בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן
מיין טייערער ... נרו יאיר
איך האב ערהאלטן דיין בריוו.
דאס וואס דו גייסט אריבער וכו', דו חלומ'סט זיך שלעכטע חלומות וכו' און דו פאלסט וכו', דו ווילסט אזוי שטארק זיין ריין און אפגעהיטן; זאלסטו לערנען פארן שלאפן גיין - ליקוטי מוהר"ן.
די סגולה האט דער הייליגער טשערנאבלער מגיד זכותו יגן עלינו געגעבן פאר א איד וואס האט זיך באקלאגט אז ער ווערט נכשל אין מקרה לילה רחמנא לצלן, ער האט געוויינט אז דער הייליגער מגיד זאל אים געבן א עצה, דער מגיד האט אים געגעבן עצות, למעשה איז ער צוריק געקומען אז די עצות העלפן נישט, האט ער אים געגעבן אנדערע עצות, און ער איז צוריק געקומען זאגן אז די עצות העלפן אויך נישט, און ער ווערט נכשל בעוון קרי רחמנא לצלן. האט אים דער הייליגער מגיד זכותו יגן עלינו געזאגט: "יעצט וועל איך דיר געבן א סגולה וואס דו וועסט שוין נישט צוריק קומען צו מיר, ווייל די סגולה וועט דיר זיכער העלפן", ער האט אים ארויסגעברענגט דעם ספר 'ליקוטי מוהר"ן' און אים געזאגט: "לערן יעדע נאכט פאר דו גייסט שלאפן אביסל פון דעם ספר, וועסטו זיכער ווערן אפגעהיטן פון אלע שלעכטס און פון מקרה לילה.
דער אייבערשטער זאל העלפן זאלסט האבן הצלחה אין אלע ענינים.