בעזרת ה' יתברך - יום ב' פרשת ויגש, ב' טבת, זאת חנוכה, שנת תשפ"ו לפרט קטן
טייערער ליבער ... נרו יאיר
יעצט חנוכה דארפן מיר זיך בארעכענען, אריינטראכטן אין די גרויסקייט פונעם אייבערשטן; חנוכה ווערט אנטפלעקט אז אלעס אויף די וועלט איז אלקות, אפילו די טבע איז אויך אלקות; דאס אז אויל ברענט איז נישט ווייל אויל ברענט, נאר ווייל דער אייבערשטער זאגט אז אויל זאל ברענען, און אזוי אויך מיט יעדע זאך; חנוכה ווערט אנטפלעקט די אמונה.
איך בעט דיר זייער טייערער ברודער, שטארק זיך מיט אמונה און בטחון, גלייב אינעם אייבערשטן אז אלעס איז מיט א חשבון, און אז דער אייבערשטער האט נישט פארגעסן פון דיר, יעדע ריר פון דיר, יעדע פינטל - איז מיט א פינקטליכער חשבון פאר דיין אייביגע טובה.
מאך זיך א שיעור אין משניות, זאג יעדן טאג כאטש איין פרק משניות מיט פינף קאפיטלעך תהילים, און דער אייבערשטער זאל דיר העלפן זאלסט זיין געזונט און שטארק פיזיש און גייסטיש, און זאלסט האבן הצלחה אין אלע דיינע מעשים.