און אין די איבריגע צייט זאלסטו גורס זיין משניות און גמרא אויפן סדר דרך הלימוד פון הייליגן רבי'ן (שיחות הר"ן, סימן עו), און אין די פרייע צייט און ביינאכט ווען דו גייסט זיך לייגן - זאלסטו הערן די שיעורים אויף קול ברסלב 212-444-9191, די שיעורים זענען אזוי וויכטיג, עס האט אזויפיל אמונה, אזויפיל התחזקות אין אלע ענינים, אזוי וועסטו זיין נאנט וכו', ווייל עס קען אמאל אויסזען אז איינער איז נאנט, ווען באמת איז ער ווייט; מען קען זיך דרייען הינטער די פיס און זיין גאר אפילו א גבאי - און מען הערט נישט די שיעורים, מען לערנט נישט דעם רבינ'ס ספרים, איז מיט וואס איז מען נאנט? און עס קען אמאל אויסקוקן אז איינער איז ווייט, און באמת איז ער אזוי נאנט, ער לערנט די ספרים און הערט די שיעורים.
געב א גרוס פאר דיין טאטע, זאג אים אז איך האב דיר געשריבן, עס וועט אים פרייליך מאכן, דיין טאטע זארגט אזוי שטארק פאר דיר, ער האט דיך זייער ליב.
מיר וועלן זיך זען אם ירצה ה' ביים רבי'ן ראש השנה אין אומאן.
בעזרת ה' יתברך - יום ב' פרשת ראה, כ' מנחם-אב, שנת תשפ"ו לפרט קטן
מיין טייערער ליבער הארציגער ברודער ... נרו יאיר
האסט מיר דערציילט וואס דו גייסט אריבער לעצטנס, דיין קאפ שווינדלט דיר אז דו האסט נישט קיין אמונה, דיינע מחשבות פייניגן דיר: 'האב איך אמונה? האב איך נישט אמונה?' דו ווייסט נישט וואס צו טון מיט דיינע מחשבות, דו ביסט שרעקליך צעמישט, דו פרעגסט און בעטסט אן עצה.
ליבער ברודער, איך האב דיך אזוי ליב, איך זע דיין פיין, איך ווייס אז דו האסט יא א שטארקע אמונה, עס איז נאר עצת היצר דיך אראפ צו ווארפן פון דיינע הויכע מדריגות צו די נידריגסטע פלעצער השם ישמרינו, איך בעט דיר זייער, טענה נישט מיט די מחשבות. דער הייליגער רבי האט אונז מגלה געווען אז מיט די שלעכטע מחשבות טאר מען נישט טענה'ן, ווייל ווי מער מען טענה'ט מיט זיי - ווערן זיי נאר מער שטערקער און מער שרעקעדיגער, די עצה איז - זיך נישט וויסנדיג מאכן פון זיי, און ווען די מחשבות קומען - זאל מען אנהייבן דאנקען דעם אייבערשטן, אזוי וועלן זיי אלע אנטלויפן.
אמאל האט א מענטש דינים אויף זיך און די מקטריגים ווילן אים נישט צולאזן צום אייבערשטן, און אפילו ווען דער מענטש קומט און בעט דעם אייבערשטן - פארשטעלן די מקטריגים, זיי לאזן אים נישט צו, איז דא נאר איין עצה, דאנקען דעם אייבערשטן; דאס קען מען נישט אוועק נעמען פונעם מענטש, און ווען דער מענטש הייבט אן זאגן: "שכח אייבערשטער, איך דאנק דיך פאר אלעס" - רוקן זיך אלע מקטריגים אין די זייט און דער מענטש קומט אן צו די העכסטע פלאץ, א משל צו א קעניג, א מלך בשר ודם, ווען איינער וויל אריינקומען אין היכל המלך קומען די משרתים, די עבדים - און לאזן נישט, מען הייבט אן באקוקן דעם מענטש צי ער איז ווערד מען זאל אים אריינלאזן אין פאלאץ פון קעניג, און אז דער מענטש האט שכל און זאגט: "איך וויל גארנישט בעטן פונעם קעניג, איך וויל נאר זאגן שכח" - עפנט מען אים אויף די טויערן און ער גייט אריין צום קעניג, און איינמאל ער איז שוין ביים קעניג קען ער שוין אלעס בעטן.
אזוי זאלסטו טון, מאך זיך א קביעות יעדן טאג אפאר מינוט צו גיין א שפאציר און זאגן: "שכח אייבערשטער, איך דאנק דיך אייבערשטער פאר אלעס וואס דו מאכסט מיט מיר"; דאס וועט דיר צוריק געבן דיינע מוחין, דו וועסט צוביסלעך אנהייבן שפירן דעם אייבערשטן, דו וועסט שפירן ווי די אמונה ווערט דיר שטערקער און שטערקער, און אזוי וועסטו זיך קענען גוט אויסגיסן דיין הארץ צו אים, און אים בעטן אויף א שטארקע אמונה.
אמאל איז א איד געקומען צום רבי'ן און געוויינט אז ער דארף אן עצה פאר א שטארקע אמונה, ער האט קשיות און בלבולים וכו'; האט אים דער רבי געזאגט: "זאג אויס דיינע קשיות און בלבולים ביי התבודדות, דערצייל דעם אייבערשטן ווי שווער עס איז דיר, און ווי דיין קאפ און מח שווינדלען דיר וכו' וכו', אזוי וועלן די קשיות אוועק גיין", דער רבי האט אים געזאגט אז די ראשי תיבות פון קשיא איז (תהלים כז, ז): "שְׁ'מַע ה' ק'וֹלִי אֶ'קְרָא", אז מען האט קשיות, זאל מען בעטן דעם אייבערשטן אויף דעם: "הייליגער באשעפער העלף מיר איך זאל נישט האבן קיין ספיקות און בלבולים וכו', געב מיר א שטארקע אמונה, איך זאל לעבן מיט אמונה".
אויך זאלסטו שלאפן גענוג שעות, און אויך אז דו ווערסט מבולבל אינמיטן טאג - זאלסטו כאפן א דרימל אינמיטן טאג. ווייל דער הייליגער רבי זאגט (שיחות הר"ן, סימן קי): "יש כמה שטותים ובלבולים המתדבקים ומתחברים בהמח", עס קלעבן זיך אן אינעם מח אסאך שטותים און בלבולים, "ובפרט בלבולי האמונה", און עס שאדט ספעציעל פאר אמונה, "ועל ידי השנה נפרדים מהמח", און דורך שלאפן גייט עס אוועק, "וביותר מועיל השנה לאמונה", און אז מען שלאפט העלפט עס זייער פאר א שטארקע אמונה, מען ווערט אויסגערוט, מען קומט צו זיך.
איך דארף מקצר זיין, איך דארף גיין צו די בחורים, די בחורים זענען צעבראכן אויף שברי שברים, זיי ווארטן אויף אביסל חיזוק.
דער אייבערשטער זאל העלפן זאלסט האבן הצלחה אין אלע ענינים.
א כתיבה וחתימה טובה.
