בעזרת ה' יתברך - יום ד' פרשת שמות, י"ח טבת, שנת תשפ"ו לפרט קטן
לכבוד ... נרו יאיר
קומענדיגע וואך, מאנטאג פרשת וארא, זענען מיר מסיים מסכת זבחים; הלואי הייבסטו אויך אן לערנען יעדן טאג דעם בלאט גמרא, און עס זאל ווערן א חלק פון דיין טאג אזוי ווי אנטון תפילין, דו גייסט נישט שלאפן אן לערנען דעם בלאט גמרא, ווייל מוהרא"ש ברענגט פון דעם גרויסן גאון רבי שעפטיל זכר צדיק לברכה, דער זון פונעם של"ה הקדוש זכותו יגן עלינו, וואס ער שרייבט אין זיין צוואה (סוף ספר יש נוחלין, אות כה): "לערנען א בלאט גמרא יעדן טאג דארף זיין א חיוב פארן מענטש אזוי ווי אנטון תפילין יעדן טאג".
אז דו וועסט לערנען תורה, דו וועסט לערנען גמרא - וועסטו אלעס פאררעכטן, די תורה וועט דיך היטן, די תורה וועט זיך אננעמען פאר דיר. אזוי ווי די הייליגע חכמים זכרונם לברכה דערציילן (חגיגה טו:), אז די טאכטער פון אחר [- דער תנא וואס איז געווארן אן אפיקורס] איז געקומען צו רבינו הקדוש און זי האט אים געבעטן: "רֶבִּי, פַּרְנְסֵנִי", רבי געבט מיר עפעס עסן, האט רבינו הקדוש איר געפרעגט: וועמענ'ס טאכטער ביסטו? האט זי גענטפערט: "בִּתּוֹ שֶׁל אַחֵר אֲנִי", איך בין א טאכטער פן אחר, האט רבינו הקדוש געזאגט מיט וואונדער: "עֲדַיִן יֶשׁ מִזַּרְעוֹ בָּעוֹלָם?" ער האט נאך קינדער דא אויף די וועלט? עס שטייט דאך (איוב יח, יט): "לֹא נִין לוֹ וְלֹא נֶכֶד בְּעַמּוֹ וְאֵין שָׂרִיד בִּמְגוּרָיו", עס וועט נישט בלייבן קיין קינדער און אייניקלעך פון דעם רשע! האט זי זיך אנגערופן צו רבינו הקדוש און אים געבעטן: "זְכֹר לְתוֹרָתוֹ וְאַל תִּזְכֹּר מַעֲשָׂיו", איך בעט דעם רבי'ן זאל געדענקען די תורה וואס ער האט געלערנט און נישט געדענקען זיינע שלעכטע מעשים; ווען זי האט דאס ארויס געזאגט איז אראפגעקומען א פייער פון הימל און פארברענט דאס בענקל פון רבינו הקדוש, זיך אנצונעמען פאר אים, האט רבינו הקודש זייער געוויינט און געזאגט: "וּמַה לַמִתְגַנִין בָּהּ כָּךְ, לַמִשְׁתַּבְּחִין בָּהּ עַל אַחַת כַּמָּה וְכַמָּה", מה דאך ווען א רשע לערנט תורה קומט די תורה און נעמט זיך אן פאר אים, איז דאך אודאי און אודאי ווען א איד וואס גלייבט אינעם אייבערשטן לערנט תורה - וועט זיך זיכער די תורה אננעמען פאר אים.
בעט דיין ווייב זי זאל אנגרייטן פאר קומענדיגע וואך, מאנטאג נאכט פרשת וארא א סעודה ביי דיר אין שטוב, מאנטאג זענען מיר מסיים מסכת זבחים. מאך א סיום פאר דיין משפחה; דו מיט דיין ווייב מיט די קינדער, ברעג אריין אין שטוב א ליבשאפט צו תורה, דיינע קינדער זאלן זען אז תורה איז חשוב; מען רעדט אלץ פון געלט און פון שיינע קארס, יעצט זאלסטו רעדן פון לערנען גמרא, און שלעפ אריין דיינע עלטערע קינדער זיי זאלן אויך אנהייבן לערנען יעדן טאג גמרא, זיי זאלן אנהייבן מסכת מנחות, זאג זיי צו עפעס פארן לערנען תורה.
(אפילו דו האסט נאר געזאגט די ווערטער קענסטו אויך מסיים זיין, עס איז א געהעריגע סיום, בלי שום ספק).
דער אייבערשטער זאל העלפן זאלסט האבן הצלחה אין אלע ענינים.