בעזרת ה' יתברך - יום ב' פרשת אמור, י' אייר, שנת תשפ"ו לפרט קטן
... נרו יאיר, קרית ברסלב
איך וויל דיך מחזק זיין; היות דו העלפסט מיר זייער אסאך מיט די מוסדות און מיט די קהילה, און אויך מיט די אויפבוי אין שטעטל, די שיינע שטעטל קרית ברסלב, די שטעטל וואס טראגט דעם רבינ'ס נאמען; וויל איך דיך מחזק זיין דו זאלסט שטענדיג געדענקען אכטונג צו געבן אויף נישט וויי טון קיינעם, און ווי מען קען מאכן מענטשן האבן א גוטע געפיל, ווייל דער אייבערשטער האט זייער ליב דעם מענטש וואס ברענגט שלום און טוט אלעס פאר שלום.
וויסן זאלסטו, פונעם טאג ל"ג בעומר הייבט שוין אן צו שיינען די ליכטיגקייט פון יום טוב שבועות; ביז ל"ג בעומר זענען טעג פון טרויער, מען פירט זיך מיט הלכות אבילות אויף די תלמידים פון רבי עקיבא וואס האבן זיך נישט אויפגעפירט מיט כבוד איינער צום צווייטן און זיי זענען געשטארבן, און דער הייליגער רבי שמעון בר יוחאי האט דאס מתקן געווען, ער האט אריינגעברענגט ליבשאפט אין אלע תלמידים, ער האט געזאגט (נשא קכח.): "אנן בחביבותא תליא", מיר זענען אנגעהאנגען אין ליבשאפט, מיר דארפן זיך ליב האבן; ער האט געלערנט די לימוד פון זיין רבי דער הייליגער תנא רבי עקיבא וואס האט געלערנט (ירושלמי נדרים ט, ד; שבת לא.): "'ואהבת לרעך כמוך', זה כלל גדול בתורה", דאס איז דער עיקר פון די תורה, און מיט דעם איז מען מקבל די תורה; דורך ליב האבן א איד און נישט רעדן שלעכטס אויף קיין שום איד - איז מען זוכה צו באקומען א שטארקע געפיל צו לערנען תורה (שיחות הר"ן, סימן צא).
דער הייליגער טאג ל"ג בעומר איז א טאג וואס מען דארף מקבל זיין דעם לימוד פון 'אנן בחביבותא תליא', אפלאזן די מחלוקת, זיך מיט קיינעם נישט קריגן, און ליב האבן יעדן איינעם; צדיקים האבן געזאגט: 'רבי שמעון איז לכל' דער הייליגער תנא רבי שמעון בר יוחאי איז פאר יעדן איינעם, ער קען יעדן איינעם ליידן, יעדן איינעם נעמען, דאס איז דער לימוד וואס מיר זענען מקבל אינעם הייליגן טאג ל"ג בעומר, זיין לכל, קענען יעדן איינעם פארנעמען, וועלן יעדן איינעם העלפן, מאכן פלאץ אין הארץ פאר יעדן איד.
דער אייבערשטער זאל העלפן זאלסט האבן הצלחה אין אלע ענינים.