בעזרת ה' יתברך - יום ג' פרשת בהר, י"ג אייר, כ"ח לעומר, שנת תשפ"ד לפרט קטן
מרת ... תחי'
איך האב ערהאלטן אייער בריוו.
קלאפט זיך נישט אראפ, דער רבי האט אונז געלערנט אז מען ווערט נישט בעסער דורך קוקן אויף זיך שלעכט. דער רבי זאגט, נאר דורך קוקן גוטס אויף זיך - ווערט מען נאך בעסער, דער רבי זאגט (לקוטי מוהר"ן חלק א', סימן רפב): "עַל יְדֵי זֶה שֶׁמְּחַפֵּשׂ וּמוֹצֵא בְּעַצְמוֹ עֲדַיִן מְעַט טוֹב", דורך דעם וואס מען זוכט אין זיך גוטע זאכן, אפילו מען שפירט זיך נאך ווייט פון גוט, זוכט מען אין זיך עפעס גוטס - "עַל יְדֵי זֶה הוּא יוֹצֵא בֶּאֱמֶת מִכַּף חוֹבָה לְכַף זְכוּת, וְיוּכַל לָשׁוּב בִּתְשׁוּבָה", דורכדעם איז מען זוכה תשובה צו טון און מען ווערט א גוטער מענטש.
נאר איין מאל א טאג מעג מען זיך צעברעכן און זיך אויסרעדן צום אייבערשטן. דער רבי זאגט (שם חלק ב', סימן כד): "אַף שֶׁגַּם לֵב נִשְׁבָּר הוּא טוֹב מְאֹד", האבן א צעבראכענע הארץ פארן אייבערשטן איז טאקע א גוטע זאך, "עִם כָּל זֶה הוּא רַק בְּאֵיזוֹ שָׁעָה", אבער נאר פאר אביסל צייט, "וְרָאוּי לִקְבֹּעַ לוֹ אֵיזֶה שָׁעָה בַּיּוֹם לְשַׁבֵּר לִבּוֹ וּלְפָרֵשׁ שִׂיחָתוֹ לְפָנָיו יִתְבָּרַךְ", און עס איז זייער גוט זיך צו מאכן א באשטימטע צייט וואס מען שמועסט זיך אויס דאס הארץ פארן אייבערשטן, "אֲבָל כָּל הַיּוֹם כֻּלּוֹ צָרִיךְ לִהְיוֹת בְּשִׂמְחָה", אבער א גאנצן טאג דארף מען זיין פרייליך.
מען דארף פאלגן דעם רבי'ן בתמימות ופשיטות און בעטן דעם אייבערשטן אויף דעם, צו טרעפן אין זיך גוטס און זיך ליב האבן, און נאר איין מאל א טאג זיך אויסקרעכצן.
דער אייבערשטער זאל העלפן איר זאלט האבן הצלחה אין אלע ענינים.