בעזרת ה' יתברך
יום ה' לסדר טהרה, ד' אייר, י"ט לעומר, שנת תשע"ח לפרט קטן
לכבוד מרת ... תחי'
איך האב ערהאלטן אייער בריוו.
איך פריי מיר זייער צו הערן די גוטע בשורה וכו'; דער אייבערשטער זאל העלפן אלעס זאל אריבער גיין גרינג און געזונט.
דאס וואס איר פרעגט ווי אזוי מען זאל זיך פירן ווען מען באדט קליינע קינדער וכו'; עס איז נישט קיין פראבלעם ארומצואוואשן וכו', מען דארף וויסן דעם מאמר החכם: "מִן הַזְּהִירוּת - שֶׁלֹא לְהִזָּהֵר"; מען דארף אכטונג געבן אז מען זאל נישט צו פיל אכטונג געבן, ודע למבין.
בנוגע צי איר זאלט אראפ נעמען די ווארצלען פון אייער קינד (Molluscum); עס פעלט נישט אויס אראפ צו נעמען ווייל מיט די צייט גייט עס אליינס אוועק. אויב דאס איז אויפן פנים וכו' און עס שטערט וכו' איז נישט קיין פראבלעם אז דער דאקטער זאל דאס אראפנעמען.
זעט צו עוסק זיין אין פארשפרייטן דעם הייליגן רבינ'ס עצות און שכל פאר נאך אידן; עס איז נישט דא אויף דעם קיין שום תירוץ, כאילו דאס איז נאר שייך ביי מענער און נישט ביי פרויען.
מיר געפונען זיך היינטיגע צייטן אין א תקופה וואס עס פאלן אוועק אידישע קינדער רעכטס און לינקס, בחורים און מיידלעך, אינגעלייט און ווייבלעך; עס איז דא נאר איין עצה: "עוסק זיין אין הפצה; פארשפרייטן אויף אלע וועגן די חיזוקים און עצות פון הייליגן רבי'ן".
דער עיקר זאלט איר זיך שטארקן מיט תפילה; בפרט יעצט אז איר ווארט וכו'. דער רבי זאגט (ספר המידות, אות צדיק, חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", אז מען דערמאנט די נעמען פון צדיקים קען מען טוישן אפילו די טבע; דערפאר זאלט איר זיך צוגעוואוינען צו דערמאנען די נעמען פון צדיקים, זאגט די נעמען וואס איר קענט פון אויסענווייניג: "אברהם, יצחק, יעקב, משה, אהרן, יוסף, דוד, שלמה; רבי שמעון בר יוחאי, רבי יצחק לוריא אשכנזי, רבי ישראל בעל שם טוב, רבי נחמן בן פייגא מברסלב, רבי נתן מברסלב וכו' וכו'" און נאך נעמען וואס איר קענט. נאכדעם זאלט איר זאגן די תפילה: "הייליגער באשעפער, העלף מיר בזכות די צדיקים וואס איך האב דערמאנט זייערע נעמען אז איך זאל האבן א געזונט קינד; דאס קינד זאל זיין געזונט ברמ"ח אברים און שס"ה גידים. העלף מיר איך זאל האבן דאס קינד גרינגערהייט אן קיין שום ווייטאג. הייליגער באשעפער! נעם אוועק פון מיר אלע שלעכטס; איך זאל נישט האבן קיין שלעכטע אויג, קיינער זאל נישט מאכן קיין עין הרע אויף מיר און אויפן קינד. העלף מיר איך זאל זוכה זיין צו ערליכע קינדער, הייליגע קינדער; קינדער וואס וועלן דיר דינען זייער גאנץ לעבן און וועלן נאר טון דיין ווילן. יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיך ה' צוּרִי וְגוֹאֲלִי אָמֵן כֵּן יְהִי רָצוֹן".
דער אייבערשטער זאל העלפן איר זאלט האבן הצלחה אין אלע ענינים.