בעזרת ה' יתברך
יום א' פרשת בשלח, י"א שבט, שנת תשפ"א לפרט קטן
לכבוד ... נרו יאיר
איך פריי זיך זייער צו הערן גוטע גרוסן אויף דיר; דיין ווייב שרייבט אינעם בריוו אז זי איז העכסט צופרידן פון דיר, דו פירסט זיך מיט יראת שמים, דו רעדסט שיין צו איר.
געדענק נישט צו חוזק מאכן פון אירע עלטערן; קיינמאל זאלסטו נישט רעדן אויף אירע עלטערן. עס טוט זייער וויי ווען מען הערט א צווייטן חוזק מאכן; אפילו דו הערסט ווי זי רעדט קעגן אירע עלטערן, זי רעדט זיך אויס, זי דערציילט שרעקליכע מעשיות פון אלס קינד, זאלסטו אבער געדענקען צו בלייבן שטיל און נישט מיט רעדן.
עס איז אינטערעסאנט ווי דאס קען זיין, ווען זי אליינס רעדט זיך אפ וכו' וכו' און אין די זעלבע צייט אויב זי וועט הערן פון אנדערע וואס רעדן וועט איר דאס שטערן? אבער דאס איז א פאקט.
איך האף דו וועסט אכטונג געבן אויף די נקודה וועט זיין שלום ביי דיר אין שטוב.
דער אייבערשטער זאל העלפן זאלסט האבן הצלחה אין אלע ענינים.